«Paražeńnie polskaj dypłamatyi». Adsutnaść palakaŭ u Vašynhtonie pryviała da palityčnaha skandału ŭ Varšavie
U niadzielu, pierad sustrečaj Uładzimira Zialenskaha i jeŭrapiejskich lidaraŭ z Donaldam Trampam, krynicy ŭ administracyi prezidenta Polščy nieaficyjna pieradavali, što prezident Karal Naŭrocki taksama palacić u ZŠA. Ale ŭ dzień samitu jon usio ž zastaŭsia doma. Polskija palityčnyja ahladalniki ličać, što Naŭrockaha prosta nie zaprasili amierykancy, ale jaho asiarodździe i ŭrad pačali abvinavačvać adno adnaho, piša VVS.
U Polščy ŭžo niekalki dzion bušuje palityčny skandał vakoł pytańnia: jak tak zdaryłasia, što takaja ŭpłyvovaja ŭ Jeŭropie kraina nie ŭdzielničała ŭ važnaj dla biaśpieki rehijona padziei. Palityčny padzieł pamiž nieprymirymymi apanientami — uradam i prezidenckim atačeńniem — prajaviŭsia i tut, vyliŭšysia ŭ mora ŭzajemnych abvinavačvańniaŭ.
Karal Naŭrocki — niadaŭna abrany prezident Polščy ad pravakansiervatyŭnaj partyi «Prava i spraviadlivaść», jakaja šmat hadoŭ zmahajecca za ŭładu ź libieralnaj «Hramadzianskaj płatformaj».
Lidar apošniaj, Donald Tusk, uznačalvaje ŭrad Polščy i pravodzić prajeŭrapiejskuju palityku, u toj čas jak Naŭrocki robić staŭku na nacyjanalizm i kansiervatyŭny kurs.
Z momantu abrańnia Naŭrockaha isnavali aściarohi, što jon pasprabuje razvalić urad. Heta pakul nie zdaryłasia, ale ich kanflikt užo paŭpłyvaŭ na źniešniuju palityku Polščy. Naŭrocki navat vystupiŭ suprać ustupleńnia Ukrainy ŭ NATA.
Samit Trampa, Zialenskaha i jeŭrapiejskich lidaraŭ u Vašynhtonie byŭ inicyjavany na niadzielnaj anłajn-kanfierencyi «Kaalicyi rašučych» — hrupy lidaraŭ 33 krain, u tym liku Polščy, jakija padtrymlivajuć Ukrainu ŭ jaje baraćbie z rasijskaj ahresijaj. Tady vyrašyli, što sustreča ŭ Biełym domie projdzie ŭ tym ža farmacie, što i subotniaja videahutarka Trampa ź jeŭrapiejcami.
Polšču na joj pradstaŭlaŭ prezident Naŭrocki, tamu było b łahična, kab u Vašynhton pajechaŭ taksama jon. Akramia taho, udzieł Naŭrockaha, a nie premjera Tuska, razhladaŭsia jašče i tamu, što Naŭrocki, u adroźnieńnie ad Tuska, maje dobryja adnosiny z Trampam.
Suviaziami ŭ Vašynhtonie, jak piša Gazeta Wyborcza, palityki z «Prava i spraviadlivaści», źviazanaj z Naŭrockim, chvalilisia šmat hadoŭ. Pavodle vydańnia, niekalki ŭpłyvovych asob z atačeńnia Trampa dapamahli Naŭrockamu padčas jaho prezidenckaj kampanii patrapić u Avalny kabiniet i zaručycca padtrymkaj prezidenta ZŠA.
Ale niahledziačy na hetyja suviazi, u najvažniejšaj sustrečy, jakaja datyčycca miru va Ukrainie, Naŭrocki ŭdziełu nie pryniaŭ.
Dvuchbakovaja sustreča važniej za samit 18 žniŭnia?
Pres-sakratar prezidenta Naŭrockaha ŭ paniadziełak paviedamiŭ ahienctvu PAP, što prezident «nadaje pryjarytet padrychtoŭcy vizitu ŭ ZŠA 3 vieraśnia».
