Этап Кубка свету па водных відах спорту 2023 года, які пройдзе ў Берліне ў кастрычніку, будзе ўключаць спаборніцтвы ў адкрытай катэгорыі.
Як паведамляе на сваім сайце Міжнародная федэрацыя плавання, спаборніцтвы ў адкрытай катэгорыі — «наватарскі пілотны праект, які, вітаючы плыўцоў любога полу і гендарнай ідэнтычнасці, падкрэслівае непахісную прыхільнасць арганізацыі інклюзіўнасці».
Федэрацыя адзначае, што ў адкрытай катэгорыі будуць прадстаўлены заплывы на дыстанцыях 50 і 100 метраў ва ўсіх стылях, з магчымасцю ўвядзення дадатковых спаборніцтваў.
Удзельнікі адкрытай катэгорыі будуць спаборнічаць на працягу двух дзён у фіналах па часе, у якіх фінальныя месцы вызначаюцца па часе, паказаным у папярэдніх заплывах. Гэта азначае, што спартоўцы плаваюць толькі адзін раз у сваім відзе праграмы і не ўдзельнічаюць у асобных фінальных заплывах.
Каб мець права на ўдзел, плыўцы павінны быць сябрамі нацыянальнай федэрацыі. Ім будзе дадзена свабода выбару, як яны хочуць выступаць: у адзіночку, за свой клуб, каманду ці як сябры нацыянальнай федэрацыі.
Як піша Welt.de, летась федэрацыя выключыла трансгендарных плыўцоў з жаночых заплываў на такіх буйных мерапрыемствах, як Алімпійскія гульні і чэмпіянаты свету. Выключэнні дапускаюцца толькі ў тым выпадку, калі змена полу была здзейснена да дасягнення дванаццацігадовага ўзросту. У той жа час федэрацыя імкнулася стварыць адкрытую катэгорыю для ўсіх плыўцоў.
Як заявіў прэзідэнт федэрацыі Хусейн Аль-Мусаллам (Husain Al-Musallam),
«калі Міжнародная федэрацыя плавання ўвяла сваю Палітыку допуску да ўдзелу ў мужчынскіх і жаночых катэгорыях спаборніцтваў, мы ўзялі на сябе абавязацельства вывучыць магчымасць стварэння адкрытай катэгорыі. Каманда экспертаў старанна працавала, каб ажыццявіць гэта. Я хацеў бы падзякаваць усім, хто дапамог Міжнароднай федэрацыі плавання даць гэтую магчымасць».
Выданне нагадвае, што дыскусія аб удзеле ў спаборніцтвах па плаванні ўзмацнілася пасля выпадку амерыканкі Лі Томас (Lia Thomas). Да 2019 года яна ўдзельнічала ў спаборніцтвах як мужчына. Пасля праходжання гарманальнай тэрапіі ўжо ў якасці жанчыны Лі Томас выйграла жаночы заплыў на 500 ярдаў вольным стылем на студэнцкім чэмпіянаце ЗША ў сакавіку 2022 года.
Чытайце яшчэ:
Тытул «Міс Нідэрланды» ўпершыню атрымала трансгендарная жанчына
Спартсменка-трансгендар упершыню ў гісторыі адабралася на Алімпіяду
Каментары
сабакам, дэльфінамі, электрычным скатам.... бо колькі ўжо стагоддзяз іх дыскрымінуюць!