Dzieci, začatyja zimoj, mohuć mieć pažyćciovuju abaronu ad lišniaj vahi

Zvyčajna pachudzieńnie tłumačać prostaj formułaj: treba spalvać bolš kałoryj, čym spažyvać. Ale čałaviečy arhanizm — nie miechaničnaja sistema, i enierhietyčny abmien u kožnaha adbyvajecca pa-svojmu. Jak adznačaje FitBook.de, my možam dakładna nazvać faktary ŭpłyvu, adnak da ich, vierahodna, treba dadać jašče adzin.

Akramia masy cieła, uzrostu i połu, asablivaściej stravavańnia i zasvajeńnia ježy, a taksama fizičnaj aktyŭnaści, rolu moža adyhryvać i toje, ci mierźli našy baćki pierad tym, jak nas začać. Daśledčyki ź Japonii śćviardžajuć: chałodny klimat u tydni pierad začaćciem moža zabiaśpiečyć naščadkam efiektyŭnaje spalvańnie tłušču na ŭsio žyćcio.

Što vyvučali daśledčyki

Maštabnaje daśledavańnie, vyniki jakoha apublikavanyja ŭ navukovym časopisie Nature Metabolism, upieršyniu demanstruje suviaź pamiž umovami navakolnaha asiarodździa pierad začaćciem i doŭhaterminovym upłyvam na enierhietyčny abmien u ludziej.

U daśledavańni ŭdzielničali piać niezaležnych kahort — usiaho 1013 zdarovych japoncaŭ, pieravažna maładyja mužčyny.

Daśledčyki vyznačali mierkavany pieryjad začaćcia, adličvajučy jaho ad daty naradžeńnia, i padzialili ŭdzielnikaŭ na dźvie hrupy:

• chałodny siezon — z 17 kastryčnika pa 15 krasavika,

• ciopły siezon — z 16 krasavika pa 16 kastryčnika.

Pry analizie ŭličvalisia mahčymyja faktary, što mohuć upłyvać na vyniki: uzrost, poł i fizičnaja aktyŭnaść. Taksama analizavaŭsia ŭpłyŭ tempieratury, vilhotnaści, praciahłaści śvietłavoha dnia i inšych faktaraŭ za 12 miesiacaŭ da naradžeńnia.

Hałoŭnym indykataram stała tak zvanaja aktyŭnaść buraj tłuščavaj tkanki (brown adipose tissue, BAT), jakuju časta prosta nazyvajuć burym tłuščam. U adroźnieńnie ad zvyčajnaha biełaha tłušču, jaki nazapašvaje enierhiju, bury tłušč spalvaje jaje, pieratvarajučy ŭ ciapło. Jaho kletki bahatyja na mitachondryi — «enierhietyčnyja stancyi» kletki. Vysokaja aktyŭnaść BAT ličycca faktaram, jaki abaraniaje ad atłuścieńnia i mietabaličnych parušeńniaŭ.

Daśledčyki vyznačyli ščylnaść BAT z dapamohaj śpiecyjalnaha abstalavańnia, acanili źmieny ŭ vydatkach enierhii pad uździejańniem choładu i ježy, a taksama vymierali ahulny štodzionny raschod enierhii ŭdzielnikaŭ. Dadatkova byŭ praviedzieny mietearałahičny analiz, kab pravieryć, ci karelujuć peŭnyja ŭmovy nadvorja padčas apładnieńnia z nastupnaj aktyŭnaściu BAT. Analizavaŭsia ŭpłyŭ tempieratury, vilhotnaści, praciahłaści śvietłavoha dnia i inšych faktaraŭ za 12 miesiacaŭ da naradžeńnia.

Dziŭnyja vyniki

Ludzi, začatyja ŭ chałodny siezon, u paraŭnańni z tymi, chto byŭ začaty ŭ ciopły pieryjad, demanstravali:

značna bolš vysokuju aktyŭnaść buraj tłuščavaj tkanki;

bolšyja ahulnyja enierhazatraty ŭ paŭsiadzionnych umovach — niezaležna ad rostu, masy biez tłušču i ŭzroŭniu aktyŭnaści;

nižejšyja pakazčyki indeksa masy cieła, mienšy abjom talii i mienš tłušču vakoł unutranych orhanaŭ (jaho nazyvajuć visceralnym);

pavyšany raschod enierhii pry nizkich tempieraturach (vymiareńnie pravodziłasia pry 19°C);

bolšy raschod enierhii paśla pryjomu ježy;

vyraznuju suviaź pamiž vysokaj aktyŭnaściu BAT i nizkim indeksam masy cieła.

Cikava, što miesiac naradžeńnia nie mieŭ značeńnia. Važnym akazaŭsia mienavita klimatyčny fon u tydni pierad začaćciem.

Što heta značyć dla miedycyny

Vyniki daśledavańnia dajuć padstavy mierkavać, što ŭmovy navakolnaha asiarodździa jašče da ciažarnaści mohuć prahramavać enierhietyčny abmien naščadkaŭ. Ź miedycynskaha punktu hledžańnia vyniki vielmi važnyja: zaprahramavanaja aktyŭnaść buraha tłušču moža dapamahčy zapavolić pracesy stareńnia, nabor vahi i raźvićcio mietabaličnych zachvorvańniaŭ.

Adnačasova ŭźnikajuć novyja pytańni. Ci moža hłabalnaje paciapleńnie ŭ pierśpiektyvie źmianić enierhietyčny profil nasielnictva? I ci mahčyma metanakiravana vykarystoŭvać chaładovyja stymuły pierad začaćciem dla palapšeńnia zdaroŭja budučych pakaleńniaŭ?

Pakul što havorka idzie tolki pra hipatetyčnyja scenaryi. Pramych dokazaŭ taho, što efiekt pieradajecca mienavita praz epihienietyčnyja miechanizmy, daśledavańnie nie daje — jano fiksuje suviaź, ale nie paćviardžaje pryčynna-vynikovuju zaležnaść.

Akramia taho, vyniki majuć šerah abmiežavańniaŭ. Usie ŭdzielniki byli japoncami, tamu nieviadoma, ci buduć anałahičnyja zakanamiernaści vyjaŭlenyja ŭ inšych etničnych hrupach. Nie całkam vyklučany i ŭpłyŭ škiletnaj muskułatury na ahulnyja enierhazatraty. Narešcie, tempieratura 19 °C, pry jakoj pravodzilisia vymiareńni, dla ludziej z vysokaj ustojlivaściu da choładu moža być niedastatkovym stymułam, kab vyjavić maksimalnuju aktyvacyju buraha tłušču.

• 0
• 0
• 0
• 0
• 0
• 0
• 0
• 0