Ryełtarski biznes «narmalizujuć». Ekśpiertka raskazała, čaho čakać
Eśpiertka ŭ nieruchomaści Natalla Litoŭskaja ŭ svaim kanale raspaviała pra pieramieny, jakija čakajuć ryełtarskuju śfieru. Jana bačyć šmat plusaŭ u budučych navacyjach, ale i vielmi «toŭsty minus».
«Tolki zusim niaŭvažlivyja prapuścili navacyi ŭ zakanadaŭstvie, što ŭstupajuć u siłu, jakija prybirajuć ahientaŭ jak kłas, ab pieraatestacyi ryełtaraŭ, ab stvareńni pałaty ryełtaraŭ, nie čuli pra zatrymańni ŭ ahienctvach nieruchomaści, rehistrataraŭ, nataryusaŭ. Udavacca ŭ padrabiaznaści nichto nie śpiašajecca», — piša Litoŭskaja.
Jana dadaje, što bolšaść u ahienctvach nie razumieje, jak usio budzie vyhladać, kali pracesy zavieršacca, a novaje zakanadaŭstva ŭstupić u siłu. Jana padzialiłasia svaim bačańniem śfiery «praz hod-paŭtara», heta bačańnie, piša jana, sfarmavałasia paśla hutarak z udzielnikami rynku.
U Minsku z bolš čym 100 ahienctvaŭ nieruchomaści — zastaniecca maksimum try dziasiatki.
U ahienctvach nieruchomaści buduć pracavać tolki atestavanyja členy pałaty ryełtaraŭ, to-bok «vielmi mocna pravieranyja (z prafiesijnaj i ideałahičnaj punktu hledžańnia) ryełtary».
Taksama jany buduć vielmi mocna zahružanyja pracaj, bo na ryełtary budzie nie tolki pravierka dakumientaŭ, składańnie dahavoraŭ, a naohuł poŭny cykł — ad pieramovaŭ z patencyjalnymi klijentami da pakazu kvater.
Pry takoj zahruzcy śpiecyjalistu chopić i tych klijentaŭ, chto sam pryjdzie ŭ ahienctva, šukać novych nie pryjdziecca.
Pakupnik kvatery, prodažam jakoj zajmajecca ahienctva, atrymaje kompleks pasłuh biaspłatna. I ździełka budzie zastrachavanaja, bo ŭ pradaŭca jość damova z ahienctvam, a ŭžo ciapier strachavańnie adkaznaści ahienctva raspaŭsiudžvajecca na abodva baki ździełki.
Mnohija hramadzianie znoŭ uspomniać, što ŭ nas možna samastojna i pradać, i kupić kvateru — sistema dziaržaŭnaj rehistracyi dazvalaje z hetym spravicca lubomu dziejazdolnamu hramadzianinu.
Kali pradaviec i pakupnik sustrelisia, ale nie ŭpeŭnienyja adzin u adnym — možna źviarnucca ŭ ahienctva za jurydyčnym supravadžeńniem. Kali źviartajecca pakupnik, pravierka kvatery i pradaŭca kaštuje kala 60 bazavych.
Dachody ŭ ahienctvaŭ nieruchomaści buduć prykmietna nižejšyja za ciapierašnija. Ale dziaržava naŭrad ci zaŭvažyć źnižeńnie adličeńniaŭ — prosta tamu, što nie budzie schavanych dachodaŭ i zarobkaŭ u kanviertach, ličyć ekśpiertka.
Uzrovień davieru da ryełtaraŭ istotna vyraście. I ŭ pradaŭcoŭ i ŭ pakupnikoŭ. Kvatera praz ahienctva stanie sinonimam čyścini ździełki, miarkuje jana.
«Toŭsty minus tolki adzin — sotni ludziej, jakija pa roznych pryčynach nie zmohuć stać ryełtarami ci nie projduć pieraatestacyju, vymušanyja buduć šukać pracu ŭ inšych śfierach. U tym liku i realnyja prafiesijanały», — piša Litoŭskaja.
Kamientary