«Не суйце свой нос». МЗС Беларусі нахаміла міністру замежных спраў Польшчы
Радаслаў Сікорскі пракаментаваў выбары ў Беларусі, а МЗС яму адказала словамі Лукашэнкі.
Міністр замежных спраў Польшчы Радаслаў Сікорскі пракаментаваў выбары ў Беларусі і наткнуўся на хамства з боку беларускага МЗС.
«Сёння «выбары» ў Беларусі. Чаканне, каго аб’явяць пераможцам, невыноснае», — напісаў Сікорскі ў твітары.
У іншым твіце польскі міністр папрасіў журналістаў не называць Лукашэнку «апошнім дыктатарам Еўропы».
«Уладзімір Пуцін дагнаў і пераўзышоў яго ў злачынствах, рэпрэсіях і міжнароднай агрэсіі», — адзначыў Сікорскі.
У твітары яму адказала беларускае МЗС.
«Спадар міністр, выбары ў Польшчы адбудуцца 18 мая 2025 года, і толькі гэтыя выбары павінны вас хваляваць.
Займіцеся праблемамі сваёй краіны і свайго народа, а «не суйце нос не ў свае справы», як толькі што сказаў Лукашэнка», — напісаў ў рэплаях вядучы міністэрскага твітара.
У МЗС працытавалі выказванне Лукашэнкі на сённяшняй прэс-канферэнцыі. Словы Сікорскага яго папрасіла пракаментаваць Наталля Эйсмонт.
«Навошта вы чапляеце Расію? Навошта вы Пуціна тузаеце? Ну што ў вас, праблем не хапае? Сікорскі ж дасведачаны чалавек. Мы з ім сустракаліся, гутарылі. Чаго яму не сядзіцца наконт нашых выбараў? Ён хай думае, што будзе заўтра. Сёння гноем закідалі Міністэрства замежных спраў польскія сяляне. А заўтра? Таму супакойцеся! Мы што, пра вас нешта кажам? Не», — заявіў Лукашэнка.
Ён дадаў, што Беларусь магла б умяшацца ў польскія прэзідэнцкія выбары, якія адбудуцца ў маі.
«Калі хочаце, можам паказаць, што мы нешта ўмеем. З штучным інтэлектам, IT-тэхналогіямі і іншым. Але мы такой мэты не ставім. Нам гэта не трэба. Мы не хочам эскалацыі, мы гэта не будзем рабіць. А мы з вамі людзі веруючыя. Мы — хрысціяне. Не дай бог Ён гэта ўбачыць і пачне разбірацца. Мала не здасца. Нам, але вам тым больш. Таму давайце жыць дружна!» — сказаў Лукашэнка.
Ён папрасіў польскага журналіста, які прысутнічаў на прэс-канферэнцыі, «чыркануць Сікорскаму, што хай свой нос не суе, куды яго не просяць».
Каментары