«Фанерны маршал не скажа, што абгадзіўся, таму заявіў пра нібыта паспяховы першы этап спецаперацыі». Расійскія «ястрабы» сабачацца паміж сабой
Былы міністр абароны «ДНР» Ігар Гіркін (Стралкоў) рэзка выказаўся пра міністра абароны Сяргея Шайгу, назваўшы яго «фанерным маршалам» і патлумачыў, чаму расіяне вымушаныя адступіць з-пад Кіева. А Мінабароны РФ завочна пярэчыць Гіркіну і ўсім скептыкам: маўляў, усе асноўныя задачы Узброеных сілаў Расіі на Кіеўскім і Чарнігаўскім напрамках выкананыя.
Гіркін у свежазапісаным відэа канстатуе, што расійская армія пацярпела на поўначы Украіны правал:
«Наша групоўка, якая дзейнічае на правым беразе Дняпра, у раёне Гастомель — Буча — Ірпень, загразла ў гарадской забудове, у лясіста-балоцістай мясцовасці, і пасля таго як гэтая лясіста-балоцістая мясцовасць распусціцца праз месяц, яе будуць біць з-за кожнага куста.
Колькасці войскаў — пры тым, што туды загналі вельмі шмат тэхнікі — недастаткова не тое што для баёў за трохмільённы горад, а нават для захавання таго перыметра, які занялі ў сакавіку», — сказаў ён.
«Украінскае камандаванне дзейнічае на парадак адэкватней з вайсковага пункту гледжання, чым расійскае», — прызнаў Гіркін.
Мінабароны Расіі насуперак гэтаму кажа, што ўсё так і было задумана. Першапачаткова, маўляў, планавалася прымусіць суперніка сканцэнтраваць сілы для ўтрымання вялікіх пунктаў на кіеўскім і чарнігаўскім напрамках, у тым ліку Кіеў. Іх планавалася скаваць на полі бою і без штурму гарадоў нанесці паразу, якая не дазволіла б ім выкарыстоўваць сілы на галоўным напрамку расійскіх дзеянняў — на Данбасе.
Адначасова расійскае войска нібыта вырашала іншую задачу — у адсутнасць прытоку свежых сіл суперніка з захаду і з цэнтра Украіны стварыць умовы для правядзення завяршальнага этапу «аперацыі па вызваленні рэспублік Данбаса».
І вось цяпер гэтыя мэты нібыта выкананыя, зараз адбываецца актывізацыя дзеянняў на прыярытэтных кірунках, перш за ўсё — на Данбасе.
Цяпер чытаюць
«Адны вераць, што вернуцца, іншыя — не». Як працуе беларуская школа ў Польшчы1
Каментары