На чэмпіянат свету па футболе едуць тры былыя гульцы першынства Беларусі
Што абаронца «Манчэстэр Сіці», узбек Абдукадыр Хусанаў, які ў свой час гуляў за мінскі «Энергетык-БДУ», гэта вядома даўно. А хто яшчэ, піша «Трыбуна».
Гэта паўабаронца зборнай Узбекістана Шэрзод Эсанаў, які прыехаў у Беларусь з Расіі, дзе выступаў за «Акрон», у верасні 2025 года.
Ён стаў выступаць за брэсцкае «Дынама». Але згуляў за клуб толькі дзевяць гульняў, за якія Эсанаў аддаў дзве галявыя перадачы. У студзені 2026 года ён вярнуўся ва Узбекістан і гуляе за «Бухару». У чэмпіянаце гэтага года Эсанаў вельмі выніковы: у 10 матчах адзначыўся 5 галамі, каманда дзеліць 3— 4‑ю пазіцыі з «Навбахорам». 4 галы паўабаронца забіў у апошніх чатырох турах.
У сістэме зборных Узбекістана Эсанаў выступае з 2022 года. Другі матч за каманду U-19 быў супраць беларусаў — паўабаронца адзначыўся дублем у таварыскім матчы, а яго каманда перамагла ў Мінску 4:3.
У нацыянальнай зборнай вось толькі дэбютаваў — 2 чэрвеня ў гульні са зборнай Канады (0:2). Галоўны трэнер узбекістанцаў — Фабіа Канавара выпусціў яго на пяць хвілін у канцоўцы. Гэтага аказалася дастаткова, каб трапіць у ростар на дарослы чэмпіянат свету.
Узбекістан згуляе на чэмпіянаце свету ў адной групе з Партугаліяй, Калумбіяй і ДР Конга.
Таксама едзе на чэмпіянат свету Прынс Квабена Аду з Ганы, які ў лютым 2023 года перайшоў у «Іслач». За 14 матчаў першага кола забіў шэсць мячоў і аддаў тры перадачы і паехаў ва Украіну.
У зборнай Ганы Аду дэбютаваў 14 лістапада 2025 года ў таварыскім матчы з японцамі (0:2). Ад той пары прапусціў толькі адну сустрэчу нацыянальнай каманды. Партугальскі трэнер Карлуш Кейруш, здаецца, разлічвае на экс-футбаліста «Іслачы» як на асноўнага выканаўцу.
Гана ў адной групе з Англіяй, Харватыяй і Панамай.
Цяпер чытаюць
Вазіў натаўцаў у Афганістан і скідваў гуманітарку ў Судане, а потым трапіў у турму па даносе сябра з Украіны4
Каментары