Biełaruskaja intryha: Łukašenka suprać ekanomiki

Dla palitołahaŭ stała ŭžo ahulnym miescam kazać: miascovyja vybary ŭ Biełarusi nie tojać intryhi. Dy i nie tolki miascovyja, pa vialikim rachunku, dadajuć inšyja.

Minułym razam u saviety z apazicyi nie prabiŭsia praktyčna nichto. Sfarmavany vosieńniu 2008-ha parłamient naziralniki źjedliva nazvali «sterylnym». Nu, a na prezidenckich vybarach z 1994-ha, sami viedajecie — niaźmienny tryumfatar. I Łukašenka ŭžo vyrazna daŭ zrazumieć, što raźličvaje na čarhovuju pieramohu.

Hłucha jak u tanku?

Pierad sioletnimi vybarami ŭłady zrabili žest — unieśli až kala 130 papravak u vybarčaje zakanadaŭstva. Łozunh na ekspart, dla Jeŭraźviazu — libieralizacyja. Košt hetaj rytoryki vy viedajecie.

Niezaležnyja ekśpierty pastavili dyjahnaz: tak, pa drobiazi (zbor podpisaŭ, ahitacyja i da t.p.) stanie krychu lahčej, mieniej dušyłaŭki, ale

ŭ pryncypovych pytańniach — nazirańnie i padlik hałasoŭ — usio pa-staromu. A značyć, vybarčy praces zastajecca čornaj skryniaj.

Apazicyi, pa sutnaści, daduć źlohku pahareźničać na pramiežkavych stadyjach. Zrešty, u jaje zamała aktyvistaŭ i resursaŭ, kab husta vystupić na miascovych vybarach 25 krasavika pa ŭsioj krainie. Ludzi nie harać žadańniem stračvać pracu, atrymlivać dva vazy i cebar inšych niepryjemnaściej dziela iluzii.

Na prezidenckich vybarach momant napružańnia zaŭsiody bolšy, ale i tut na siońnia šancy Łukašenki vyhladajuć bolš čym unušalnymi. Administracyjny resurs — samo saboj. Ale ž! Pry ŭsioj umoŭnaści rejtynhaŭ u krainie vypalenaha palityčnaha pola pryviadziem ličby śniežańskaha nacyjanalnaha apytańnia NISEPD. Adkazvajučy na adkrytaje pytańnie «Kali b zaŭtra adbylisia vybary prezidenta Biełarusi, za kaho b vy prahałasavali?», 42,5% nazvali Łukašenku.

Paśla prasiadańnia na niekalki pracentaŭ (kryzisnyja niepryjemnaści, devalvacyja) jaho rejtynh ełastyčna viarnuŭsia na ŭzrovień vieraśnia 2008 hoda. Sacyjałahičnyja daśledavańni pakazvajuć: u kryzis ludzi hatovy zaciahnuć pajasy, źnizić patreby, pieratryvać na horšaj pracy i h.d. Nijakich vam hronak hnievu, nijakich revalucyjnych pamknieńniaŭ. Jašče bolš, sa słoŭ sacyjołaha Nadziei Jafimavaj, «kryzis nie staŭ stymułam da aktyŭnaści, a staŭ stymułam da dehradacyi».

Zdavałasia b, kiruj dy ŭ vus nie dźmi da skančeńnia vieku!

Adnak pryjšła biada, adkul nie čakali. Dakładniej, naviersie zdahadvalisia, što rana ci pozna Rasija stanie ščamić pa poŭnaj prahramie. Ale niejak usio nie vieryłasia. Voś i ciapier, u kantekście naftavaha procistajańnia, Łukašenka piša Miadźviedzievu: nu jak ža tak, u śniežni ž damaŭlalisia!..

Ale słova da spravy nie pryšyješ, a surovy Siečyn hnie svajo: naftavaja łafa skončyłasia, hanicie myta na čornaje zołata pa poŭnaj! I chto pavieryć, što rasijski vice-premjer zajmajecca samavolstvam biez admaški źvierchu?

