U minskich dvarach źjaviacca kantejniery dla zboru tekstylnych adkidaŭ
U kastryčniku kampanija «Remondzis Minsk» pačnie piłotny prajekt pa ŭstanoŭcy ŭ minskich dvarach śpiecyjalnych kantejnieraŭ dla zboru tekstylnych vyrabaŭ. Prajekt realizujuć sumiesna ź Minskaj haradskoj žyllovaj haspadarkaj, paviedamlaje ahienctva «Minsk-Naviny».
Padobny zbor tekstylu ŭžo pravodziŭsia ŭ Biełarusi ŭ 2011—2015 hadach, ale tady rečy składvali ŭ kantejniery razam ź inšymi vidami druhasnaj syraviny. U vyniku tekstyl ubiraŭ vilhać, zabrudžvaŭsia i hublaŭ mahčymaść dalejšaj jaho pierapracoŭki.
Ciapier dla jaho buduć vykarystoŭvać zakrytyja kantejniery, jakija pastaviać asobna ad placovak dla zboru zvyčajnych adkidaŭ. Zabirać ich źmieściva buduć śpiecyjalnyja mašyny, a nie zvyčajnyja śmiećciavozy.
U kantejniery možna budzie zdavać čystyja i suchija rečy, abaviazkova zapakavanyja ŭ ščylna zaviazanyja płastykavyja pakiety. Heta tyčycca nie tolki adzieńnia, ale i paścielnaj bializny, koŭdraŭ, ručnikoŭ dy inšych tekstylnych rečaŭ. Abutak taksama možna budzie zdavać, ale jaho treba kłaści ŭ asobny pakiet.
Paśla zboru tekstyl buduć sartavać uručnuju pavodle vidu i składu tkaniny. Rečy, jakija zachavalisia ŭ dobrym stanie, zmohuć pieradavać na prodaž u farmacie sekand-chendu abo dabračynnym arhanizacyjam.
Tekstyl, nieprydatny dla paŭtornaha vykarystańnia, buduć pierapracoŭvać u ryźzio, jakoje mohuć vykarystoŭvać roznyja pradpryjemstvy ŭ techničnych metach. Častku syraviny płanujuć pierapracoŭvać hłybiej dla vytvorčaści RDF-paliva.
U kampanii adznačajuć, što ŭ ideale na palihony nie pavinna traplać nijakaja častka tekstylnych adkidaŭ.
Pieršuju partyju z 20‑ci kantejnieraŭ płanujuć pastavić u kastryčniku ŭ Maskoŭskim i Frunzienskim rajonach Minska. Da kanca hoda ich kolkaść pavinna vyraści da 50-ci.
«Remondzis Minsk» płanuje samastojna arhanizavać uvieś cykł abychodžańnia z tekstylem — ad zboru i sartavańnia da pierapracoŭki. U kampanii majuć namier sačyć za vynikami prajekta i ŭličvać vodhuki žycharoŭ. U pierśpiektyvie kantejnierami płanujuć achapić usie rajony Minska, a paśla pašyryć prajekt na abłasnyja centry i inšyja harady Biełarusi.
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy4
Kamientary