Jak Biełarusi vyjści z zastoju i dasiahnuć ekanamičnaha rostu? Tłumačyć Daniejka

Novyja vykliki

Pa słovach Daniejki, pierachod da infarmacyjnaha hramadstva, jaki ciapier adbyvajecca va ŭsim śviecie, pryvodzić da značnaj źmieny sistemy kaštoŭnaściej i hałoŭnych dziejučych asob.

«My pierachodzim ciapier u inšy śviet, dzie indyvidualnyja kaštoŭnaści i tvaja zdolnaść farmiravać svaju sacyjalnuju budučyniu, tvaja asabistaja adkaznaść stanovicca bolš značnaj. I tady ŭsie sacyjalistyčnyja štuki pra roŭnaść, pra abaronu mienšaściaŭ hublajuć toj sens, jaki byŭ.

Čamu? Tamu što ŭsie hetyja elemienty «my supraćstaim kapitalizmu», «abaronim tych niaščasnych, jakich hety kapitał…». A tut vy ŭsie roŭnyja ŭ novym śviecie. Heta vaša zadača — vyrašać usio. (…) Supraćstajańnie kapitał-praletaryjat źnikła».

«My idziom u śviet, dzie sacyjalnaja adaptacyja budzie značna bolš vysokaj», —

zaŭvažaje Daniejka i źviartaje ŭvahu, što ŭ ZŠA dola fryłansieraŭ składaje 40%. Tamu čałaviek pavinien być hatovy mianiać svaju prafiesiju, asvojvać novyja navyki i adaptavacca da źmieny ŭmoŭ pracy.

Ekanamist davodzić, što ŭ budučym paśpiachovymi buduć tyja ludzi i hramadstvy, jakija zmohuć chutka reahavać na źmieny, pieravučvacca, asvojvać novyja technałohii i brać na siabie adkaznaść za svaju budučyniu.

Treba budzie navučycca demakratyi 

U toj ža čas pośpiech zaležyć i ad palityčnaj sistemy. «Jak historyja pakazvaje, redka-redka aŭtarytarnyja lidary schoplivajuć niešta novaje. Zvyčajna jany naadvarot zakansiervujuć», — zaŭvažaje Daniejka.

Adnak i pry demakratyi nieabchodny čas, kab hramadstva zrazumieła nieabchodnaść pieramien. Dla Biełaruś sam pierachod da demakratyi — doŭhi praces.

«Treba budzie navučycca demakratyi», — havoryć ekanamist i zaŭvažaje, što, na jaho pohlad, na heta spatrebicca kala 25 hadoŭ.

Jon pryvodzić u prykład Polšču, jakaja prademanstravała, što ekanamičnyja pieraŭtvareńni mohuć być paśpiachovymi, kali abapiracca na mały i siaredni biznes i ŭstojlivuju palityčnuju sistemu.

Pavialičyć

«Heta kraina, u jakoj 70% VUP zhienieravanyja małym i siarednim biznesam. U Hiermanii — 45% (…) Čym vyšejšy uzrovień pradprymalnictva ŭ krainie, tym vyšejšy adaptacyjny patencyjał», —

tłumačyć analityk i zaŭvažaje, što na šlachu da demakratyi biełarusam nieabchodna raźvivać mižhrupavuju dynamiku.

«U mianie zaŭsiody vyklikaje pytańnie niazdolnaść biełarusaŭ da mižhrupavoj dynamiki, da dyjałohu. My adzinaja kraina — moža, niešta źmianiłasia — u Centralna-Uschodniaj Jeŭropie, dzie nie ŭźnikła nivodnaj zakupačnaj asacyjacyi (na ŭzroŭni krainy — NN). (…) Tamu ŭ bližejšyja 10 hadoŭ budzie narmalny praces pabudovy navyku hrupavoj dynamiki i dyjałohu».

Daniejka zapeŭnivaje, što kali ŭ Biełarusi budzie adkrytaje hramadstva, to reformy pryviaduć da adnaŭleńnia dynamiki ekanomiki, jakaja prykładna z 2012 hoda spyniłasia ŭ roście. Chacia ŭ krainie jość dobry patencyjał.

Patencyjał Biełarusi

Na acenkach Daniejki 60% VUP krainy prypadaje na pryvatny siektar pry tym, što ŭ krainie tak i nie była praviedziena pryvatyzacyja.

«Biełarusy na 15-m miescy ŭ śviecie pa svaich ekanamičnych kaštoŭnaściach — luboŭ da pryvatnaha biznesu, hatoŭnaść zajmacca pradprymalnictvam i hetak dalej.

Uzrovień davieru [biznesu] u nas niedzie 45%. (…) U skandynavaŭ — 60-70%, u niemcaŭ — 40%. To-bok my majem siaredniejeŭrapiejski ŭzrovień, a vakoł nas krainy sa značna nižejšym uzroŭniem. (…) U nas jašče i z mazhami narmalna. My, naprykład, pa rejtynhu IQ (…) znachodzimsia ŭ 20-cy.

A potym jość jašče cikavyja statystyčnyja danyja. Kali my biarom uzrovień technałahičnaha pradprymalnictva, intensiŭnaść, my 20-ja ŭ śviecie, a pierad nami ZŠA, Sinhapur — heta značyć, tolki raźvityja krainy», — davodzić analityk i vykazvaje ŭpeŭnienaść, što sakret takich dobrych pakazčykaŭ kryjecca ŭ mientalitecie biełarusaŭ:

«Heta biełaruskaja mientalnaść. Ja časta havaru, što biełarusy vielmi padobnyja da jaŭrejaŭ. Čamu? Tamu što ŭvieś čas žyli pad čužym presam i navučylisia adaptavacca».

• 6
• 0
• 0
• 3
• 1
• 0
• 0
• 0