Савіных расказаў, у чым «агульнасць культурнага кода» ў беларусаў і кыргызаў
«Памяць аб Вялікай Айчыннай вайне стала мішэнню маніпуляцый, гэтая атака не мае нічога агульнага з гісторыяй. Яна скіраваная на знішчэнне нацыянальнай і рэгіянальнай самасвядомасці», — напісаў у фэйсбуку дэпутат Палаты прадстаўнікоў Андрэй Савіных.
«А якая ў вас, даруйце, «рэгіянальная самасвядомасць?» «Рэгіянальная супольнасць» і з кім у вас «блізкасць культурнага і каштоўнаснага коду?» — адразу пацікавіліся ў каментарах.
«Напрыклад, з краінамі ЕАЭС», — адказаў Савіных.
ЕАЭС — гэта гандлёвая арганізацыя, у рамках якой свабодна перасоўваюцца тавары краін-удзельніц. У ЕАЭС уваходзяць Беларусь, Расія, Арменія, Казахстан і Кыргызстан.
«Наша Ніва» пацікавілася ў Савіных, якую канкрэтна агульнасць культурных кодаў ён угледзеў паміж беларусамі і, напрыклад, кыргызамі.
«У гэтых краін існуе супольнае ўяўленне аб светапарадку, шмат у чым супадаюць каштоўнасці — традыцыйныя і кансерватыўныя. Напрыклад, сямейныя каштоўнасці. Ёсць разуменне, што толькі разам, фарміруючы агульную эканамічную прастору, мы зможам забяспечыць дабрабыт для нашых грамадзян. Вось гэта і з'яўляецца самасвядомасцю. Усведамленнем таго, што нам трэба жыць у саюзе і ўмацоўваць нашыя інтэграцыйныя сувязі», — перакананы Савіных.
Сямейныя каштоўнасці сярэднеазіяцкіх народаў даволі спецыфічныя з пазіцый беларуса — прымальнай з'явай лічыцца фактычнае шматжонства, практыкуюцца выкупы і гвалтоўныя выкраданні нявест.
«Я дапускаю, што ў слова «самасвядомасць» вы ўкладаеце іншы сэнс, які абмяжоўваецца, хутчэй, рамкамі нацыянальнага, я ж укладаю эканамічны і інтэрнацыянальны сэнс», — дадаў дэпутат.
На пытанне, чаму нарошчванне інтэграцыйных сувязяў з кыргызамі больш каштоўна для Беларусі, чым сувязі з палякамі і літоўцамі, Савіных сказаў, што ў існай сітуацыі прасцей гандляваць з краінамі ЕАЭС. Але, маўляў, з палякамі таксама трэба, проста рабіць гэта цяжэй.
Цяпер чытаюць
Памілаваныя 15 чалавек, сярод якіх 13 палітвязняў2
Каментары