Праваабаронцы паведамляюць, што гэтымі днямі былі зафіксаваныя некалькі выпадкаў, калі людзей, якія вярталіся ў Беларусь з Польшчы ці Літвы, затрымлівалі на мяжы.
Так, праваабаронцам «Вясны» расказалі, што сёння ўначы па вяртанні з Польшчы ў Беларусь пасля праверкі тэлефонаў былі затрыманыя некалькі чалавек. Іх знялі з аўтобуса, далейшыя іх лёсы невядомыя.
Раней паведамлялася пра арышт некалькіх чалавек у аэрапорце «Мінск», дзе ў людзей таксама правяраюць тэлефоны і рэчы.
Таксама, паводле інфармацыі праваабаронцаў, 20 чэрвеня на памежным пункце «Катлоўка» на мяжы з Літвой затрымалі жанчыну: яе знялі з рэйсавага аўтобуса. Далейшы яе лёс невядомы.
Вядома, што ў маі ў Астраўцы адбылося некалькі судоў над затрыманымі на беларуска-літоўскай мяжы, вядома пра два штрафы ў 1110 рублёў і 5 сутак арышту за падпіскі на «экстрэмісцкія» каналы.
Праваабаронцам «Вясны» таксама сталі вядомыя факты, калі людзей узмоцнена надглядаюць і дапытваюць пры вяртанні ў Беларусь, глядзяць тэлефоны і сацсеткі, але ў выніку адпускаюць — аднак на наступны дзень да іх прыходзяць сілавікі з ператрусамі.
У сувязі з гэтым перад тым, як вяртацца ў Беларусь, праваабаронцы раяць ацаніць усе рызыкі патрапіць пад пераслед. На час праверкі, прынамсі, варта адпісвацца ад «экстрэмісцкіх» каналаў і выдаляць фота, якія могуць выклікаць пытанні ў сілавікоў.
Цяпер чытаюць
20-гадовая дзяўчына з Брэста запісала жартаўлівы тыкток пра смерць у ДТЗ — і ў той жа вечар разбілася9
Каментары