Kažuć, na kon pastaŭleny biełaruskija NPZ, i nie tolki. Zrešty, kali ich i ŭdasca adbić, to sama naftapierapracoŭka pa novaj, biaźlitasnaj schiemie moža zvalicca ŭ minus.

Tym časam kryzis padkasiŭ naša mašynabudavańnie, jakoje dahetul trymajecca na sastarełych kitach savieckaj industryi. Tak, naprykład, aŭtapram pa vynikach hoda ŭpaŭ na 43,6%, składskija zapasy hruzavikoŭ pavialičylisia ŭ 1,8 razu. Uvohule biełaruski ekspart tavaraŭ za 11 miesiacaŭ letaś źjechaŭ na 38,4%. Dla małoj adkrytaj ekanomiki — a naša pa-navukovamu mienavita takaja — heta kałasalny pravał.

I šancy adnavić pramysłovy ekspart paśla kryzisu chistkija. Ekanomicy da zarezu patrebna madernizacyja. Dzie ŭziać hrošy, inviestycyi? Moža, «Zachad nam dapamoža»?

Tak, Zachad pakazaŭ, što moža padkinuć kredytaŭ. Letaś biełaruskija finansy prasiedzieli na ihołcy MVF. Ale Jeŭropa sama siadzić na rasijskich enierharesursach, alternatyŭnyja pastaŭki dla nas (Kaśpij, a tym bolš Vieniesueła abo Iran) viłami pa vadzie pisany. Ad Rasii, niachaj i ŭsio bolš niezhavorlivaj, tak voś prosta nie adčališ.

«Svoj hieapalityčny vybar Minsk, jak ni dziŭna, užo zrabiŭ, — havoryć ekśpiert analityčnaha centra „Stratehija“ Valer Karbalevič. — Heta — bałansavańnie. Madel daje efiekt, i mianiać jaje ciapierašniaje kiraŭnictva Biełarusi nie źbirajecca».

Hałoŭnaja ž biełaruskaja intryha, ličyć palitołah, palahaje ŭ baraćbie Łukašenki suprać ekanomiki.

Voś taki jon,

siužet dramy ŭ krainie amal darešty vypalenaj palityčnaj alternatyvy: pry jaje bačnaj adsutnaści aficyjny pravadyr viadzie boj z usio bolš biaźlitasnymi ekanamičnymi navałami. Jakim nie ŭ stanie efiektyŭna procistajać zatočanaja pad tannyja enierhanośbity madel.

«Łukašenka moža vyjhrać vybary pa zvykłaj schiemie, ale heta nie vyrašyć nivodnaj prablemy, — havoryć Jarasłaŭ Ramančuk, kiraŭnik Navukova-daśledčaha centra Miziesa. — I samym ciažkim dla kiraŭnika krainy budzie hod paśla vybaraŭ».

Jon dapuskaje, što, «zachoŭvajučy, mahčyma, rytoryku, Łukašenka budzie zmušany vykinuć na śmietnik archaičnuju ekanamičnuju madel».

Što tady? Kitajski, sinhapurski šlach? Adnak tut šmat «ale», i varyjant sapraŭdnaj libieralizacyi biźniesu pry zachavańni žorstkaj aŭtarytarnaj madeli, pavodle prahnozaŭ ekśpierta, zdolny praciahnuć tolki dva-try hady.

Dapuścić ža «razhuł demakratyi» ciapierašniaja ŭłada i ŭ dumkach nie moža.

«Łukašenka ŭžo ŭziaŭ elemienty prahramy svaich palityčnych apanientaŭ, — miarkuje Ramančuk. — Jon ukaraniaje elemienty libieralnaj ekanomiki i pakrychu rušyŭ u bok Zachada. Pytańnie ŭ tym, jak doŭha ŭdasca ŭlivać novaje vino ŭ staryja miachi».

Tak što nie vyklučana: sapraŭdny čas vyklikaŭ pryjdzie paśla vybaraŭ.

• 0
• 0
• 0
• 0
• 0
• 0
• 0
• 0