Školnica ź Biešankovičaŭ prydumała, jak šyć torby z čajnaha hryba
Unikalnuju technałohiju raspracavała vypusknica siaredniaj škoły №1 haradskoha pasiołka Biešankovičy. Maryja Pietuchova prydumała, jak atrymlivać bijaskuru z čajnaha hryba, piša BiełTA
Pa zadumcy, materyjał možna vykarystoŭvać dla vytvorčaści hałantarejnych vyrabaŭ.
«Ideja ŭźnikła krychu bolš za hod tamu, kali ja znachodziłasia ŭ babuli. U jaje doma byŭ čajny hryb. Jon vysach, a mnie stała vielmi cikava, što ź im možna zrabić dalej — raspaviała Maryja. — Sumiesna z kiraŭnikom pačali vyvučać suśvietnyja tendencyi i zrazumieli, što naša ideja ŭnikalnaja, jana całkam biełaruskaja».
Čajny hryb faktyčna bijaplonka, jakaja praktyčna całkam składajecca z celułozy. Paśla suški materyjał stanovicca ełastyčnym, adnak absalutna niaŭstojlivym da vilhaci.
«Ustojlivaść da vilhaci — hety momant nas cikaviŭ bolš za ŭsio. U vyniku ekśpierymientaŭ my vypracavali svoj mietad, jaki dazvalaje damahčysia takoha materyjału, jaki ŭstojlivy da vilhaci, ale pry hetym prapuskaje pavietra. Naš materyjał ustojlivy da ŭździejańnia: jaho nielha parvać. Bijaskura estetyčnaja, joj možna nadać lubuju teksturu. Materyjał lohka afarboŭvajecca», — raspaviała kiraŭnik prajekta Alena Piskunova.
Zaraz bijaskuru aktyŭna testujuć na znosaŭstojlivaść i daŭhaviečnaść. Niekatoryja ŭzory praviarajuć na ŭzajemadziejańnie z vadoj sa žniŭnia: ź imi ničoha nie adbyłosia. Tak, materyjał namakaje, ale chutka vysychaje. Darečy, bijaskura źjaŭlajecca bijaraskładalnaj. Biez apracoŭki ŭ kampostnaj jamie jana raskładziecca za paŭhoda, a z apracoŭkaj dla vilhacietryvałaści — za hod.
Miarkujecca, što ŭ budučyni bijaskury možna budzie vykarystoŭvać dla vytvorčaści sumak, ramianioŭ i kašalkoŭ.
Kamientary