Ministr transpartu Litvy pakul nie bačyć nieabchodnaści ŭ poŭnaj zabaronie.
U Litvie na fonie apasieńniaŭ za biaśpieku hramadzian usio čaściej hučać prapanovy abmiežavać abo navat całkam zabaranić aŭtobusnaje spałučeńnie ź Biełaruśsiu. Nahodaj stali pahrozy zatrymańniaŭ, mahčymaj viarboŭki i vykarystańnia zamiežnikaŭ biełaruskim režymam u prapahandysckich metach, piša Delfi.
Ciapier ź Vilniusa ŭ Minsk štodnia adpraŭlajecca nie mienš za 12 aŭtobusaŭ.
Łatvija ŭžo rychtuje bolš strohija miery. U krainie abmiarkoŭvajecca prajekt poŭnaj zabarony aŭtobusnych pajezdak u Biełaruś i Rasiju. Łatvijskija ŭłady tłumačać inicyjatyvu nieabchodnaściu abaranić hramadzian ad mahčymych pahroz z boku aŭtarytarnych režymaŭ.
Pavodle słoŭ Viktoryi Čmilicie-Nilsien (byłoj śpikierki parłamienta, staršyni Ruchu libierałaŭ), Biełaruś vykarystoŭvaje ludziej jak palityčnych zakładnikaŭ. Jana nahadała, što režym Alaksandra Łukašenki nieadnarazova zatrymlivaŭ zamiežnych hramadzian, a zatym vykarystoŭvaŭ ich u palityčnych pieramovach i prapahandysckich kampanijach.
Łaŭrynas Kaščunas, kiraŭnik kansiervatyŭnaj partyi Litvy, ličyć, što krainy Bałtyi pavinny dziejničać uzhodniena. «Kali Łatvija ŭzmacnić abmiežavańni, a Litva — nie, my možam stać słabym źvianom», — papiaredziŭ palityk.
U toj ža čas ministr transpartu Litvy Eŭhienijus Sabucis pakul nie bačyć nieabchodnaści ŭ poŭnaj zabaronie. Pavodle jaho słoŭ, kolkaść maršrutaŭ pamiž Litvoj i Biełaruśsiu ŭžo była skaročana amal udvaja, i hetaha, na dumku ministerstva, dastatkova dla kantrolu situacyi.
«Pakul adpaviednyja słužby nie rekamiendujuć inšych mier, my nie bačym pryčyn abmiažoŭvać svabodu pieramiaščeńnia ludziej», — zajaviŭ ministr.
Adnak zaniepakojenaść uładaŭ uzmacniajecca na fonie novych vypadkaŭ vykarystańnia zatrymanych zamiežnikaŭ u biełaruskaj prapahandzie. U pryvatnaści, biełaruskija dziaržaŭnyja ŚMI raniej pakazvali zatrymanaha litoŭca Mirasłava Trockisa, jakoha abvinavacili ŭ špijanažy.
Kamientary
Navat u našu (VKL) Łathaliju i Vilenski kraj , dzie bolšaść — etničnyja biełarusy, u nas niama “siabroŭ‑bratoŭ”, jość tolki intaresy...Cikava, a na kolki heta abłoha zakona, z kropki hledžańnia suśvietnaha prava?
Ale uźnikaje pytańnie čamu jany nie prapanujuć zakanadaŭča zabaranić hramadzianam Letuvy uvohule jeździć u Biełaruś u tym liku i na asabistym transparcie? Treba być paśladoŭnymi, jak ličycie tavaryš Kaščunas.