З расійскім хакейным клубам падпісаў кантракт 50-гадовы гулец. Некалі ён прывозіў у Беларусь Кубак Стэнлі
З расійскім клубам Кантынентальнай хакейнай лігі «Тарпеда» з Ніжняга Ноўгарада падпісаў гульнявы кантракт брамнік Мікалай Хабібулін. Адметнасць гэтага — у тым, што некалі вядомаму гульцу, алімпійскаму чэмпіёну аж 1992 года споўнілася ўжо 50 гадоў. У сучасным хакеі нярэдкія выпадкі, калі спартоўцы гуляюць пасля 40, але гуляць на высокім узроўні ў 50 — вялікая рэдкасць.
Зрэшты, Хабібулін не гуляў на прафесійным узроўні ў хакей увесь гэты час, бо нібыта пакінуў спорт амаль 10 гадоў таму, у 2014-м.
Алімпійскім чэмпіёнам Хабібулін стаў у 1992 годзе ў складзе Аб'яднанай каманды, створанай замест зборнай СССР, які распаўся за пару месяцаў да старту Зімовых Алімпійскіх гульняў у французскім Альбервілі. Выйшла так, што ён быў тады ў складзе зборнай толькі трэцім брамнікам і на лёд ані разу не выйшаў. Тым не менш, залаты медаль яму паводле рэгламенту турніру належаў, але яго забраў сабе тагачасны галоўны трэнер зборнай Віктар Ціханаў. Забраў, ды так і не аддаў.
Хабібулін з-за гэтага пакрыўдзіўся і ўсе 1990-я гады адмаўляўся гуляць за расійскую зборную, хоць паводле ўзроўню для яе падыходзіў.
А паколькі жонка ва ўраджэнца расійскага Екацярынбурга была беларускай, то адзін час нават з'яўляліся ідэі, каб прыцягнуць яго да выступленняў за зборную Беларусі. Якія, праўда, нічым не скончыліся.
Пасля брамнік усё ж памірыўся з кіраўніцтвам расійскай зборнай ды нават заваяваў у яе складзе бронзавы медаль на Зімовых Алімпійскіх гульнях 2002 года ў амерыканскім Солт-Лэйк-Сіці (дзе беларуская зборная, дарэчы, сенсацыйна перайграла ў чвэрцьфінале шведаў і заняла агульнае ганаровае 4-е месца).
Сувязь жа праз жонку Хабібуліна з Беларуссю пасля ўрэшце мела вынікам тое, што ў 2004 годзе, заваяваўшы ў складзе клуба «Тампа-Бэй Лайнтынг» Кубак Стэнлі, ён, маючы па ўстаноўленай у НХЛ традыцыі права некуды яго звазіць, павёз трафей не на ўласную малую радзіму, а на жончыну. Гэтага надта захацеў вядомы аматар хакея Лукашэнка, а дамаўляўся пра тое з Хабібуліным тагачасны міністр унутраных спраў і па сумяшчальніцтве кіраўнік Федэрацыі хакея Беларусі Уладзімір Навумаў.
Журналістка раскрыла сакрэт прагрэсу беларускага хакеіста ў НХЛ
«Трэнер нядаўна вярнуўся з Данбаса, наш пацан». Дзе і з кім трэніруюцца Лебедзева, Ланская і іншыя лукашысты
Сілавікі затрымалі дзіцячага трэнера па хакеі за тое, што прозвішча Зяленскага яму спадабалася больш, чым Лукашэнкі
Шаранговіч закідвае шайбу ў пятым матчы запар. Ён найлепшы снайпер «Калгары»
Цяпер чытаюць
«Дыялект падазроны». Спявак Сярога прыйшоў на расійскае рэаліці і сабраў усіх хэйтараў5
Каментары