Піхоны і шпіліліі: модная кветкавая крама пахабна пажартавала — і адхапіла ў сацсетках
А ўладальнік дастаўкі кветак прэміум класа «Ветка-Кветка» пакрыўджаны, што «скуфыні ды цётухны» не зразумелі яго гумар.
Адна з самых модных (і далёка не бюджэтных) кветкавых крам сталіцы «Ветка-Кветка» апублікавала ў Threads дзіўны допіс: падборку фотаздымкаў, на якіх перарабілі назвы кветак для стварэння эратычных намёкаў.
Так, фота з ліліямі падпісалі «Шпилилии», з півонямі — «Пихоны», з сланечнікамі — «Подсосолнухи», з гладыёлусамі — «Глоталусы». Подпіс адпавядаў: «Выпраўце, калі дапусцілі памылкі ў назвах», — і смайл, які падміргвае.
І сацсеткі выбухнулі.
Самы папулярны каментар набраў больш за 1,5 тысячы лайкаў: «Спадзяюся, «пихоны» вы будзеце атрымліваць замест заробку бліжэйшыя 12 месяцаў, а «подсосолнухи» замест прыбытку».
«Як маркетолаг не магу прайсці міма. Гэта той выпадак, калі крэатыў цалкам разбурыў матыў пакупкі. Кветкі — гэта пра эстэтыку, клопат і эмоцыі. Жанчыны, якія купляюць букеты для сябе, каб стварыць утульнасць, або для сябровак на святы, цэняць візуальную прыгажосць і стыль, а не пошлы гумар. Мужчына, які выбірае падарунак, хоча выглядаць годна, а не асацыявацца са слэнгам з піўнога бара. Вам удалося адштурхнуць адразу абодва сегменты аўдыторыі. Ахопы ў Threads вы, вядома, павялічылі, але каштоўнасць брэнда знізілі да нуля».
«Імаверна, гэта падалося вам смешным, але насамрэч гэта агідна і брыдка».
Цікавіліся людзі, якія ж з прапанаваных кветак варта падарыць маці ці настаўніцы 1 верасня.
Шмат хто быў здзіўлены, што такое магла дапусціць заснавальніца крамы Настасся Іваш — бо яна была для людзей прыкладам вельмі тонкага густу.
Але ў хуткім часе высветлілася, што Настасся больш не мае дачынення да «Веткі-Кветкі» — пасля разводу праект застаўся яе былому мужу Анатолю Шымакоўскаму.
Менавіта Анатоль даваў згоду на такі пахабны крэатыў. Яго не раз тэгнулі ў каментарах, але адказвае мужчына вельмі нервова: «Можна без мяне? Я са скуфынямі ды цётухнамі, у якіх адсутнічае пачуццё гумару, стараюся не камунікаваць».
Тым часам абураныя жанчыны плануюць звярнуцца ў МАРГ са скаргай на рэкламу. А таксама заклікаюць набываць кветкі ў Настассі Іваш, якая ўжо заснавала новую краму аўтарскай фларыстыкі — Bloomy Jam.
Саладуху знялі ў правакацыйнай рэкламе. Здаецца, спявак проста не ведаў, што значыць «душыць гуся»
«Укруці глыбей»: сетка вінных крам зрабіла рэкламу да 8 сакавіка з сэксуальным падтэкстам
«Сталы для куні». Беларускі вытворца мэблі зрабіў правакацыйную рэкламу
«Самы час адмыць грахі». Баранавіцкі завод парашкоў зрабіў сэксуальную калабарацыю
Каментары
[Зрэдагавана]