Sfabrykavanyja pierakłady i łžyvyja abvinavačvańni. Što pišuć japonskija ŚMI pra zatrymanych hramadzian u Biełarusi
U Biełarusi za kratami pavodle palityčnych matyvaŭ utrymlivajucca dvoje hramadzian Japonii. Ich abodvuch zatrymali za zdymku čyhunki i abvinavačvajuć u ahienturnaj dziejnaści. Infarmacyi pra abstaviny ich pieraśledu brakuje. Pra aficyjnaje abvinavačvańnie vykładčyku Nakanisi Masatosi, nad jakim zaŭtra raspačniecca sud, paviedamlała dziaržaŭnaje telebačańnie. «Viasna» paprasiła advakata Kiena Sibata ź Japonii raspavieści, što pišuć pra zatrymanych japonskija vydańni.
Što viadoma pra zatrymanych?
10 studzienia ŭ Minskim haradskim sudzie raspačniecca sud nad palitźniavolenym hramadzianinam Japonii i vykładčykam Nakanisi Masatosi.
Jaho zatrymali jašče ŭ lipieni 2024 hoda, ale padrabiaznaści jaho pieraśledu raspaviali ŭ siužecie BT tolki ŭ vieraśni.
Śćviardžałasia, što mužčyna nibyta «ažyćciaŭlaŭ zbor i pieradaču na adras japonskaj śpiecsłužby raźviedvalnaj infarmacyi vajskovaha charaktaru». Ciapier jaho abvinavačvajuć pavodle art. 358-1 KK (ahienturnaja dziejnaść). Praces pryznačana vieści sudździa Anžeła Kaściukievič. Hramadzianinu Japonii pahražaje da 7 hadoŭ kałonii.
U śniežni stała viadoma pra zatrymańnie druhoha japonca ŭ Biełarusi. Heta paćvierdziła ambasada Japonii. Jak piša The Asahi Shimbun, ambasada źviarnułasia za paćviardžeńniem infarmacyi ŭ MZS Biełarusi. 16 śniežnia viedamstva apaviaściła ambasadu ab zatrymańni hramadzianina Japonii.
Nahadajem, pavodle infarmacyi Supolnaści čyhunačnikaŭ Biełarusi, ranicaj 1 śniežnia na stancyi «Kalinkavičy Zachodnija» mašynist zaŭvažyŭ čałavieka, jaki zdymaje puciepravod. Rabotniki vajenizavanaj achovy sumiesna z supracoŭnikami RAUS zatrymali mužčynu — hramadzianina Japonii. Jaho proźvišča na dadzieny momant nieviadoma. Paźniej u ŚMI paviedamlałasia, što heta moža być treveł-błohier, aŭtar błohu «Eteru», jaki padarožničaŭ pa śviecie i raspaviadaŭ ab miascovym transparcie i infrastruktury. U apisańni błoha paznačana, što «Eteru» zachaplajecca japonskaj poštaj i čyhunkami za miažoj.
Što pišuć japonskija vydańni?
Advakat Kien Sibata adznačaje, što ciapier japonskaje hramadstva zasiarodžana na losie zatrymanych u Biełarusi japoncaŭ.
Paśla taho, jak stała viadoma ab aryšcie Nakanisi, japonskija ŚMI adrazu pačali paviedamlać pra heta. Naprykład, adna ź japonskich bujnych haziet Sankei shimbun paviedamiła ab jaho aryšcie z takim zahałoŭkam: «Zatrymany ŭ Biełarusi japoniec skazaŭ «Ja škaduju» na dziaržaŭnym tielebačańni. Ale nieviadoma, ci heta praŭda».
Na nastupny dzień hałoŭny sakratar kabinieta ministraŭ Japonii Chajasi Josimasa zajaviŭ u NHK:
«My nieadkładna vykazali pratest biełaruskamu ministerstvu zamiežnych spraŭ Respubliki Biełaruś. U lubym vypadku, urad akaža maksimalnuju padtrymku z punktu hledžańnia abarony japonskaha hramadzianina».
Šmat sumnievaŭ vyklikaje prapahandyscki siužet pra «złačynstva» japonca ŭ Biełarusi, adznačaje advakat. Naprykład, na telebačańni pakazali ŭ jakaści dokazaŭ uryŭki ź japonskaj sacsietki LINE, u jakich Nakanisi i jaho znajomy na japonskaj movie pierapisvalisia.
Jany razmaŭlali ab pierśpiektyvach biznesu ŭ Biełarusi. Ale na telebačańni pakazali pamyłkovy ci sfabrykavany pierakład uryŭka na rasijskuju movu, jaki zusim nie adpaviadaje aryhinalnamu tekstu pa-japonsku.
Heta śćviardžała 4 kastryčnika ŭ tym liku najbujniejšaja japonskaja hazieta Yomiuri Shimbun:
«Pierakłady ŭryŭka z LINE, jakija pakazali na telebačańni ŭ jakaści dokazaŭ taho, što Nakanisi daŭ infarmacyju «kurataru», byli sfabrykavanyja. Naprykład, fraza na japonskaj movie «Kampanii składana pačać biznes u Biełarusi» była pierakładzienaja jak «U lubym vypadku Ukraina stała maryjanietkaj ZŠA».
Hramadzianin Japonii, brat byłoj žonki Nakanisi, jakoha nazvali «kurataram» na biełaruskim TB, adkazaŭ 19 vieraśnia ŭ intervju Daily Shincho nastupnym čynam:
«Ni jak kampanija, ni jak pryvatnaja asoba ja nie źviazany sa śpiecsłužbami, jak śćviardžajuć ŭłady Respubliki Biełaruś. I ŭvohule nie maju da ich nijakaha dačynieńnia». «Ja dumaju, što jon prosta fatahrafavaŭ u jakaści chobi. Viedaju, što spadar Nakanisi nie taki čałaviek, jaki zajmajecca špijanažam. Jon sapraŭdy zvyčajny čałaviek».
U japonskich vydańniach taksama pisali pra pačatak suda nad Nakanisi.
Niadaŭna ŭ japonskaj presie źjavilisia paviedamleńni ab aryšcie jašče adnaho hramadzianina Japonii ŭ Biełarusi, ale da hetaha času nie paviedamlajecca jaho proźvišča.
Kamientary
...
...sulimaja rukovodstvom BŽD nahrada «za hołovu» vyjavlennoho hipotietičieskoho «špiona» ili «diviersanta».
Vierojatno, ischodia i iz tieorietičieskoj vozmožnosti połučienija podobnoho dieniežnoho voznahraždienija, mašinist TČ-11 Rad́ko N.M., śledovavšij v eti sutki s pojezdom №6091, obratił vnimanije na na japonskoho lubitiela zapiečatleť industrialnyje piejzaži…" (belzhd.live)
Nie źnikajuć zdradniki siarod zvyčajnych biełarusaŭ (nie karnikaŭ).
I toje, navat nie partyzana łaviŭ, a niavinnaha čałavieka.