Pieśni Kačmarskaha zahučać pa-biełarusku

Bard-tryjo ŭ składzie Viktara Šałkieviča, Andreja Mielnikava i Źmitra Vajciuškieviča raspačała pracu nad albomam na vieršy polskaha barda Jaceka Kačmarskaha ŭ pierakładzie Andreja Chadanoviča.

Try viadučyja vykanaŭcy aŭtarskaj pieśni abjadnalisia, kab zapisać albom-pryśviačeńnie Jaceku Kačmarskamu — kultavamu polskamu bardu časoŭ Salidarnaści, asobu, jakaja pa značnaści nabližajecca da Vysockaha ŭ Rasiei. Vieršy Kačmarskaha pa-biełarusku ŭpieršyniu zahučali dziakujučy paetu, pierakładčyku, kiraŭniku Biełaruskaha PEN-centra Andreju Chadanoviču. Inicyjatyva pa zapisu takoha alboma sychodziła ad Henryka Litvina, byłoha ambasadara Polščy Biełarusi.

«Dla biełarusaŭ hetaja postać zastajecca praktyčna nieviadomaj, — kaža adzin z udzielnikaŭ prajektu Źmicier Vajciuškievič. — Tamu my i zadumali takuju spravu, kab paznajomić usich z hetaj lehiendarnaj asobaj. Kačmarski moh dać adkazy na polskija pytańni. Jość spadziavańni, što ŭ hetym albomie znojducca adkazy i na biełaruskija pytańni».

Pakul Vajciuškievič, Mielnikaŭ i Šałkievič vybirajuć pieśni. Miarkujecca, što kožny z vykanaŭcaŭ zaśpiavaje roŭnuju kolkaść tvoraŭ. Reliz pakul što biezymiennaha dyska planujecca bližej da kanca hodu, a žyvaja premjera maje prajści ŭ lutym 2012 hodu, jak u Biełarusi, tak i ŭ Polščy. Prahrama budzie vytrymana ŭ stylistycy aŭtarskaj pieśni, ale jak abiacajuć vykanaŭcy ŭ zapisie budzie skarystany «nievialički arkiestryk».

***

Jacek Kačmarski naradziŭsia 22 sakavika 1957 hodu ŭ Varšavie. Debiutavaŭ, jak vykanaŭca ŭ 70-ch, trojčy atrymlivaŭ Hran-pry Studenckaha festyvala pieśni ŭ Krakavie. Šyrokuju viadomaść nabyŭ pry kancy 70-ch ź pieśniami pratestu suprać kamunistyčnaha panavańnia ŭ Polščy. Samyja viadomyja pieśni «Nasza klasa», «Mury», «Oblawa», «Poczekalnia» (saŭndtrek da stužki «Pałac» Kšyštafa Kiśleŭskaha). Jaho pieśni stali himnami antykamunistyčnaj apazycyi, a sam Kačmarski ličyŭsia hołasam ruchu «Salidarnaść». U 1981 hodzie vymušana emihravaŭ. Pracavaŭ u polskaj redakcyi Radyjo Svabodnaja Eŭropa, kancertavaŭ pa ŭsim śviecie i zapisvaŭ albomy, jakija nieadnarazova nabyvali załaty status. Viarnuŭsia ŭ krainu paśla padzieńnia kamunistyčnaha režymu ŭ 1990 hodzie. Praciahvaŭ pisać pieśni, kancertavać i vydavać zborniki paezii i prozy. Byŭ pryznany zasłužanym dziejačom kultury Polščy, atrymaŭ Kavalerski Kryž z ruk prezidenta krainy Alaksandra Kvaśnieŭskaha, uznaharodžany ordenam Frederyka. U 2004 hodzie zachvareŭ na rak hartani, straciŭ hołas. Pamior 10 krasavika 2004 hodu ŭ špitali ŭ Hdańsku. U 2006 hodzie prezidentam Lecham Kačyńskim paśmiarotna adznačany Kamandorskim Kryžom — adnoj z najvyšejšych polskich dziaržaŭnych uznaharodaŭ.

• 0
• 0
• 0
• 0
• 0
• 0
• 0
• 0