Ukrainu sustreli avacyjaj.
Marco Mantovani/Getty Images
U Miłanie i Karcina-d'Ampieca ŭ piatnicu adkrylisia XIV Zimovyja Paralimpijskija hulni. Cyrymonija adkryćcia prajšła na histaryčnaj arenie Vierony — u antyčnym rymskim amfiteatry, pabudavanym u I stahodździ našaj ery i jaki źmiaščaje kala 12 tysiač hledačoŭ, piša Bi-bi-si.
Cyrymonija atrymałasia malaŭničaj, ale była azmročana skandałam, jaki pačaŭ raźvivacca značna raniej — kali ŭ vieraśni 2025 hoda Mižnarodny paralimpijski kamitet (MPK) całkam adnaviŭ status paralimpijskich kamitetaŭ Rasii i Biełarusi, prypynieny paśla pačatku poŭnamaštabnaj vajny va Ukrainie.
Kančatkovaje rašeńnie ab dopusku prymałasia na ŭzroŭni asobnych fiederacyj. Try z čatyroch nie ŭchvalili ŭdzieł rasijan i biełarusaŭ u Hulniach u Italii, chakiejnaja fiederacyja dała dazvoł zanadta pozna.
Adnak Maskva i Minsk zmahli asprečyć rašeńnie Mižnarodnaj fiederacyi łyžnaha sportu i snaŭbordu ŭ Spartyŭnym arbitražnym sudzie. U vyniku da Hulniaŭ u Miłanie-Karcinie byli dapuščanyja šeść spartsmienaŭ z Rasii i čatyry ź Biełarusi.
U znak pratestu cyrymoniju adkryćcia bajkatavali 7 delehacyj — Ukrainy, Polščy, Čechii, Finlandyi, Estonii, Łatvii, Litvy.
Francyja i Vialikabrytanija admovilisia nakiroŭvać svaich aficyjnych pradstaŭnikoŭ na cyrymoniju taksama ŭ znak pratestu suprać uklučeńnia Rasii ŭ prahramu, ale heta rašeńnie nie raspaŭsiudžvałasia na spartsmienaŭ.
Ale francuzskija i brytanskija spartsmieny, taksama jak zbornyja Kanady i FRH, nie pryjšli na adkryćcio «pa techničnych pryčynach». Pa słovach pradstaŭnika MPK Krejha Śpiensa, hetyja zbornyja zajavili, što chočuć «addać pryjarytet spartyŭnym dasiahnieńniam».
Ściahi hetych 11 krain vynieśli padčas parada atletaŭ vałanciory Hulniaŭ, ale spartsmieny na stadyjonie nie źjavilisia.
Zbornaja Rasii, jakaja ŭpieršyniu vyjšła pad svaim ściaham z 2014 hoda (vykarystańnie dziaržaŭnaj rasijskaj atrybutyki było zabaroniena jašče da ŭvarvańnia va Ukrainu z-za dopinh-skandałaŭ), była aśvistana trybunami.
Vyniesieny nieŭzabavie ściah Ukrainy (krainy źjaŭlajucca na stadyjonie ŭ ałfavitnym paradku) byŭ sustrety praciahłaj avacyjaj.
«My razumiejem, što mnohija krainy niezadavolenyja rašeńniem [ab dopusku rasijan], ale jano było pryniata ŭ ramkach vielmi demakratyčnaha pracesu», — zajavili ŭ Mižnarodnym paralimpijskim kamitecie.
Spasyłajučysia na tyja ž demakratyčnyja pracesy, MPK maje namier dazvolić udzieł u budučych Paralimpijskich hulniach rasijskim sałdatam, jakija atrymali ranieńni na vajnie z Ukrainaj. Pra heta zajaviŭ prezident Mižnarodnaha paralimpijskaha kamiteta Endru Parsans.
Rasśledavańnie polskaha vydańnia Vot Tak, pra jakoje paviedamlaje The Moscow Times, pakazała, što Rasija paskorana pieravodzić paranienych vajskoŭcaŭ u parasport.
Pa danych Rasijskaha paralimpijskaha kamiteta, «jak minimum 70» vieteranaŭ užo vystupajuć u nacyjanalnych kamandach.
«Kali hienieralnaja asambleja pryniała rašeńnie źniać dyskvalifikacyju z Rasii i Biełarusi, było vyrašana stavicca da ich tak ža, jak da luboha inšaha nacyjanalnaha paralimpijskaha kamiteta. U mnohich krainach spartsmienaŭ nabirajuć z uzbrojenych sił, tamu kali Rasija robić toje ž samaje, jana nie budzie adzinaj», — zajaviŭ Parsans BBC Sport u dzień adkryćcia Zimovych Paralimpijskich hulniaŭ u Italii.
Jon taksama zaklikaŭ nie zabyvać pra histaryčnyja karani paralimpijskaha ruchu.
«Treba pamiatać, adkul my pryjšli. Naš ruch pačaŭsia paśla Druhoj suśvietnaj vajny — mienavita z paranienych vajskoŭcaŭ», — skazaŭ jon.
«Toje, što prapanuje paralimpijski ruch, — heta mahčymaść paśla vajny. My suprać luboj vajny i luboha kanfliktu, ale my prapanujem šaniec ludziam, jakija atrymali ranieńni na vajnie, znoŭ intehravacca ŭ hramadstva praz sport».
«Dla nas nie maje značeńnia, što jany rabili na poli boju ŭ minułym. Viadoma, vajennyja złačynstvy — heta inšaja sprava, ale naš ruch prapanuje druhi šaniec», — zajaviŭ kiraŭnik Mižnarodnaha paralimpijskaha kamiteta.
Paralimpijada ŭ Miłanie-Karcinie projdzie biez pradstaŭnikoŭ Irana.
MPK zajaviŭ, što adziny spartsmien, jaki rychtavaŭsia pradstaŭlać krainu na Hulniach, «nie moža biaśpiečna adpravicca ŭ Italiju» z-za praciahłaha kanfliktu na Blizkim Uschodzie.
Admova ad udziełu łyžnika Abulfazła Chacibi Mijanai była paćvierdžana ŭ piatnicu, za niekalki hadzin da cyrymonii adkryćcia Hulniaŭ u Vieronie.
Prezident MPK Endru Parsans zajaviŭ, što heta «vielmi rasčaroŭvaje suśvietny sport i asabliva Abulfazła» — toje, što jon nie zmoža pryniać udzieł u Hulniach.
«Śvińni zarochkali. Biez vady daŭno nie siadzieli, ja b im adklučyŭ». Azaronak abrynuŭsia na žycharoŭ rajona Lebiadziny29
Kamientary
I ŭ hety ž čas ździekvacca ź bieznohich atletaŭ.
Heta niejki nieparadak pad iłbom.