U Mahilovie vysiekuć achoŭnuju častku Piačerskaha lesaparku, kab pabudavać carkvu

Na hramadskaje abmierkavańnie vyniesiena architekturna-płanirovačnaja kancepcyja chrama Dabravieščańnia Najśviaciejšaj Baharodzicy pa vulicy Jakuboŭskaha ŭ Mahilovie.

Chramavy kompleks, jaki prajektujecca miascovaj firmaj «Kansałtynh-bud», płanujuć raźmiaścić na rahu vulicy i biezymiennaha prajezda.

Kompleks budzie ŭklučać chram Dabravieščańnia Najśviaciejšaj Baharodzicy, dom kliru, haspadarčy błok, ratondu i dziciačuju placoŭku. Chram raźmieščany z ulikam aryjentacyi ałtara na ŭschod i patreby pravodzić chrosny chod u čas carkoŭnych śviataŭ. Pobač, za aharodžaj kompleksu, praduhledžana parkoŭka dla viernikaŭ. 

Pavialičyć

Pavialičyć

Na dumku aŭtaraŭ prajekta, kompleks pryciahnie patoki viernikaŭ i turystaŭ. Ale miarkujučy pa prapracavanaści samoj carkvy na stadyi kancepcyi — na fasadach navat prastaŭleny markiery vyšyniaŭ z dakładnaściu da milimietraŭ, — heta paŭtor užo niejkaha realizavanaha prajekta, a turystyčnaja pryciahalnaść typavoj carkvy sumniŭnaja.

Pavialičyć

Pavialičyć

Samaje hałoŭnaje, što carkvu płanujuć pabudavać na terytoryi Piačerskaha lesaparku sa znosam drevaŭ na vialikaj płoščy, jakuju zajmaje chramavy kompleks. Pra heta ŭ hramadskim abmierkavańni ŭvohule niama ni słova. Adznačajecca tolki, što azielanieńnie kompleksu budzie składać nie mienš za 15% jaho płoščy, jak taho patrabujuć budaŭničyja normy. 

Piačerski lesapark — bujny pryrodny kompleks u paŭnočna-zachodniaj častcy horada, padzieleny vulicaj Jakuboŭskaha napałam. Praz adsutnaść u horadzie jakich-niebudź dobraŭparadkavanych parkaŭ Piačerski lesapark słužyŭ adzinym miescam adpačynku dla ŭsich žycharoŭ Mahilova až da źjaŭleńnia ŭ niadaŭnim časie parku Padmikolle. Siońnia jaho rekreacyjnaja rola nie mienšaja.

U vieraśni 2021 hoda Mahiloŭski harvykankam pryniaŭ rašeńnie stvaryć na terytoryi Piačerskaha lesaparku płoščaj u 256,3 ha zakaźnik «Piačerski», čaho doŭhi čas dabivalisia miascovyja ekaaktyvisty.

Pavialičyć

Astatniaja častka lesaparku, u tym liku i tam, dzie chočuć pabudavać carkvu, ŭvajšła ŭ achoŭnuju zonu zakaźnika. U achoŭnaj zonie nie zabaroniena budaŭnictva, ale zabaroniena vysiečka drevaŭ — duba čareščataha, buka, klona vastralistaha, viaza (ilma, bierasta), jasienia zvyčajnaha, lipy, duhłasii (psieŭdatsuhi).

Praŭda, u 2023 hodzie miežy zakaźnika ŭžo źmianiali, kab vysiekčy častku lesaparku pad budaŭnictva novaha korpusa balnicy, ale ŭ miescy, dzie moža paŭstać carkva, miežy achoŭnaj zony zastalisia raniejšymi.

U kancepcyi ž, vyniesienaj na abmierkavańnie, niama nijakaha taksanamičnaha płana, jaki b paćviardžaŭ, što nivodnaje ź pieraličanych drevaŭ nie budzie źniščana pry budaŭnictvie carkvy.

Pavialičyć

Pavialičyć

Vidać, zakazčyki i miascovyja ŭłady chočuć, kab takaja adčuvalnaja infarmacyja nie była zaŭvažana haradžanami, a paśla, kali hramadskaje abmierkavańnie budzie paśpiachova zavieršana, i prajekt budzie zaćvierdžany bieź istotnych zaŭvah, źmianić hranicy achoŭnaj zony pad patreby prychoda.

Zhodna z vynikami respublikanskaha sacyjałahičnaha apytańnia, praviedzienaha ŭ lipieni 2024 hoda, tolki 55,6% biełarusaŭ vierać u Boha. Apošni pierapis nasielnictva taksama pakazaŭ, što Mahiloŭ staŭ adzinym siarod abłasnych centraŭ, dzie za apošniaje dziesiacihodździe skaraciłasia kolkaść žycharoŭ. Tym nie mienš u Mahilovie, jak i ŭ inšych haradach krainy, masava ŭzvodziacca pravasłaŭnyja chramy — pryčym niaredka na najbolš pryvabnych učastkach, u tym liku za košt parkaŭ i skvieraŭ, miescaŭ adpačynku haradžan niezaležna ad vieravyznańnia.

Hramadskaje abmierkavańnie prachodzić z 25 krasavika pa 9 maja 2025 h. Udzielniki hramadskaha abmierkavańnia majuć prava nakiroŭvać arhanizataru piśmovyja ci elektronnyja zaŭvahi i prapanovy (adras: 212030 h. Mahiloŭ, vuł. Pieršamajskaja, 28a, kab. 315; je-mail: [email protected]).

• 0
• 5
• 1
• 1
• 0
• 0
• 13
• 0