Prapahanda piša, što syn eks-kiraŭnika MZS Ukrainy kupiŭ «Žalezny tron» za $1,5 miljona. Praŭda?
Aby-jak sklapany rolik zarepościli ŭ tym liku «Žoŭtyja źlivy» dy Ihar Tur.
Adzin z prałukašenkaŭskich kanałaŭ siońnia paviedamiŭ, što syn eks-ministra zamiežnych spraŭ Ukrainy Dźmitryja Kuleby Jahor kupiŭ na aŭkcyjonie ŭ ZŠA «Žalezny tron» z papularnaha sieryjała «Hulnia tronaŭ» amal za 1,5 młn dalaraŭ.
U paćviardžeńnie kanał apublikavaŭ uryvak z prahramy na techaskim telekanale Kens5. U efiry raskazvajecca pra našumieły aŭkcyjon, usio supravadžajecca citram «Dzie syn byłoha ministra zamiežnych spraŭ Ukrainy ŭziaŭ 1,5 młn dalaraŭ na «Žalezny tron»?» i fatahrafijaj 18-hadovaha Jahora Kuleby.
Na toje, što videa niejkija ŭmielcy trochi adredahavali, namiakaŭ raskaz viadučych: u siužecie ni proźvišča Kuleby, ni Ukraina nie zhadvałasia. Dyktary raskazvajuć pra toje, što za łot zmahalisia niekalki fanataŭ «Hulni tronaŭ», adzin ź jakich u vyniku i addaŭ za tron kazačnuju sumu.
Paćvierdziŭ hipotezu prahlad aryhinalnaha siužetu na sajcie telekanała. Tam nijakich nie vielmi ŭmieła dadadzienych citraŭ i fatahrafij Kuleby z synam niama.
Aŭtary fejku dadali nadpis i fatahrafii ŭ videašerah uručnuju, a zatym zapuścili jaho pa telehram-kanałach. Čarhovuju antyŭkrainskuju dezynfarmacyju z radaściu padchapiŭ adzin ź viadučych i samych adyjoznych łukašenkaŭskich kanałaŭ, a zatym repostnuŭ i prapahandyst Ihar Tur.
Dźmitryj Kuleba pracavaŭ ministram zamiežnych spraŭ Ukrainy ŭ 2020-2024 hadach. Niadaŭna jon raskazvaŭ, što jahony 18-hadovy syn Jahor vučycca va ŭniviersitecie i prachodzić vajskovuju padrychtoŭku.
«Žalezny tron» — heta tron manarcha Siami Karaleŭstvaŭ u supierpapularnym fentezi piśmieńnika Džordža Marcina «Pieśnia lodu i połymia» i źniataha pa matyvach knih sieryjała «Hulnia tronaŭ». Pavodle lehiendy, jon byŭ vykavany ŭ ahni cmokaŭ z mnostva miačoŭ. Jaho poŭnapamiernuju repliku z płastyka sapraŭdy pradali na aŭkcyjonie ŭ Dałasie ŭ kastryčniku razam ź inšymi artefaktami. Pra aŭkcyjon napisali najbujniejšyja ŚMI. Pry hetym imia pakupnika nidzie nie nazyvajecca.
Prapahandysty nie ŭpieršyniu padchoplivajuć dezynfarmacyju, nakiravanuju suprać Ukrainy. Šyroka viadomyja fejki, stvoranyja prarasijskaj sietkaj rehijanalnych psieŭdaSMI byłoha marpiecha ZŠA Džona Duhana: pra toje, što Uładzimir Zialenski nibyta kupiŭ limuzin Hitlera, a taksama pra kuplu jahonaj žonkaj Alenaj upryhožvańniaŭ bolš čym na miljon dalaraŭ. Usie hetyja paviedamleńni akazalisia falšyvymi.
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona11
Kamientary
U Štatach jakomu niebudź za kolki mahčyma vtiuchać ?