Hłabalnaje paciapleńnie zrobić rasijskija padvodnyja łodki bolš niabačnymi
Pavodle novaha daśledavańnia, pa miery nahravańnia moraŭ mianiajucca pavodziny huku pad vadoj. U vyniku padvodnyja łodki stanie ciažej vyjavić. Vajenna-marskija siły krain apynucca ŭ novaj stratehičnaj realnaści.
Hałoŭny sposab vyjaŭleńnia padvodnych łodak u mory — heta huk. Zvyčajna dla hetaha vykarystoŭvajuć hidrałakatar, jaki analizuje hukavyja chvali i dazvalaje adsočvać ruch padvodnych łodak. Ale, jak piša The New York Times, novaje daśledavańnie, praviedzienaje ŭ Kaledžy abarony NATA ŭ Rymie, pakazała: klimatyčnyja źmieny mohuć istotna paŭpłyvać na mahčymaści vyjaŭleńnia submaryn.
Jašče da Druhoj suśvietnaj vajny vučonyja vyśvietlili, što huk, jaki chutka raspaŭsiudžvajecca ŭ ciopłaj vadzie, maje tendencyju adchileńnia ŭ bok bolš chałodnych vodnych płastoŭ, dzie jaho ruch stanovicca bolš pavolnym.
Jakija prahnozy?
Jak tłumačać daśledčyki, ciapier, kali pavierchnia akijana nahravajecca praz klimatyčnyja źmieny, hety efiekt uzmacniajecca. U dalejšym z rostam tempieratury pavierchnievych vod huk pačnie bolš rezka adchilacca ŭniz — u chaładniejšyja płasty. Tamu apieratary hidrałakataraŭ mohuć prosta nie pačuć šumy, jakija rehienieryrujucca padvodnymi łodkami.
Madeli, jakija vykarystoŭvali daśledčyki, paraŭnoŭvali raspaŭsiudžańnie hukavych chval u pieryjad z 1970 pa 1999 hod z prahnozam na 2070—2099. Atrymanyja vyniki ŭražvali.
Jak adznačajuć, aŭtary, u bolšaści abłaściej, jakija jany razhladali, prahnazujecca źnižeńnie dalnaści vyjaŭleńnia. Tak u Paŭnočnaj Atłantycy, dzie rasijskija padvodnyja łodki hulajuć u chovanki z NATA, radyus ich vyjaŭleńnia moža skaracicca amal udvaja. U zachodniaj častcy Cichaha akijana, dzie dziejničajuć amierykanskija i kitajskija submaryny, zona vyjaŭleńnia moža skaracicca na 20%.
Jakija nastupstvy?
Pavodle adnaho z aŭtaraŭ daśledavańnia, vajennaha technołaha Maura Džyli (Mauro Gilli), hety efiekt moža mieć važnyja stratehičnyja nastupstvy. Pa jaho słovach, takija krainy, jak Kitaj i Rasija, zmohuć raźmiaščać padłodki ŭ rajonach z najbolšaj klimatyčnaj źmienlivaściu.
Ekśpiert tłumačyć, što akramia hukavoha manitorynhu isnujuć i inšyja sposaby vyjaŭleńnia padvodnych łodak. Adzin ź ich — fiksacyja vielmi niaznačnych źmien u mahnitnym poli Ziamli, jakija ŭźnikajuć, kali mietaličnaja padłodka ruchajecca praz vadu
Prablema ŭ tym, što hetyja źmieny — nadzvyčaj słabyja, i ich možna zaŭvažyć tolki na nievialikaj adlehłaści ad abjekta.
«Kali vyjaŭleńnie padłodki stanie bolš składanym, to vajenna-marskija siły, jakija abaraniajucca, apynucca ŭ horšaj pazicyi», — adznačaje Džyli.
Mohuć być nastupstvy i z punktu hledžańnia jadziernaha strymlivańnia.
Padvodnyja łodki ź mižkantynientalnymi jadziernymi rakietami — adzin z klučavych elemientaŭ stratehičnaha strymlivańnia. Ich hałoŭnaja pieravaha — niaŭłoŭnaść. Kali ž klimatyčnyja źmieny robiać ich jašče mienš zaŭvažnymi, to pahroza, jakuju jany niasuć, robicca bolš realnaj, a značyć — bolš efiektyŭnaj u roli strymlivajučaha faktara.
Nie ŭsio tak prosta
Inšyja ekśpierty zaklikajuć nie pierabolšvać upłyŭ hłabalnaha paciapleńnia. Pavodle Toma Stefanika (Tom Stefanick) ź Instytuta Brukinhsa, apieratary padvodnych łodak pavinny ŭličvać šmat inšych faktaraŭ — ad šumu sudnachodstva da patreskvańnia arktyčnych ildoŭ. Tamu pry składańni doŭhaterminovych prahnozaŭ niemetazhodna kancentravać uvahu tolki na źmienie klimatu.
Akramia taho, u niekatorych rehijonach, naprykład u miełkavodździ Japonskaha mora, vyjaŭleńnie paŭnočnakarejskich padvodnych łodak moža navat stać praściejšym.
Hałoŭnaje, da čaho pryvodziać hetyja źmieny, — rost stratehičnaj niavyznačanaści. Pavodle Brajana Kłarka (Bryan Clark) ź Instytuta Chadsana, vajennym ciapier daviadziecca čaściej pravodzić zamiery, kab aktualizavać svaje madeli i źnizić vierahodnaść pamyłki i stratehičnych pralikaŭ.
Navukoŭcy, što supracoŭničajuć z NATA, papiaredžvajuć: klimatyčnyja źmieny ŭžo ciapier stvarajuć surjoznyja prablemy dla vajenna-marskich sił, i ŭ budučyni hetyja prablemy buduć tolki narastać.
Navukoŭcy, jakija pracujuć z NATA, papiaredžvajuć: klimatyčnyja źmieny stvarajuć usio bolš prablem dla vajennaha fłotu. Padymajecca ŭzrovień mora, razburajecca prybiarežnaja infrastruktura, bolš salonaja i kisłotnaja vada paskaraje znos karabloŭ, a masavaje razmnažeńnie mieduz pryviało da taho, što jany ŭsio čaściej zabivajuć sistemy achaładžeńnia i miechanizmy ruchavika, što pryvodzić da ich pierahrevu.
Usio heta śviedčyć pra toje, što vajenny fłot musić rychtavacca da novaj realnaści — dzie klimatyčnyja źmieny stanoviacca nie fonam, a pramym faktaram apieratyŭnaj dziejnaści.
Kamientary