Сабаленку ў Мінску ахоўвала кампанія, заснаваная былым гэбістам і ўчастковым. На пярэднім краі быў легендарны Іваныч
Першая ракетка свету Арына Сабаленка наведала Мінск 14 ліпеня. Яна прыбыла на прыватным самалёце са сваім жаніхом Георгіасам Франгулісам і сабакам Эшам. На адкрыццё корта ў Мінску і сустрэчу з фанатамі тытулаваная спартсменка прыйшла ў суправаджэнні сямі целаахоўнікаў. Як высветліла «Люстэрка», гэта супрацоўнікі прыватнай мінскай кампаніі «Агенцтва бяспекі і бізнэсу».
Адзін з ахоўнікаў выклікаў абурэнне ў сацсетках — ён ішоў наперадзе і адсоўваў дзяцей ад Сабаленкі, не даючы ім дакрануцца да тэнісісткі. У ім апазналі Анатоля Семашчука — легендарнага сек’юрыці Іваныча, які ахоўваў такіх сусветных знакамітасцяў, як Лара Фабіян, ZAZ, Scorpions і многіх іншых зорак, што прыязджалі ў Беларусь.
Хто такі Іваныч?
Шматлікія наведвальнікі канцэртаў у Мінску бачылі строгага і хмурага ахоўніка, які знаходзіўся каля зорак. Але сапраўдная слава да Анатоля Семашчука прыйшла ў 2019 году. Тады 49‑гадовы ахоўнік даў першае інтэрв’ю «Нашай Ніве», у якім расказаў пра сваю працу. Мужчыну празвалі Іванычам і запрашалі ахоўваць папулярных зорак, якія прыязджалі ў Мінск.
Так, ён быў целаахоўнікам Аляксандра Рыбака, французскай спявачкі ZAZ, канадскага спевака Гару (артыста з мюзікла «Нотр-Дам-дэ-Пары») і бельгійска-канадскай выканаўцы Лары Фабіян.
Ахоўваў ён таксама гурты A-HA і Scorpions.
Працаваў Іваныч і з расійскімі зоркамі. Напрыклад, з лідарам гурта ДДТ Юрыем Шаўчуком. Дарэчы, у інтэрв’ю за 2019 год ён яго вельмі хваліў: «Разумны, цікавы чалавек, які падтрымае размову на любую тэму».
А таксама працаваў з Валерыем Меладзэ, Алай Пугачовай, Верай Брэжневай, Святланай Лабадой, Ёлкай і іншымі.
Сярод яго падапечных таксама былі вядучыя Юрый Дудзь, Леанід Якубовіч, акцёры Сяргей Бязрукаў і Рэната Літвінава.
З беларускіх селебрыці Іваныч ахоўваў Сяргея Міхалка, Георгія Калдуна, Уладзіміра Пугача, коміка Ідрака Мірзалізадэ, блогераў Улада Бумагу і Улада Кабякова і многіх іншых.
Спартсмены ў яго працы таксама былі. Напрыклад, расійскі біятланіст Аляксандр Ціханаў і беларускі футбаліст Аляксандр Глеб.
«В Instagram 99% фатаграфій з тымі зоркамі, з кім я адпрацаваў як асабісты ахоўнік. Гэта не здымкі кшталту: «Ой, дзядзька, можна з вамі сфатаграфавацца», — расказваў Семашчук у 2019-м. — Многія з тых артыстаў, хто прыязджае ў Беларусь пастаянна, ужо спецыяльна просяць, каб з імі працаваў толькі я».
Ён сцвярджаў, што не хоча панібрацкіх адносін з зоркамі і таму адмаўляецца ад розных афтэрпаці, на якія яго рэгулярна клічуць.
«Часам даводзіцца зманіць, што дома чакае жонка, маўляў, яна не зразумее. Хоць гэта не так. Я ў разводзе», — дзяліўся Анатоль і дадаваў, што жыве адзін.
Ужо ў 2025 годзе ў падкасце «Подробнее» Іваныч расказваў, што, акрамя аховы, яшчэ здымаецца ў кіно (у асноўным гэта расійскія серыялы), рэкламе і кліпах. Так, ён засвяціўся ў кліпе гурта ЛСП.
Служыў у ПДВ, супрацоўнічаў з ізраільскай разведкай
Пра месца сваёй працы Іваныч ні тады, ні ў больш позніх інтэрв’ю не распаўсюджваўся. Паводле даных Belpol, мужчына не служыў у сілавых структурах. Сам Анатоль сцвярджаў, што набіраўся вопыту, супрацоўнічаючы з рознымі разведкамі.
— Працаваў ва ўзаемадзеянні і з ізраільскай службай бяспекі, і з камітэтам, і з СБП, з усімі структурамі, якія толькі ёсць і існуюць. Вось. Быў вельмі добры вопыт. Вельмі шмат усяго цікавага даведаўся ад іх, ад кожнага патроху. І на выхадзе вось я такі і атрымаўся, як Іваныч», — казаў мужчына ў падкасце «Подробнее».
