Druhim, chto zabiŭ miadźviedzia ŭ Biełarusi, akazaŭsia adstaŭny vysokapastaŭleny milicyjant
Andrej Rusanovič jašče paru hadoŭ tamu byŭ namieśnikam načalnika minskaj milicyi, a da hetaha kiravaŭ milicyjaj u Salihorsku. Ciapier — handluje strelbami, maje ŭłasny biznes i paluje. Voś jak jon atrymaŭ prava palavać na miadźviedzia.
Andreju Rusanoviču 48 hadoŭ. Jon rodam ź Miadzieła. U 2000-m skončyŭ Akademiju MUS. Pačynaŭ śledčym u milicyi Zasłaŭja, z časam daros da načalnika kryminalnaj milicyi Minščyny i zvańnia padpałkoŭnika.
U 2014-m Rusanoviču dali zvańnie pałkoŭnika i pryznačyli kiraŭnikom RAUS Salihorskaha rajvykankama, u 2018-m kiravać milicyjaj Minskaha rajona. Nie paźniej za kaniec 2019-ha Rusanoviča pryznačyli namieśnikam načalnika HUUS Minharvykankama. Padobna, što z hetaj pasady jon i pajšaŭ na piensiju.
Zhodna sa źviestkami sa źlitych baz u adnym z rasijskich siervisaŭ, u listapadzie 2024 hoda były siłavik stvaryŭ biznes — firmu «ArkasBieł». Śfieraj dziejnaści paznačany «aptovy handal zierniem, nieapracavanym tytuniem, nasieńniem i karmami dla sielskahaspadarčych žyvioł».
Kali mierkavać pa kamientarach u telehramie i tym, jak Rusanovič padpisany ŭ telefonnych knihach inšych, jon handluje zbrojaj. Heta karabiny madeli Blaser R8 professional pad roznyja kalibry.
Ale prava palavać na miadźviedzia jon vyjhraŭ u konkursie, jaki pravodziła Biełaruskaja arhanizacyja palaŭničych i rybałovaŭ na čale ź Iharam Šunievičam. Videa z praviadzieńniem konkursa vykładzienaje ŭ instahramie arhanizacyi. Adznačym, što inšych hučnych pradstaŭnikoŭ siłavych viedamstvaŭ siarod pieramožcaŭ niama.
«Naša Niva» — bastyjon biełaruščyny
PADTRYMAĆPramova hetaha minskaha vypusknika na liniejcy ŭ 2020-m uzarvała internet. Što z chłopcam ciapier?3
Kamientary