Ізраільская армія паведаміла, што ў панядзелак пачала «абмежаваную аперацыю» на поўдні Лівана, мэтай якой з'яўляюцца аб'екты ліванскай групоўкі «Хезбала» ў памежных раёнах, піша Бі-бі-сі.
«Некалькі гадзін таму ЦАХАЛ пачаў абмежаваныя, лакалізаваныя і мэтавыя наземныя рэйды на аснове дакладнай разведвальнай інфармацыі супраць тэрарыстычных аб'ектаў і інфраструктуры «Хезбалы» ў Паўднёвым Ліване. Гэтыя цэлі размешчаныя ў вёсках непадалёк ад мяжы і нясуць непасрэдную пагрозу ізраільскім паселішчам на поўначы Ізраіля», — гаворыцца ў паведамленні Арміі абароны Ізраіля.
Вайскоўцы дадалі, што ізраільскія ВПС і артылерыя падтрымліваюць наземныя войскі дакладнымі ўдарамі па ваенных цэлях у гэтым раёне.
У панядзелак з'яўляліся паведамленні, што Ізраіль рыхтуецца да наземнай аперацыі на мяжы з Ліванам, каб засцерагчы паўночныя раёны краіны, якія падвяргаюцца пастаянным абстрэлам з боку баевікоў «Хезбалы».
На такую магчымасць намякаў ізраільскі міністр абароны Ёаў Галант, увечары неназваны супрацоўнік амерыканскай адміністрацыі сказаў журналістам, што аперацыя можа пачацца ў панядзелак.
У панядзелак увечары ў Ізраілі прайшло пасяджэнне вайсковага кабінета, на якім, як паведамляюць ізраільскія СМІ, быў ухвалены наступны этап аперацыі супраць «Хезбалы».
Прадстаўнік Дзярждэпартамента ЗША Мэцью Мілер заявіў на брыфінгу, што ізраільскія ўлады праінфармавалі Вашынгтон аб «шэрагу аперацый», уключаючы наземныя, у Ліване.
«Яны паведамілі нам, што гэта абмежаваныя аперацыі, засяроджаныя на інфраструктуры «Хезбалы» паблізу мяжы», — заявіў ён.
У Пентагоне паведамілі, што міністр абароны ЗША Лойд Осцін правёў размову са сваім ізраільскім калегам, падчас якога бакі «пагадзіліся з неабходнасцю дэмантажу інфраструктуры нападаў» на паўночнай мяжы, каб не дапусціць нападаў з боку «Хезбалы».
Осцін таксама падкрэсліў, што неабходна «дыпламатычнае рашэнне, каб гарантаваць, што грамадзянскія асобы змогуць бяспечна вярнуцца ў свае дамы па абодва бакі мяжы».
КДБ запусціў новы бот у тэлеграме для вярбоўкі беларусаў за мяжой. Прапануюць расклейваць улёткі, фатаграфаваць аб'екты і «нешта іншае»9
Каментары