Ekśpiert pra dazvoł biełarusam na emihracyju: Ničoha niečakanaha i rezkaha pastanova nie ŭvodzić

Juryst pravaabarončaha centra «Viasna» Pavał Sapiełka daŭ svaju acenku novaj pastanovie ŭrada. Dakumient vyznačaje paradak dazvołu na vyjezd za miažu na stałaje pražyvańnie.

Ekśpiert adznačyŭ, što ničoha niečakanaha i rezkaha pastanova nie ŭvodzić. Faktyčna, padobnyja normy raniej užo byli ŭ zakonie.

— Što rezka źmianicca dla hramadzian krainy paśla pryniaćcia novaha dakumienta?

— Ničoha radykalna novaha Pastanova Savietu ministraŭ nie praduhledžvaje, a tolki raźvivaje normy Zakona ad 20 vieraśnia 2009 hoda pad № 49-Z «Ab paradku vyjezdu z Respubliki Biełaruś i ŭjezdu ŭ Respubliku Biełaruś hramadzian Respubliki Biełaruś». U raździele 4 hetaha zakona mova idzie pra afarmleńnie hramadzianam vyjezdu dla stałaha pražyvańnia (afarmleńnie stałaha pražyvańnia) za miežami Respubliki Biełaruś.

Padkreślu — razmovy ab niejkich dazvołach nie idzie, hety praces datyčycca mienavita afarmleńnia dakumientaŭ — pierš za ŭsio pašparta, u jaki ŭnosiacca adpaviednyja adznaki.

U artykule 20 hetaha zakona ŭstanoŭleny abaviazki hramadzian, jakija žadajuć aformić vyjezd dla pastajannaha pražyvańnia (aformić pastajannaje pražyvańnie) za miežami Respubliki Biełaruś. Jakraz ich, tolki ŭ bolš razhornutym i detalizavanym vyhladzie, pieranieśli ŭ novuju pastanovu.

— Atrymlivajecca, adzinaja istotnaja roźnica — z afarmleńniem dakumientaŭ na vyjezd, a nijak nie z praceduraj? Bo raniej uładalnikam pašparta sieryi RR stavili piačatku ŭ pašpart.

— Tut možna nie pahłyblacca ŭ detali, asnoŭnaja ideja — heta nie dazvolny pryncyp, kali dziaržava, jak u SSSR, dazvalała abo nie dazvalała svajmu hramadzianinu vyjezd, heta prosta pracedura, paradak afarmleńnia dakumientaŭ, vynikam jakoha stanovicca źniaćcie z uliku i afarmleńnie zapisu ŭ pašparcie. Navat pry admovie čałaviek moža źjechać z krainy, ale zastaniecca zarehistravanym u Biełarusi.

Pastanova havoryć ab tym, što paŭnaletni hramadzianin pry namiery vyjechać na stałaje žycharstva za miažu ciapier musić padać adpaviednuju zajavu pra žadańnie vyjechać i nieabchodnyja dakumienty ŭ adździeł hramadzianstva i mihracyi. Zajavu i dakumienty ad imia niepaŭnaletnich padaje zakonny pradstaŭnik.

Čynoŭniki ŭ 3-dzionny termin paśla atrymańnia dakumientaŭ adpraviać nieabchodnyja zapyty nakont mahčymych zapazyčanaściaŭ. Siarod ich:

• ab vykanańni padatkovych abaviazańniaŭ;
• spynieńni dziejnaści indyvidualnaha pradprymalnika;
  najaŭnaści zhody vajskovaha kamisaryjatu (u dačynieńni pryzyŭnikoŭ i hramadzian va ŭzroście 18-27 hadoŭ, jakija znachodziacca ŭ zapasie);
• vykanańni alimientnych abaviazańniaŭ;
• źviestkach pra kampiensacyju vydatkaŭ, jakija dziaržava paniesła na ŭtrymańnie dziaciej (u dačynieńni da abaviazanych asob).

Akramia taho, čynoŭniki pravierać, ci niama ŭ zajaŭnika abmiežavańniaŭ na vyjezd, ci jość jon u banku pravaparušeńniaŭ.

U vypadku zhody ŭ pašpart pastaviać adznaku ab dazvole na afarmleńnie vyjezdu za miažu dla stałaha pražyvańnia.

Pra rašeńnie zajaŭniku paviedamiać na praciahu troch dzion paśla jaho pryniaćcia.

• 4
• 0
• 1
• 7
• 0
• 0
• 2
• 0