Heta zajava vyklikała chvalu krytyki z boku palitkamientataraŭ.
«Vy surjozna? Vy admovilisia ad histaryčnaj sustrečy, na jakoj moža być vypracavana baza (a moža, i cełaje pahadnieńnie) pa spynieńni ahniu va Ukrainie, što paŭpłyvaje i na biaśpieku Polščy, dziela niekalkich fota z Trampam? Dvuchbakovyja sustrečy ŭ Biełym domie — heta pieravažna pijar. A kanfierencyi lidaraŭ ZŠA i Jeŭropy — heta žorstkaja palityka, ad jakoj Naŭrocki admoviŭsia», — napisaŭ redaktar Gazeta Wyborcza Bartaš Vialinski.
Paźniej i sam prezident «supakoiŭ» palakaŭ, nahadaŭšy, što ŭ subotu ŭdzielničaŭ u razmovie z Trampam paśla jaho sustrečy z Pucinym na Alascy, a na jaho sustrečy z Trampam 3 vieraśnia pytańnie miru va Ukrainie budzie «adnym ź vielmi važnych punktaŭ».
Kamientujučy svaju adsutnaść na samicie ŭ Biełym domie, Naŭrocki skazaŭ, što ŭ kaalicyi Polšču pradstaŭlaje ŭrad, a jeŭrapiejskich lidaraŭ u Vašynhton zaprašaŭ Uładzimir Zialenski.
Ministr zamiežnych spraŭ Polščy Radasłaŭ Sikorski ŭ adkaz zajaviŭ, što ŭ Bieły dom zaprašaje prezident ZŠA.
«Chaču paviedamić, što na sustrečy ŭ Biełym domie zaprašaje prezident Złučanych Štataŭ, ź jakim pradstaŭniki ruchu MAGA i asabista prezident Karal Naŭrocki majuć pryvilejavanyja adnosiny. Prašu skarystacca imi na karyść Polščy i Jeŭropy», — napisaŭ Sikorski ŭ paniadziełak u X.
Adnak u administracyi prezidenta śćviardžajuć, što ŭdzieł polskaj delehacyi abmiarkoŭvaŭsia ŭ subotu i niadzielu padčas videakanfierencyj «Kaalicyi rašučych», dzie Polšču pradstaŭlali Tusk i Sikorski.
Sikorski adkazaŭ, što kancylaryja prezidenta atrymała padrabiazny dakład pra hetyja kanfierencyi i viedaje, što nijakaj «rehistracyi na sustreču» tam nie było.
Pres-sakratar urada Adam Šłapka zajaviŭ, što na sustrečach z prezidentam ZŠA Polšču ŭ pryncypie pavinien pradstaŭlać taksama prezident.
«Siońniašniaja sustreča ŭ Vašynhtonie prachodzić u tym ža farmacie, što i papiarednija anłajn-sustrečy jeŭrapiejskich lidaraŭ, u jakich udzielničaŭ prezident Tramp. Tam Polšču pradstaŭlaŭ prezident Karal Naŭrocki», — napisaŭ Šłapka ŭ paniadziełak u X.
Hety «dypłamatyčny pinh-ponh» padsumavaŭ žurnalist Michał Alšeŭski, napisaŭšy, što 18 žniŭnia stała «dniom vialikaha paražeńnia polskaj dypłamatyi», i što na samoj spravie nie maje značeńnia, čamu mienavita Naŭrockaha nie było na sustrečy ŭ Vašynhtonie.
«Horš za ŭsio toje, što heta — nie paražeńnie Naŭrockaha abo polskich pravych. Heta pravał abarony nacyjanalnych intaresaŭ Polščy. My chacieli być častkaj hrupy klučavych hulcoŭ, ale vyśvietliłasia, što za byłyja zasłuhi ŭ Bieły dom za stoł nie sadziać», — napisaŭ Alšeŭski ŭ Facebook.
Polšča — adna z klučavych sajuźnic Ukrainy. Akramia pramoj vajennaj dapamohi, Polšča zabiaśpiečvaje łahistyku pastavak bolšaści zbroi i techniki va Ukrainu.
Kamientary