Кіберпартызаны: Мы ўзламалі сайт КДБ пасярод ночы. Яны за гэты час бегла сабралі нараду і дамовіліся, каго будуць падстаўляць?
Ініцыятыва пракаментавала версію КДБ пра «кантраляваны ўзлом» сайта ведамства.
У сюжэце АНТ Камітэт дзяржаўнай бяспекі Беларусі пераконвае, што ўзлом афіцыйнага сайта ведамства, які адбыўся ў пачатку 2024 года, нібыта быў часткай іх жа спецаперацыі.
Версія КДБ наступная: на сваім сайце ў раздзеле зваротаў яны нібыта зрабілі пастку. Там знаходзіўся архіў з 40 тысяч зваротаў грамадзян (даносы, запыты на інфармацыю аб рэпрэсаваных сваяках, проста спам) з верасня 2014 года па жнівень 2023-га. КДБ сцвярджае, што ў жніўні 2023-га спецыяльна туды ўкінуў фэйкавы данос актывіста «Народнай Грамады» Паўла Бялюціна. А ў пачатку восені 2023 нібы зафіксавалі знешнюю атаку на сайт КДБ, пасля чаго, па іх словах, у кастрычніку Кіберпартызаны атрымалі доступ быццам толькі да гэтага блоку. КДБ заявіў, што нібы кантраляваў увесь працэс узлому. А вычакаўшы час, у студзені 2024-га, па словах КДБ, яны самі закрылі сайт.
Кіберпартызаны пасля сюжэту паведамілі, што яны ўзламалі сайт КДБ за пару гадзін пасярод ночы.
«То бок яны за гэты час бегла сабралі нараду, дамовіліся, каго будуць падстаўляць, сфальсіфікавалі базу даных на дзясяткі тысяч зваротаў, падлілі яе на сервер. І ўсё гэта для чаго? Каб зганьбіцца публічна на ўвесь свет з надзеяй праз некалькі гадоў, магчыма, злавіць нейкага ноунэйма? Ага, гучыць праўдападобна», — іранізуюць Кіберпартызаны ў каментары на сваім канале.
Сайт КДБ пасля таго ўзлому ўжо паўтара года не працуе.
Як стала вядома са злітай базы даносаў, 31 студзеня 2017 года Бялюцін напісаў наступнае паведамленне: «Добры дзень. У мяне ёсць некаторыя падставы меркаваць, што грамадзянін РБ Аўтуховіч Мікалай Мікалаевіч прадумвае і пачынае ажыццяўляць падрыхтоўку да спробы ўзброенага захопу ўлады ў нашай рэспубліцы. Пра спробу даведаўся са слоў гр. Аўтуховіча М.М.».
Пасля таго, як стала вядома пра гэты данос, Бялюціна выключылі з «Народнай Грамады». Яго тлумачэнні былі няўцямнымі. «Калі даць сапраўдную інфу, то ўсё перагорнецца», — загадкава казаў ён.
Сама база зваротаў сапраўдная. «Наша Ніва» тады званіла некаторым даносчыкам (вось і вось), яны пацвярджалі, што пакідалі звароты ў КДБ.
Пяць мутных момантаў у гісторыі пра даносчыка Бялюціна і «спецаперацыю» КДБ
КДБ арыштаваў падазронага актывіста Паўла Бялюціна. У якой краіне гэта адбылося, невядома
Падазронага актывіста-стукача Паўла Бялюціна прывезлі з Турцыі
Стукач з «Грамады», які летась спрабаваў пралезці ў Каардынацыйную раду, паехаў у Польшчу і прапаў
Двое сяброў «Народнай грамады» пісалі даносы ў КДБ. Хто яны і як тлумачаць сітуацыю?
«Міс Беларусь» усё больш нагадвае конкурс прыгажосці ў гарэме23
Каментары