MZS pra źnikłuju ŭ Mjanmie Vieru Kraŭcovu: Dakumienty ab śmierci padroblenyja

Na momant źniknieńnia minčancy Viery Kraŭcovaj było 26 hadoŭ, jana pracavała madellu, lubiła padarožničać i, sa słoŭ jaje znajomych, była čałaviekam śvietu.

Niezadoŭha da adjezdu ŭ Aziju dziaŭčyna, jak raskazvała jaje babula Natalla, «z usimi asabista raźvitałasia», i z taho času siamja jaje bolš nie bačyła. Zhodna z aficyjnymi danymi, 20 vieraśnia Kraŭcova vylecieła ŭ Mjanmu z Tajłanda.

Apošni raz jana vychodziła na suviaź ź blizkimi 4 kastryčnika. Praź niekalki dzion u rasijskich ŚMI, biez spasyłak na jakija-niebudź aficyjnyja krynicy, pačała raspaŭsiudžvacca infarmacyja pra toje, što biełaruska stała achviaraj machlarskaha centra ŭ Mjanmie i była žorstka zabita.

15 kastryčnika MZS Biełarusi paćvierdziŭ infarmacyju pra źniknieńnie Viery Kraŭcovaj i padkreśliŭ, što «viaducca pošuki źnikłaj biełaruskaj».

U aŭtorak, 21 kastryčnika, ułady Tajłanda paviedamili, što dziaŭčynu sapraŭdy šukajuć i što jana vylecieła ŭ Mjanmu dobraachvotna. Mihracyjnaja słužba krainy abnarodavała kadry ź Vieraj u tajłandskim aeraporcie.

U čaćvier, 23 kastryčnika, z žurnalistami pahavaryła babula Viery Natalla, jakaja raskazała, što ŭ siamji niama nijakich paćviardžeńniaŭ taho, što dziaŭčyna zahinuła.

Da hetaha ŭ šerahu ŚMI pakazali niejki dakumient, u jakim na zamiežnaj movie havaryłasia pra śmierć biełaruski nibyta ad sardečnaha prystupu. Babula ž nastojvała: nijakich piśmovych paviedamleńniaŭ ab hibieli dziaŭčyny blizkija nie atrymlivali.

U toj ža čas u redakcyju pastupiła infarmacyja pra toje, što 13 kastryčnika siabry Viery nibyta płanavali sabracca ŭ adnoj z ustanoŭ na Zybickaj na «viečar pamiaci pra Vieru». 

«Kali ŭ kaho-niebudź jość fatahrafii Viery abo ź Vieraj, prynosicie razdrukavanyja — my stvorym albom i addadzim jaje mamie. Budziem skidvacca na arhanizacyju paminak pa 50—100 rubloŭ pa fakcie na samich paminkach», — havaryłasia ŭ paviedamleńni.

Žurnalistam udałosia pahavaryć z adnym z barmenaŭ mierkavanaj ustanovy. Jon paznaŭ pa fota Kraŭcovu i skazaŭ, što ŭ mai, kali adkryłasia ŭstanova, jana prychodziła ŭładkoŭvacca na pracu, ale jaje nie ŭchvalili.

U svaju čarhu ŭładalnica ŭstanovy, jakaja, pa jaje pryznańni, była dobra znajomaja ź Vieraj, abvierhła infarmacyju pra jaje niaŭdałaje pracaŭładkavańnie. Taksama ŭładalnica admoviłasia kamientavać infarmacyju pra toje, byŭ «viečar pamiaci» ci nie. 13 kastryčnika ŭstanova, pra jakuju išła havorka ŭ paviedamleńni, aficyjna ŭžo nie pracavała. Zaraz na jaje miescy adkryŭsia inšy bar.

Babula: Nie viedajem, kudy jechać i što rabić

Praz amal miesiac žurnalisty Online.by znoŭ źviazalisia z babulaj Viery (z baćkami pakul nie ŭdałosia vyjści na suviaź). Natalla raskazała, što siamja da hetaha času nie viedaje, što nasamreč adbyłosia ź Vieraj.

— My ničoha kankretna nie viedajem, čytajem tolki toje, što pišuć. Nie viedajem, kudy jechać, što rabić. Usiudy cišynia, — kaža emacyjna babula.

— Vy vierycie ŭ toje, što ź Vieraj usio ž niešta zdaryłasia?

Pavialičyć

— Ale tady dzie jana stolki času?! My ničoha nie viedajem: zabili, atrucili abo sama… Ale sama — heta vyklučana. Jana siabroŭcy svajoj z Maskvy skazała: «Ja, zdajecca, trapiła». Ale što tam adbyłosia — nie zrazumieła. Nam nichto ničoha aficyjna nie raskazvaje. Heta naša prablema, heta dla nas jana darahaja, samy lubimy čałaviečak… Nam treba tolki adno: damahčysia, kab addali jaje prach. Nam skazali, što jość tolki prach i urna. Ale dzie hetaja urna? Kudy nam za joj jechać? Ola (mama dziaŭčyny) kožny dzień płača…

MZS: Aficyjnaha paćviardžeńnia śmierci niama

Žurnalisty źviarnulisia ŭ MZS z prośbaj raskazać, na jakim etapie ciapier znachodziacca pošuki Viery Kraŭcovaj. Voś što adkazali:

— U suviazi z paviedamleńniami, što źjaŭlajucca ŭ ŚMI i sacyjalnych sietkach pa situacyi sa źniknieńniem hramadzianki Respubliki Biełaruś u Mjanmie, Ministerstva zamiežnych spraŭ ličyć važnym adznačyć nastupnaje. Zaraz mjanmanskija kampietentnyja orhany praciahvajuć rasśledavańnie abstavin źniknieńnia. Prymajucca surjoznyja miery dla ŭstanaŭleńnia ŭsich detalaŭ taho, što adbyłosia, a taksama zatrymanyja asoby, jakija mohuć być datyčnyja da dadzienaha incydentu. Biełaruskija dypłamaty padtrymlivajuć pastajanny kantakt z pravaachoŭnymi orhanami Mjanmy i akazvajuć usio nieabchodnaje sadziejničańnie ŭ ramkach svaich paŭnamoctvaŭ.

U viedamstvie padkreślili, što aficyjnaha paćviardžeńnia śmierci «hramadzianki Respubliki Biełaruś na dadzieny momant niama».

— Dakumienty, raniej raspaŭsiudžanyja ŭ presie i pieradadzienyja svajakam, źjaŭlajucca padroblenymi, što paćvierdžana praviedzienaj aficyjnaj ekśpiertyzaj, — raskazali ŭ MZS i dadali, što pra chod rasśledavańnia svajaki dziaŭčyny infarmujucca svoječasova.

• 0
• 0
• 0
• 6
• 0
• 10
• 0
• 0