Беларус, што стаў найлепшым бамбардзірам чэмпіянату Малдовы, працягне кар'еру ў Ізраілі
Дзяніс Казлоўскі перайшоў з кішынёўскага «Зімбру» ў «Макабі» з Кірыят-Гата, што будзе выступаць у другім дывізіёне футбольнага чэмпіянату Ізраіля.
У мінулым сезоне за «Зімбру» Казлоўскі правёў 33 матчы ва ўсіх турнірах, у якіх адзначыўся 23 забітымі мячамі і зрабіў восем галявых перадачаў.
Дзяніс патлумачыў свой сыход з «Зімбру» адстаўкай беларускага трэнера Алега Кубарава, а таксама тым, што ў клубе марудзілі з перазаключэннем кантракту.
«Макабі» — клуб амбіцыйны. Да таго ж адным з найважнейшых фактараў стала тое, што кантракт прапаноўвалі не на год, а на два. Акрамя таго, калі яны на мяне выйшлі, акрэслілі мэты і задачы каманды. Я вывучыў, што гэта за горад. Для мяне важна, каб можна было пераехаць і камфортна жыць з сям’ёй, каб вадзіць дачку ў добры дзіцячы садок побач», — расказаў Дзяніс журналістам.
Яму задалі пытанне, ці не палохае яго перманентны ваенны канфлікт на Блізкім Усходзе.
«Цяпер, калі так падумаць, нідзе не бяспечна. Вядома, гэтыя нюансы я таксама ўлічваў, разглядаючы прапановы і варыянты. Узважваў усё за і супраць. Калі расказвалі, як мяне бачыць трэнерскі штаб, сказалі і пра тое, што на поўдні Ізраіля ўсё спакойна. Але ў цэлым, паўтаруся, у свеце нестабільная абстаноўка: дзе б ты ні знаходзіўся, нельга адчуваць сябе ў поўнай бяспецы», — адказаў Дзяніс Казлоўскі.
Чэмпіянат Ізраіля ў другім дывізіёне стартуе ў сярэдзіне жніўня.
Цяпер чытаюць
Святлана Ціханоўская пра крытыку з боку Ціханоўскага: Мне ад гэтага вельмі крыўдна і непрыемна30
Каментары