Raniej rašeńnie ab zabojstvie dzikich žyvioł taksama pryniali ŭłady Namibii.
Z-za budučaha niedachopu charčavańnia, vyklikanaha zasuchaj, u Zimbabve zabjuć 200 słanoŭ. Ułady ŭžo dali adpaviednaje daručeńnie, pieradaje The Guardian.
Na słanoŭ buduć palavać u tym liku ŭ najbujniejšym zapaviedniku krainy — Chvanhie. Dalej čynoŭniki płanujuć «mabilizavać žančyn, kab vysušyć miasa, spakavać jaho i zabiaśpiečyć dastaŭku ŭ niekatoryja abščyny, jakija majuć patrebu ŭ białku».
U Zimbabve ciapier žyvie kala sta tysiač słanoŭ — «bolš, čym treba», na dumku ministra navakolnaha asiarodździa. Ź im nie zhodnyja niekatoryja ekśpierty i zoaabaroncy. Jany ličać, što va ŭładaŭ pavinny być bolš ekałahičnyja mietady baraćby z zasuchaj, i niepakojacca, što rašeńnie ab zabojstvie słanoŭ moža adšturchnuć turystaŭ pa etyčnych mierkavańniach.
«My ŭžo pakazali, što drenna zachoŭvajem pryrodnyja resursy, a naš apietyt da niezakonna nažytych bahaćciaŭ nie viedaje miežaŭ, tamu heta treba spynić, tamu što heta nieetyčna», — kaža dyrektar Nacyjanalnaha centra pa kiravańni pryrodnymi resursami Faraj Mahuvu.
Raniej rašeńnie ab zabojstvie dzikich žyvioł dziela charčavańnia pryniali ŭłady Namibii. Źviaroŭ źniščać tam užo pačali.
Zimbabve i Namibija, razam ź jašče niekalkimi krainami Paŭdniovaj Afryki, abviaścili nadzvyčajnaje stanovišča z-za zasuchi.
Pavodle acenak AAN, kala 42% zimbabvijcaŭ žyvuć u biednaści. Ułady krainy ličać, što šeść miljonaŭ, abo bolš za tracinu nasielnictva, budzie mieć patrebu ŭ charčovaj dapamozie ź listapada pa sakavik, kali ź ježaj asabliva ciažka.
Ciapier čytajuć
Redaktara niezaležnaj baranavickaj haziety «Inteks-Pres» Janukieviča prysudzili da 14 hadoŭ kałonii, jaho namieśnika Pakalenku — da 12 hadoŭ10
Kamientary