Apošniaja nadzieja Nacbanka: try miljardy ad Rasii

Nacyjanalny bank čakaje pastupleńnia rasijskaha dziaržaŭnaha kredytu na praciahu dvaccaci-tryccaci dzion. Na hety termin uvodzicca maratoryj na pryniaćcie novych rašeńniaŭ u halinie valutnaj, kursavoj i hrašova-kredytnaj palityki.

Pra heta paviedamlaje łukašenkaŭskaje ahienctva «Interfaks-Zachad» sa spasyłkaj na krynicu ŭ Nacbanku.

«U Nacbanku ličać vyčarpalnymi pryniatyja miery na dadzienym etapie, heta značyć, da pastupleńnia rasijskaha kredytu», — patłumačyła krynica.

Ahienctva spasyłajecca na infarmacyju, ahučanuju ŭ chodzie pasiedžańnia praŭleńnia Nacbanka ŭ čaćvier 31 sakavika ŭranku.

Atrymańnie dziaržaŭnaha kredytu z-za miažy — adziny sposab finansavańnia hihanckaha deficytu valuty ŭ Biełarusi.

U minułyja hady Biełaruś atrymlivała stabilizujučyja pazyki ad Mižnarodnaha valutnaha fondu pad nizki pracent. Sioleta heta stała niemahčymym, bo ŭ MVF bolšaść hałasoŭ naležyć ZŠA i krainam ES, a Biełaruś rezka pahoršyła adnosiny z Zachadam paśla vybaraŭ. Zachad pryznaŭ vybary ŭ Biełarusi sfalšavanymi i asudziŭ masavyja aryšty palityčnych praciŭnikaŭ Łukašenki. Razdražnieńnie zachodnich elit vyklikaje taksama prapahandysckaja hniuś łukašenkaŭcaŭ.

Jašče raniej

biełaruski ŭrad doŭhija hady atrymlivaŭ finansavańnie z Maskvy, uzamien za palityčnuju łajalnaść i palityku rusifikacyi. Z časam Rasija stała patrabavać u dadatak jašče i prodažu biełaruskaj majomaści va ŭłasnaść rasijskich kampanij.

Možna mierkavać, što vydzialeńnie novych kredytaŭ Maskva ŭviazvaje z novymi pryvatyzacyjnymi kantraktami na svaju karyść. Usiaho hetym razam Minsk prosić 3 miljardy dalaraŭ.

Mižnarodnyja rejtynhavia ahienctvy na hetym tydni čarhovy raz panizili kredytny rejtynh Biełarusi. Unutry krainy nasielnictva asadžaje abmieńniki, sprabujučy kupić valutu. Pry raźlikach miž pradpryjemstvami ŭstanaviŭsia šery kurs rubla — 3600–3700 za dalar. Bolšaść eksparcioraŭ prosta prytrymlivaje valutu ŭ čakańni devalvacyi.

Kab źmiakčyć situacyju, Nacbank devalvavaŭ rubiel na 6% ad pačatku hoda, a 29 sakavika — jašče na 10% dla pradpryjemstvaŭ (kurs dla nasielnictva zastaŭsia raniejšy).

Ad 29 sakavika banki mohuć pradavać jurasobam dalary pa 3340 rubloŭ, a jeŭra — pa 4720 rubloŭ. Kurs u abmieńnikach prykładna na 8% nižejšy.

U čakańni zbaviennych rasijskich kredytaŭ ułady adčajna starajucca prapłyć miž Scyłaj devalvacyi i Charybdaj defołtu.

Try miesiacy tamu Łukašenka publična zabaraniŭ ažyćciaŭlać novyja zamiežnyja zapazyčvańni. Jon taksama pryznaŭ, što «kraina žyvie nie pa srodkach». Adnak niahladziačy na takija hučnyja zajavy, ad taho času Biełaruś ažyćciaviła novyja zapazyčvańni praz vypusk ablihacyj. Bolš za toje, rychtujecca vypusk ablihacyj abłvykankamaŭ i «Biełarusbanka». Što da rasijskich kredytaŭ, to ad pasła Rasii Surykava stała viadoma, što Maskva abumoŭlivaje ich «strukturnymi reformami ŭ ekanomicy». Pakul nieviadoma, što dakładna majecca na ŭvazie.

Devalvacyjnyja čakańni ŭzmacnialisia mierkavańniami, što asłableńnie biełaruskaha rubla — adno z patrabavańniaŭ rasijskaha Minfina.

• 0
• 0
• 0
• 0
• 0
• 0
• 0
• 0