Магчымы ўваход у падземны ход на Заслаўскім замку ў панядзелак адкрыўся археолагам, паведаміў тэлеграм-канал Інстытута гісторыі.
Навукоўцы Інстытута гісторыі НАН Беларусі сумесна з Мінскім аблвыканкамам, Заслаўскім гарвыканкамам і іншымі зацікаўленымі ўжо каля месяца вядуць раскопкі пад кіраўніцтвам Івана Спірына.
Нягледзячы на частыя дажджы, праца па раскрыцці падземнага ходу ў старажытным насыпу Заслаўля працягвалася.
Раней паведамлялася што на тэрыторыі Заслаўскага замка пачаліся вялікія археалагічныя раскопкі. Адна з заяўленых мэтаў — вывучыць загадкавы падземны ход, які быў знойдзены яшчэ ў 1970-х гадах, але да гэтага часу не даследаваны.
Гэты ход упершыню выявіў яшчэ ў савецкія часы археолаг Георгій Штыхаў. Тады яго часткова расчысцілі: шырыня ходу складае каля 80 сантыметраў, вышыня — каля 1 метра 20 сантыметраў. Аднак адна са сцен была пашкоджаная, таму далейшыя даследаванні прыпынілі.
Цяпер каманда археолагаў, валанцёраў і студэнтаў імкнецца высветліць, якое было прызначэнне гэтага падземнага ходу. Як патлумачыў Іван Спірын, старшы навуковы супрацоўнік Інстытута гісторыі НАН Беларусі, ход можа быць як падземным калідорам, так і дрэнажнай сістэмай або сакрэтным лазам.
Даследаванні праходзяць на заходняй частцы замка — каля замкавай брамы XVI стагоддзя, праз якую раней у яго ўваходзілі княскія дружыны і купецкія караваны. Плануецца завяршыць працу да канца ліпеня, але тэрміны могуць зрушыцца з-за надвор'я ці знаходак.
Калі ўдасца дакладна вызначыць прызначэнне падземнага ходу і ўмовы дазволяць, гэты аб’ект можа стаць адкрытым для наведвальнікаў.
Заслаўскі замак быў пабудаваны ў XVI стагоддзі. Цяпер на яго месцы захаваліся Спаса-Праабражэнская царква, руіны замкавай брамы, валы і равы.
Цяпер чытаюць
На аўташоу ў Лідзе ледзь не загінуў адзін з самых знакамітых каскадзёраў Беларусі — яго відэа сабралі амаль паўмільярда праглядаў. Што з ім цяпер?3
Каментары