Samalot rasijskaj avijakampanii złamaŭsia padčas rejsa. Jon taki ŭžo čaćviorty z pačatku hoda
U maskoŭskim aeraporcie «Unukava» ekstranna pryziamliŭsia samalot rasijskaj avijakampanii UTair, jaki vykonvaŭ rejs Maskva — Dubaj. Heta druhi padobny vypadak z bartami UTair za adzin tydzień i ŭžo čaćviortaja pałomka łajnieraŭ rasijskich avijakampanij z pačatku 2025 hoda, piša The Moscow Times.
Jak raskazali ŭ avijakampanii UTair, pryčynaj ekstrannaha viartańnia samalota stała «źmiena ŭzroŭniu hidraŭličnaj vadkaści».
Pavodle danych servisu Flightradar24, bort raźviarnuŭsia ŭ rajonie Baku i nakiravaŭsia nazad u Maskvu. Na im znachodzilisia 240 pasažyraŭ, nichto ź ich nie paciarpieŭ.
Dahetul z pačatku hoda, jaki tolki pačaŭsia, z rasijskimi samalotami ŭžo byli zafiksavanyja try padobnyja vypadki.
7 studzienia łajnier Boeing 737 avijakampanii UTair, jaki lacieŭ z Sankt-Pieciarburha ŭ Samarkand, taksama byŭ vymušany pryziamlicca ŭ aeraporcie «Unukava» z-za niaspraŭnaści. A 4 studzienia adrazu dva rasijskija samaloty sutyknulisia z techničnymi prablemami padčas rejsaŭ: Airbus A321neo avijakampanii «Uralskija avijalinii», jaki vykonvaŭ rejs z Šarm-al-Šejcha ŭ Jekaciarynburh, viarnuŭsia ŭ aeraport vyletu; Boeing 737 avijakampanii NordStar, jaki ruchaŭsia maršrutam Vałhahrad — Jekaciarynburh, taksama byŭ vymušany pierapynić palot.
Paśla rasijskaha ŭvarvańnia va Ukrainu ŭ 2022 hodzie zachodnija krainy ŭzmacnili sankcyjny cisk na Rasiju, jaki ŭ značnaj stupieni zakranuŭ avijacyjnuju halinu. Da kanca 2024 hoda kolkaść avijacyjnych zdareńniaŭ u Rasii dasiahnuła antyrekordu: za 11 miesiacaŭ było zafiksavana 208 avijacyjnych zdareńniaŭ, što na 30% bolš, čym za anałahičny pieryjad 2023 hoda. Heta samy vysoki pakazčyk za apošnija šeść hadoŭ.
Ciapier čytajuć
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła44
Kamientary