Cichanoŭskaja: Biełarusy, jakija časta jeździać ź Litvy na radzimu, robiać heta nie z-za lubovi da Łukašenki
Śviatłana Cichanoŭskaja prakamientavała mahčymuju papraŭku ŭ zakony Litvy, jakaja prapanuje ŭvieści novyja padstavy dla anulavańnia DNŽ biełarusaŭ u hetaj krainie.
Śviatłana Cichanoŭskaja padkreśliła, što na hety momant isnuje tolki prapanova ŭnieści papraŭki, ale zakona takoha jašče niama. Sama Cichanoŭskaja i jaje Ofis na suviazi z deputatami Siejma i sprabujuć ich pierakanać admovicca ad pryniaćcia papravak u takim vyhladzie.
«Uciekačy ad palityčnaha pieraśledu i tak nie mohuć viarnucca dadomu, kab dapamahčy blizkim, naviedać pachavańnie svajakoŭ abo pakazać dzieciam rodnyja miaściny. A tyja, chto moža pierasiakać miažu biez strachu apynucca ŭ turmie, robiać heta nie z-za lubovi da Łukašenki abo padtrymki vajennaj ahresii suprać Ukrainy, a pa asabistych pryčynach», — adznačaje Cichanoŭskaja.
«Razmaŭlajučy ź jeŭrapiejskimi palitykami, ja padkreślivaju: važna izalavać režym Łukašenki, a nie biełarusaŭ», — adznačaje demakratyčnaja lidarka, źviartajučy ŭvahu, što režym akurat choča pasvaryć biełarusaŭ i litoŭcaŭ, prykładajučy dla hetaha namahańni. I kali niejkija incydenty ŭźnikajuć, to biełaruskija demakratyčnyja siły sami zacikaŭlenyja nie mienš za litoŭcaŭ «vyjaŭlać pravakataraŭ i zachoŭvać dobrazyčlivyja adnosiny pamiž ludźmi».
Pry hetaj nahodzie Śviatłana Cichanoŭskaja źviarnułasia i da biełarusaŭ:
«Nie treba jeździć u Biełaruś, kali heta pahražaje niebiaśpiekaj! Dobryja namiery nie vartyja taho, kab apynucca za kratami. Abmien dakumientaŭ abo ździełki ź nieruchomaściu nie zrobiać vas ščaślivymi, kali nie budzie mahčymaści ŭsim hetym skarystacca.
I ŭžo tym bolš nie pierasiakajcie miažu, kali vy ŭładalnik humanitarnaj vizy abo palityčnaha prytułku.
Bo heta nie tolki sihnał dla režymu źviarnuć na vas pavyšanuju ŭvahu, ale i padstava dla dziaržaŭnych orhanaŭ Litvy anulavać dazvoł na časovaje znachodžańnie, kali vy paznačyli jak padstavu dla jaho vydačy niemahčymaść viarnucca ŭ svaju krainu».
Čytajcie taksama:
U Siejm Litvy ŭnieśli zakonaprajekt ab pazbaŭleńni DNŽ biełarusaŭ, jakija časta jeździać na radzimu
Kolki biełaruskich firmaŭ i ich rabotnikaŭ rełakavałasia ŭ Litvu?
U Litvie zarehistravanyja 63 tysiačy biełarusaŭ z DNŽ. Ale źjaviłasia novaja tendencyja
Kamientary