Беларускія «кіберпартызаны» адправілі ў адстаўку топ-менеджара «Аэрафлота»
Намеснік гендырэктара «Аэрафлота» па інфармацыйных тэхналогіях Антон Мацкевіч пакінуў сваю пасаду. Гэта адбылося пасля маштабнай атакі беларускіх хакераў, якая паралізавала працу найбуйнейшага расійскага авіяперавозчыка гэтым летам.
Як паведамляе газета «Коммерсантъ», Мацкевіч быў звольнены ў сярэдзіне снежня. Хоць афіцыйна кампанія заяўляе аб звальненні «па ўласным жаданні», крыніцы ў галіне наўпрост звязваюць гэтую адстаўку з паспяховай кібератакай, якую 28 ліпеня здзейснілі групоўкі Silent Crow і беларускія «Кіберпартызаны».
Тады ў выніку ўзлому сістэм «Аэрафлот» быў вымушаны адмяніць дзясяткі рэйсаў, што прывяло да каласальных страт і рэпутацыйнага ўдару.
Беларускія «Кіберпартызаны» пазней раскрылі дэталі аперацыі, паказаўшы на поўную безабароннасць расійскага авіягіганта: супрацоўнікі выкарыстоўвалі састарэлыя версіі Windows, а іх паролі былі занадта простымі для ўзлому.
У «Аэрафлоце» спрабуюць захаваць твар і хваляць Мацкевіча, там кажуць, што пры ім адбыўся «істотны рывок у развіцці IT-кірунку кампаніі ў частцы імпартазамяшчэння і рэалізацыі стратэгіі лічбавай трансфармацыі групы».
Але эксперты адзначаюць, што менавіта беларускія хакеры паказалі рэальны стан інфармацыйнай бяспекі ў кампаніі. Адстаўкі Мацкевіча чакалі яшчэ летам, адразу пасля таго, як «Кіберпартызаны» публічна выкрылі хібы ў абароне сістэм перавозчыка.
Паводле звестак групы «Кіберпартызаны», расійская авіякампанія «Аэрафлот» удзельнічала ў арганізацыі вайсковых авіяперавозак.
Атака беларускіх кіберпартызанаў нанесла «Аэрафлоту» шкоду на 10—50 мільёнаў даляраў.
Цяпер чытаюць
Колькасць судоў па палітычных крыміналках зменшылася ў разы24
Каментары