Зямля — у бяспецы. Найбліжэйшыя сто гадоў сутыкнення з астэроідам не будзе
Зямляне могуць уздыхнуць з палёгкай — прынамсі найбліжэйшыя сто гадоў планеце не пагражае сутыкненне з астэроідам Апофіс. Пра гэта заявілі ў амерыканскім касмічным агенцтве NASA, піша Бі-бі-сі.
Гэта касмічнае цела, памерамі з два футбольныя палі, адкрылі ў 2004 годзе. У NASA яго лічылі адным з самых небяспечных астэроідаў для Зямлі.
Сутыкненне з ім пагражала планеце катастрофай. Найбольш магчымыя даты сутыкнення навукоўцы прагназавалі на 2029 і 2036 гады, а таксама ў 2068 годзе.
Але сёння навукоўцы, атрымаўшы новыя звесткі аб астэроідзе, гэтыя пагрозы выключылі.
«Нашы разлікі не паказваюць ніякай рызыкі прынамсі на працягу наступных 100 гадоў», — сказаў Давідзе Фарночыа, навуковец, які вывучае калязямныя аб'екты для NASA.
Названы ў гонар старажытнаегіпецкага бога хаосу і цемры, Апофіс, паводле ацэнак, мае 340 метраў у шырыню.
Нядаўна астэроід праходзіў адносна недалёка ад Зямлі. 5 сакавіка ён прайшоў за 17 млн км ад планеты. Падчас праходжання астраномы змаглі ўдакладніць арбіту астэроіда, што дазволіла ім з упэўненасцю выключыць любую рызыку ўдару ў 2068 годзе і яшчэ доўгі час пасля гэтага.
У наступны раз Апофіс падыдзе адносна блізка да зямлі 13 красавіка 2029 года. Ён будзе ў 32 000 км ад планеты. Гэта прыкладна адна дзясятая адлегласць паміж Зямлёй і Месяцам.
Падчас гэтага набліжэння Апофіс будзе бачны ва ўсходнім паўшар'і, у Азіі, Афрыцы і частцы Еўропы.
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»47
«Няма ў нас іншых беларусаў». Лідар «Драздоў» заклікаў дараваць тым, хто «не там лайк паставіў»
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра2626
Каментары