Karcina z kocikami za 1000 jeŭra i hierbaryj za 250. Jakija łoty pradali na aŭkcyjonie, kab sabrać hrošy na padarunki dzieciam palitviaźniaŭ
Biełaruski fond salidarnaści «Bajsoł» źbiraje dapamohu dla dziaciej palityčnych źniavolenych. U ramkach kaladnaj akcyi «Padorym dzieciam cud!» prajšoŭ mini-aŭkcyjon. Pahladzieli, jakija łoty achviaravali biełarusy na karysnuju spravu.
«U mnohich biełaruskich dzietak chtości z baćkoŭ (a časam i aboje) u hety čas znachodzicca za kratami pa palityčnych matyvach. Mnohija siemji vymušanyja buduć sustrakać navahodnija śviaty ŭ čužoj krainie, u rasstańni, nie majučy mahčymaści zrabić tradycyjnyja padarunki rodnym. Razam z vami my možam zrabić tak, kab palitźniavolenyja baćki padaryli svaim dzieciam krychu radaści ŭ hetyja dni», — raspaviadaje pra zbor «Bajsoł». U ramkach akcyi Fond płanuje sabrać 20 000 jeŭra — pa 100 jeŭra na padarunak dla kožnaha dziciaci.
Da ŭdziełu ŭ aŭkcyjonie dałučyŭsia Ihar Słučak, jaki raniej razam ź siamjoj evakuiravaŭsia ź Biełarusi pry dapamozie «Bajsoł». Mužčyna vystaviŭ na tarhi błok redkaj marki sa svajoj asabistaj kalekcyi — z karcinaj «Jeva» mastaka Chaima Sucina. Vyjava dziaŭčyny ŭ čornym stała adnym ź simvałaŭ pratestaŭ 2020 hoda.
Na starcie aŭkcyjonu košt marak, vypuščanych Biełpoštaj ŭ 2015-m, składaŭ 100 jeŭra. Za niekalki dzion suma vyrasła da 230. U dadatak da asnoŭnaha łota pieramožca atrymaje pryjemnyja bonusy. «Razam ź Jevaj buduć jašče nievialikija padarunki, ale my nie skažam jakija, kab kaladnaja niespadziavanka była i dla pieramožca aucyjonu», — napisaŭ na svajoj staroncy Ihar Słučak.
Mastačka Volha Jakuboŭskaja, viadomaja karcinami z kocikami, napiaredadni svajoj vystavy «Žanočy Marš» u Fłarencyi razyhrała na dabračynnym aŭkcyjonie rabotu «Festa della Repubblica».
Za łot viałasia baraćba. Pačatkovy košt karciny skłaŭ 100 jeŭra, ale ŭ kancy tarhoŭ łot byŭ pradadzieny za 1000 jeŭra.
Adna z mastačak achviaravała hierbaryj z kvietak, pieraviezienych ź Biełarusi. «Hetyja kvietki źbiralisia i sušylisia ŭ Biełarusi ŭ 2021 hodzie i razam ź inšymi niešmatlikimi rečami vyjechali ŭ emihracyju ŭ tym ža hodzie naprykancy leta. To niachaj hetaja karcina kamuści pryniasie čaścinku rodnaha kraju i paspryjaje dobraj spravie», — raspaviadaje pra svoj łot žančyna.
Samaja vysokaja staŭka za kampazicyju z kvietak skłała 250 jeŭra.
Akramia aŭkcyjonu ŭ miežach akcyi adbyvajucca i inšyja cikavyja aktyŭnaści. U aŭtorak, 28 listapada, biełaruski dabračynny muzyčny ruch Belarus Outside Sound System i internet-telekanał UKRAiNATV pry padtrymcy prajekta rezidencyj i kulturnaha abmienu PerspAKTIV pradstaŭlajuć 5-hadzinny strym salidarnaści z udziełam čatyroch biełaruskich dydžejaŭ i elektronščykaŭ.
«Krakaŭskija elektronščyki ź Biełarusi pradstaviać svaje časovyja sety. Padčas strymu my budziem źbirać hrošy na «Kaladny cud» — padarunki dzietkam, u jakich chtości z baćkoŭ u hetuju hadzinu znachodzicca za kratami pa palityčnych matyvach», — pišuć muzyki ŭ sacyjalnych sietkach.
U miežach kaladnaj akcyi «Padorym dzieciam cud!» užo sabrana bolš za 14 tysiač jeŭra. Zajaŭki na dapamohu padali zvyš 115 siemjaŭ palitviaźniaŭ. Unieści svoj układ i dałučycca da zboru možna pa hetaj spasyłcy.
Ciapier čytajuć
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1818
Kamientary