Nazvanyja 13 rasijskich kamandziraŭ, datyčnych da złačynstvaŭ u Bučy
Brytanskaja hazieta The Sunday Times apublikavała imiony 13 rasijskich kamandziraŭ, datyčnych da katavańniaŭ, zabojstvaŭ i rabavańniaŭ u Bučy. Piać z hetych proźviščaŭ prahučali ŭpieršyniu.
Asoby kamandziraŭ byli ŭstanoŭlenyja niezaležnymi jurystami i śledčymi, z dapamohaj raźviedvalnych źviestak z adkrytych krynic. Usie 13 čałaviek byli paćvierdžanyja ŭkrainskimi pravaachoŭnikami.
Voś novyja imiony:
- hienierał-major Vadzim Pańkoŭ — miarkujecca, što jon zahadaŭ zabić 30 miascovych žycharoŭ i prymusiŭ inšych žycharoŭ Bučy prybirać cieły zahinułych rasijskich sałdat. Jon kamandavaŭ 45‑j bryhadaj VDV, jakaja ŭdzielničała ŭ šturmie aeraporta ŭ Hastomieli;
- hienierał-pałkoŭnik Valeryj Saładčuk — jon kamandavaŭ padraździaleńniami 36‑j armii, čyje vajskoŭcy datyčny da złačynstvaŭ u Bučy;
- pałkoŭnik Juryj Miadźviedzieŭ — jaho padnačalenyja ździejśnili bolš za 40 zhvałtavańniaŭ, a sam jon, jak śćviardžaje vydańnie, byŭ zabity ŭzbuntavaŭšymisia rasijskimi vajskoŭcami ŭ 2022-m;
- pałkoŭnik Andrej Kondraŭ — kamandzir 5‑j tankavaj bryhady;
- pałkoŭnik Siarhiej Karasioŭ — u Irpieni zastreliŭ žychara, vybiŭ prykładam pistaleta zuby žančynie.
Vosiem aficeraŭ raniej byli viadomyja, im hienprakuratura Ukrainy ŭžo vystaviła abvinavačańni. Adzin ź ich — hienierał-pałkoŭnik Alaksandr Čajko, kamandujučy Uschodniaj vajennaj akruhaj u pačatku vajny. Jon addavaŭ zahady pra začystki, a raniej kamandavaŭ rasijskimi vojskami ŭ Siryi. Taksama heta hienierał-major Siarhiej Čubarykin — kamandzir 76‑j hvardziejskaj pavietrana-desantnaj dyvizii. Ličycca, što sałdaty pad jaho kamandavańniem ździejśnili bolšaść vajennych złačynstvaŭ u Bučy.
Astatnija šeść — hienierał-pałkoŭnik Alaksandr Sančyk, pałkoŭnik Azatbiek Amurbiekaŭ, pałkoŭnik Arciom Haradziłaŭ, padpałkoŭnik Dzianis Suvoraŭ, pałkoŭnik Alaksiej Tałmačoŭ, hienierał-major Uładzimir Sieliviorstaŭ.
Pad supolnym kamandavańniem hetych 13 kamandziraŭ bolš za 80 sałdat užo byli aficyjna identyfikavanyja jak padazravanyja ŭ złačynstvach u Bučy.
Ciapier čytajuć
«Ja bolš nie anarchist». Mikoła Dziadok — pra turmu, Boha i rasčaravańnie ŭ ideałohijach25
Kamientary
[Zredahavana]