Adkryćcio adbudziecca siońnia.
«U knižnaj kramie Kvartira ŭ Bruklinie (731 Washington Ave, niedaloka ad Bruklinskaha muzieja) stvarajecca biełaruskaja palička.
Siońnia, 16 traŭnia, a 7.30 uviečary piśmieńnica i žurnalistka Taćciana Zamiroŭskaja jaje inicyjatarka, budzie hetuju paličku adkryvać i prezentavać.
Siarod inšych, tam buduć i našyja apošnija BINiMaŭskija [Biełaruskaha instytuta navuki i mastactva] vydańni. Kali niechta ŭ Ńju-Jorku choča nabyć apošnija vypuski almanachu «Zapisy BINiM», knihi «Našy mohiłki», «Janka Zaprudnik», «Vybranaje» Kastusia Jezavitava, zavitvajcie, kali łaska, na prezientacyju, abo naŭprost u kramu ŭ čas jaje pracy!» — napisała ŭ svaim fejsbuku daśledčyca biełaruskaj emihracyi Natalla Hardzijenka.
«Dzie ŭ Ńju-Jorku možna kupić knihi sučasnych biełaruskich aŭtaraŭ? A dzie možna daviedacca pra ich bolš — i ŭrešcie pahavaryć pra aktualnuju biełaruskuju litaraturu ŭ vyhnańni pa-za słavianskim, ruskamoŭnym i postsavieckim kantekstam?», — piša Taćciana Zamiroŭskaja.
«Prychodźcie da nas 16 maja — my adkryvajem biełaruskuju palicu ŭ našaj «Kvatery». I adkryvajem jaje amal poŭnym katałoham maładoha, ale ŭžo kultavaha varšaŭskaha biełaruskaha vydaviectva «Mianie Niama». A raspaviadzie pra jaho — i pra biełaruskuju litaraturu — adna z aŭtarak hetaha vydaviectva, a zaadno i naša ńju-jorkskaja piśmieńnica Taćciana Zamiroŭskaja.
Vy zmožacie pahartać i nabyć viasnovyja navinki «Mianie Niama»: doŭhačakanuju novuju knihu Toni Łašden «na uhłu Niezaležnaści», niedakładny miemuar pra Viciebsk «Sini dom. Maja historyja Viciebska» Aleny Piatrovič i aŭtabijahrafičnuju paemu ŭ prozie «Jak vyhladaje śmierć» Dźmitryja Strocaca.
A jašče ŭ vas budzie ŭnikalnaja mahčymaść nabyć nie tolki hetyja knihi, ale i pamiežny eka-chorar Toni Łašden «Čorny les», miełanchaličny postfikšn Paŭła Ancipava «Kudy-niebudź pryjazdžać, što-niebudź rabić i źjazdžać», miełanchaličnyja ese Siarhieja Kraŭčanki «Zabyć u elektryčcy», knihu fotapaezii Julii Šatun «Kožny bačyŭ hety horad u niejkim inšym miescy» i mnohaje inšaje. Pryjemny bonus: Taćciana Zamiroŭskaja pračytaje ŭryŭki sa svajoj knihi «Eŭrydyka, pravier, ci vyklučyła ty haz» (2024), jakaja trapiła ŭ šort-listy premij imia Alesia Adamoviča, Michała Aniempadystava (za dyzajn), a taksama premii «Dar»», — napisała jana.
Takim čynam, adkryćcio siońnia a 7:30 viečara pa ńju-jorskim časie (dźviery buduć adčynienyja z 7:00).
Košt uvachodu 10 dalaraŭ, ale ich možna vykarystoŭvać jak kupon dla nabyćcia knih.
Ciapier čytajuć
«Nadzieja Ściapanaŭna». Mikita Najdzionaŭ apublikavaŭ paemu, jakaja naradziłasia ŭ Žodzinskaj turmie. Takoha paetyčnaha epasu ŭ biełaruskaj paezii XXI stahodździa jašče nie było66
Kamientary