Левапапулісцкі спіс узначальвае палітык, якога выключылі з яго ранейшай партыі за антысеміцкія выказванні.
Партыя «Зара над Нёманам» Рэмігіюса Жамайтайціса вырвалася ў тройку лідараў перадвыбарнай гонкі ў Літве.
Апошняе сацыялагічнае апытанне кампаніі Spinter tyrimai паказала, што за гэтую новую палітычную сілу гатовыя прагаласаваць 16% выбарцаў. Гэта толькі трохі менш, чым за правацэнтрысцкі Саюз Айчыны — хрысціянскіх дэмакратаў (18%) і левацэнтрысцкіх сацыял-дэмакратаў (24%).
Акрамя таго, у Сейм Літвы маюць прайсці Саюз лібералаў, цэнтрысцкая Партыя зялёных і сялян, сацыяльна-кансерватыўны Саюз дэмакратаў «Дзеля Літвы» і, магчыма, таксама радыкальна-ліберальная Партыя свабоды, якая балансуе на мяжы выбарчага бар'ера, які складае 5% галасоў.
Партыі, якія праводзяць прарасійскія і пралукашэнкаўскія наратывы, мяркуючы па ўсім, выбарчага бар'ера не адолеюць.
Першы тур выбараў у Літве мае адбыцца ў гэтую нядзелю, 13 кастрычніка. 71 дэпутата выбіраюць у аднамандатных акругах, 70 — па прапарцыйнай сістэме па партыйных спісах.
Партыя «Зара над Нёманам» была зарэгістраваная ў студзені 2024 года. Яе заснавальніка Рэмігіюса Жамайтайціса ў свой час выключылі з партыі «Свабода і справядлівасць» за скандальныя выказванні, што расейцы і яўрэі прыгняталі літоўцаў і што яны нясуць віну за спаленне вёскі Пірчупы, літоўскай Хатыні, нацыстамі.
На прэзідэнцкіх выбарах у маі 2024 года 42-гадовы Жамайтайціс нечакана сабраў 9,3% галасоў. Яго рэзкі стыль прываблівае выбарцаў, асабліва з глыбінкі.
«Зара над Нёманам» заявіла пра гатоўнасць фарміраваць урад у складзе левацэнтрысцкай кааліцыі — гэта значыць, разам з мэйнстрымавымі сацыял-дэмакратамі, спіс якіх узначальвае Вілія Блінкявічуце.
Цяпер чытаюць
Пратэжэ лукашэнкаўскага фаварыта Баскава будуе акадэмію ў Бразіліі і Нью-Васюкі сусветнага маштабу10
Каментары