Kibierpank pa-biełarusku: u 2026 hodzie vyjdzie hulnia Replaced, natchnionaja «Biehunom pa lazie»
Na najbujniejšaj hulniavoj vystavie Gamescom 2025 u niamieckim Kiolnie pakazali hałoŭnyja navinki industryi. Siarod ich — biełaruskaja kibierpankavaja hulnia Replaced.
Na vystavie, jakaja praciahvałasia z 20 pa 24 žniŭnia, hiejmieram pakazali takija navinki, jak Hollow Knight: Silksong, Warhammer 40,000: Dawn Of War IV, kitajskuju Black Myth: Wukong i inšyja — ekšeny pra siaredniaviečča, napaleonaŭskija vojny i budučyniu, kaśmičnyja pryhody i navat dysnejeŭskija žachi.
Siarod ich była i biełaruskaja kibierpankaŭskaja pryhoda Replaced ad Sad Cat Studios, studyi rodam ź Minska, jakaja ciapier bazujecca ŭ Hdańsku.
Suzasnavalnik studyi Ihar Hrycaj daŭ intervju vydańniu IGN i pakazaŭ novy ŭryvak hiejmpłeju. Pra Replaced raskazvaje biełaruski hiejmierski kanał «Rudzi».
Štučny intelekt u čałaviečym ciele
U Replaced treba budzie hulać za štučny intelekt R.E.A.C.H., jaki apynuŭsia ŭ ciele svajho stvaralnika. Hieroj traplaje ŭ Fieniks-Sici — horad u alternatyŭnaj Amierycy 1980-ch. Tut historyja pajšła inšym šlacham: u 1940-ja hady ZŠA skinuli bomby nie na Japoniju, a na siabie, što pryviało da vybuchovaha raźvićcia miedycyny i asabliva transpłantałohii.
U śviežym frahmiencie hiejmpłeju raspracoŭščyki pakazali zmročnyja piejzažy horada. Pa słovach Hrycaja, Replaced padymaje pytańni pra toje, što značyć być čałaviekam. Śviet i piersanažy prapisany padrabiazna i raskryvajucca praz pradmiety, dyjałohi i detali asiarodździa.
Natchnialisia «Betmienam» i «Biehunom pa lazie»
Kamanda brała za asnovu bajavuju sistemu sieryi Batman: Arkham. U kino natchnieńniem stali «Biahun pa lazie 2049» (Blade Runner 2049) Deni Vilniova i «Aphrejd» (Upgrade) Li Uoneła — ideja hulni źjaviłasia jašče ŭ 2018-m, kali hetyja filmy tolki vyjšli.
Asobna ŭ Sad Cat adznačajuć ekśpierymienty z kamieraj: kab kat-sceny i hiejmpłej pierachodzili adzin u adzin biez švoŭ, patrabujecca składanaja techničnaja praca.
Pa słovach Hrycaja, damahčysia žadanaha vyniku davoli składana, bo Replaced nie padobna na tradycyjny film abo videahulniu, chacia niekatoryja idei studyja spakojna zapazyčvaje ŭ dobrych prykładaŭ u hulniavoj industryi.
Doŭhi šlach da relizu
Prajekt byŭ abvieščany jašče ŭ 2021 hodzie. Za hety čas daty reliza nieadnarazova pieranosilisia.
Adnak ciapier situacyja źmianiłasia: asnoŭnaja častka raspracoŭki zavieršana, mnohija łakacyi pierapracavany całkam, dla hałoŭnaha hieroja stvorana sotni novych animacyj.
Replaced rychtujecca da vychadu na kampjutarach i prystaŭkach Xbox Series X|S. Pa apošniaj infarmacyi, reliz zapłanavany na viasnu 2026 hoda, i ciapier heta ŭžo kančatkova.
Siarod dastupnych moŭ budzie i biełaruskaja.
«Viadoma, što padobnyja prajekty ad biełaruskich raspracoŭščykaŭ, jakija taksama šanujuć i dadajuć biełaruskuju movu, my padtrymlivajem z usioj mocy. Ale varta adznačyć, što heta toj prykład, kali sprava navat nie ŭ hetym, a što prajekt sapraŭdy vyhladaje vielmi ambicyjna i šmatabiacajuča», — adznačaje błohier Rudzi.
-
Pamior ukrainski mastak burackaha pachodžańnia, što stvaryŭ kultavyja multfilmy «Vostraŭ skarbaŭ» i «Pryhody kapitana Urunhiela»
-
Fanaty Tejłar Śvift hadajuć, što značyć kniha pra Šahała, Maleviča i Lisickaha, zaŭvažanaja ŭ anonsie da jaje novaha alboma
-
«Volnyja Kupałaŭcy» pierapracavali bazu danosaŭ u pjesu. Što jašče pakažuć u novym siezonie
Ciapier čytajuć
«Z tatam vyrašyli: naśpieŭ čas vučycca pa-biełarusku». Žančyna raskazała, jak u 80-ja hady jeździła za 20 kiłamietraŭ ad Minska dziela adukacyi na rodnaj movie11
Kamientary