На прэс-канферэнцыі пасля сустрэчы прэзідэнта ЗША Дональда Трампа з прэм'ер-міністрам Вялікабрытаніі Кірам Стармерам у амерыканскага лідара запыталіся, ці давярае ён прэзідэнту Расіі Уладзіміру Пуціну і ці верыць у тое, што дасягнутыя з ім дамоўленасці будуць выконвацца.
«Я ведаю яго ўжо доўгі час і не веру, што ён парушыць сваё слова. Калі мы заключым здзелку, я думаю, што яна будзе трымацца», — сказаў Трамп.
Адказваючы ж на пытанне, чаму брытанскі прэм'ер Кір Стармер, у адрозненне ад яго, не давярае Уладзіміру Пуціну, Трамп сказаў: «Давярай, ды правярай».
«Правяраць трэба, бо ніколі не ведаеш, што адбудзецца. Я ведаю шмат людзей, пра якіх можна сказаць: «ніякіх шанцаў, што яны калі-небудзь падмануць цябе», і яны горшыя людзі ў свеце, — сказаў Трамп журналістам. — Я ведаю і такіх, пра якія вы б сказалі, што яны вас падмануць, а яны на 100% сумленныя. Так што вы ніколі не ведаеце, што атрымаеце».
У ходзе размовы з журналістамі Трамп сказаў таксама, што лічыць мірнае пагадненне паміж Расіяй і Украінай такім, што ўжо практычна адбылося, і заявіў, што не думае, што Пуцін зноў уварвецца ва Украіну.
«Я думаю, што Расія паводзіць сябе вельмі добра. […] Я думаю, што мы вельмі добра прасунуліся ў пытанні заключэння пагаднення, але мы яшчэ не заключылі яго», — заявіў Трамп. Ён таксама мяркуе, што або пагадненне будзе заключанае вельмі хутка, або яно ўвогуле не адбудзецца.
Цяпер чытаюць
Былыя жонка і дзяўчына Пратасевіча аб’ядналіся і прыйшлі да яго новай нявесты, каб адпомсціць. І пагражаюць судом21
Каментары