Сенатары-рэспубліканцы заклікаюць Трампа аднавіць дапамогу Украіне і яе доступ да разведданых
Частка амерыканскіх заканадаўцаў з Рэспубліканскай партыі пачынаюць заклікаць прэзідэнта ЗША Дональда Трампа адмяніць сваё рашэнне аб прыпыненні вайсковай і разведвальнай дапамогі Украіне, піша «Еўрапейская праўда».
Рэспубліканцы папярэджваюць, што доўгае спыненне амерыканскай дапамогі падчас ваенных дзеянняў будзе мець сур'ёзныя згубныя наступствы.
На іх думку, Трамп меў права часова спыніць пастаўкі зброі ва Украіну, каб ацаніць ход вайны, аказаць ціск на саюзнікаў па НАТА і стварыць акно для перамоваў аб мірным пагадненні паміж Украінай і Расіяй. Але ў той жа час заканадаўцы ад Рэспубліканскай партыі папярэджваюць, што спыненне паставак зброі і боепрыпасаў на надта доўгі час можа мець разбуральны ўплыў на баяздольнасць Украіны, што падарве яе рычагі ўплыву ў перамовах з Расіяй.
Акрамя таго, яны падкрэсліваюць неабходнасць неадкладна аднавіць абмен разведданымі, паколькі, па словах заканадаўцаў, Злучаныя Штаты наўрад ці выйграюць ад пазбаўлення Украіны крытычна важнай разведвальнай інфармацыі з поля бою.
«Гэта трывога за ўкраінскі народ. Мяне больш турбуе, як да гэтага паставяцца людзі на полі бою», — сказаў сенатар Цім Ціліс, каментуючы паўзу ў амерыканскіх вайсковых пастаўках.
Ціліс папярэдзіў, што паўза ў аказанні дапамогі, пра якую было абвешчана ў панядзелак, «можа аказацца карыснай для Пуціна». Ён таксама сказаў, што ва Украіны дастаткова зброі і боепрыпасаў, каб пакуль утрымліваць лінію фронту, але выказаў надзею, што паўза ў вайсковай дапамозе працягнецца нядоўга. Пры гэтым сенатар «не супраць» паўзы, калі гэта будзе кароткатэрміновая «перамоўная тактыка».
«Я спадзяюся і малюся, каб яна была нядоўгай. Думаю, так і будзе», — дадаў Цім Ціліс.
Старшыня Камітэта Сената па асігнаваннях Сьюзан Колінз заявіла, што выступае супраць спынення вайсковай дапамогі.
«Я не думаю, што мы павінны прыпыняць нашы намаганні. Гэта ўкраінцы праліваюць кроў», — сказала яна, назваўшы цяперашні момант «крытычным для Украіны».
Лідар рэспубліканскай большасці ў Сенаце Джон Т'юн падкрэсліў, што паўза ў вайсковай дапамозе Украіне будзе часовай.
«Гэта паўза, што важна, а не прыпыненне. Думаю, гэта частка перамоў. І я спадзяюся, што ўрэшце мы пасадзім людзей за стол перамоў і зможам дамовіцца аб пагадненні, якое прынясе мірнае развязанне гэтага трохгадовага канфлікту і, спадзяюся, будзе паважаць суверэнітэт украінскага народа», — сказаў ён.
Сенатар Ліндсі Грэм таксама адзначыў, што занепакоены абвешчанай Трампам паўзай па абмене разведданымі з Украінай.
«Я вельмі занепакоены гэтым у доўгатэрміновай перспектыве,» — заўважыў ён.
Сенатар Джон Корнін, член камітэта Сената па разведцы, сказаў, што «разведвальныя даныя, якія мы давалі ўкраінцам, былі вельмі важныя для таго, каб яны маглі працягваць барацьбу».
«Я спадзяюся, што паўза будзе скасаваная ў нейкі момант», — заявіў ён.
Сенатар Майк Раўндс, член камітэта па Узброеных сілах, заявіў, што не падтрымлівае рашэнне аб спыненні абмену разведданымі з Украінай, а таксама спадзяецца, што паўза ў вайсковай дапамозе Украіне будзе толькі часовай.
Maxar закрыў Украіне доступ да сваіх спадарожнікавых здымкаў
ЗША адключылі Украіне цэлепаказальнікі для HIMARS
«Туман вайны стане для УСУ значна больш густым». Да чаго можа прывесці адмова ЗША перадаваць свае разведданыя Украіне
Дарадца Трампа расказаў, калі ЗША могуць размарозіць вайсковую дапамогу Украіне
Каментары
"Санітары дэмакраты заклікаюць Трампа..."