Ён адзначыў, што ягоны бацька служыў у міліцыі, а родныя па матчынай лініі былі вайскоўцамі. Сам ён расказаў, што служыў у ПДВ і займаўся боксам.
Паводле даных Belpol, да 2019 года Семашчук прапрацаваў ахоўнікам у кампаніі «Мінск Прынцэс Гатэль», якая належала турэцкаму холдынгу «Ірада». Кампанія валодае гатэлем Crowne Plaza.
Потым мужчына нейкі час быў дырэктарам кампаніі «ЭкаТрэйдІнвест», якая займаецца перакладамі на замежныя мовы, а таксама аптовым гандлем прадуктамі харчавання.
Таксама ў адкрытых крыніцах «Люстэрка» знайшло ІП на поўнага цёзку Семашчука, зарэгістраванае ў 1993 годзе. Магчыма, ён аказваў паслугі аховы як індывідуальны прадпрымальнік. Але ў 2024 годзе ІП закрылася.
Цяпер Іваныч кіруе кірункам «Адміністрацыйны кантроль» у кампаніі «Агенцтва бяспекі і бізнэсу». Таму Семашчук разам з сямю сваімі падначаленымі і ахоўваў Сабаленку.
«Я ўкладаю вельмі шмат у навучанне, хоць некаторыя кажуць, што дарма гэта раблю — то-бок гэта трэба рабіць за вялікія грошы, рыхтаваць людзей, бо тыя людзі, якіх я падрыхтую, сядуць мне на пяткі, і на выхадзе я стану незапатрабаваным, а яны будуць ужо руліць мной. У мяне трошкі іншае бачанне. Тое, што я ўкладаю ў людзей, незалежна ад таго, гэта хлопцы ці дзяўчаты, — гэта наша агульная бяспека. І мая, і супрацоўнікаў, якія прыходзяць на працу, і гасцей», — казаў Іваныч.
Колькі маглі каштаваць паслугі Іваныча і яго падначаленых, невядома. Прайса на сайце кампаніі няма, а ў інтэрв’ю 2025 года Анатоль агучваў толькі прыблізныя сумы. Паводле яго слоў, аплата залежыць ад узроўню зоркі і месцаў, у якіх яна з’яўляецца.
«Ад дзесяці даляраў да бясконцасці за гадзіну, — расказваў Іваныч. — Вось адзін з прыкладаў: за тры дні працы з чалавекам я зарабіў 1200—1300 даляраў. За тры дні».
Што тычыцца палітычнай пазіцыі, то яе ў сваім Instagram мужчына не выказвае. Пры гэтым ён публікаваў фота з Усебеларускага народнага сходу ў 2024 годзе і «Каляднага турніру на прызы Лукашэнкі» ў 2015-м.
Што за агенцтва ахоўвала Сабаленку?
«Агенцтва бяспекі і бізнэсу» (прыватнае ўнітарнае прадпрыемства «ПрататыпГруп») з’явілася ў Беларусі 14 лютага 2020 года. Заснавальнікі — Дзмітрый Астаповіч і Віктар Чаравашка. Абодва — з сілавым мінулым.
Астаповіч — ураджэнец Кобрына, які пераехаў з бацькамі ў Бабруйск. Ён з сям’і сілавікоў: мама была следчай, бацька — оперупаўнаважаным у мясцовай міліцыі.
Сам Дзмітрый адвучыўся на юрфаку і чатыры гады, з 2007‑га па 2011-ты, працаваў участковым у Ленінскім РУУС Бабруйска. Паводле даных Belpol, яго звольнілі адтуль за прагулы, а да гэтага ў яго былі дысцыплінарныя спагнанні. Праўда, паводле слоў прадстаўніка арганізацыі Уладзіміра Жыгара, яго справа выглядае як тыповая справа маладога ўчастковага, якога перагрузілі працай, і ён «паклаў ксіву на стол».
Як прызнаваўся сам Астаповіч, праз некаторы час пасля сыходу з сілавых структур ён заняўся бізнэсам. Спачатку здаваў у арэнду водныя шары — аквазорбы, але прадаў бізнэс. Потым адкрыў кампанію, якая займалася ці не ўсім чым можна: ад добраўпарадкавання могілак да аптовага гандлю.
Пазней мужчыну запрасілі папрацаваць у Расію, у «піцерскае агенцтва бяспекі ў бізнэсе». Сам Астаповіч прызнаваўся, што агенцтва аказвала розныя паслугі: ад простага кансультавання да супрацьстаяння рэйдарскім захопам.
Ужо з назапашаным у Расіі вопытам экс-участковы вярнуўся ў Беларусь, каб адкрыць тут сваю справу. Яму ў гэтым дапамог Віктар Чаравашка — былы супрацоўнік Упраўлення КДБ па Мінску і Мінскай вобласці.
Паводле даных Belpol, Чаравашка пайшоў з сілавых структур у 2014 годзе, затым працаваў у службе бяспекі «Знешэканамбанка». На сайце «Агенцтва бяспекі і бізнэсу» пазначана, што ў Віктара — больш за 17 гадоў «паспяховага практычнага вопыту ў сферы карпаратыўнай бяспекі».
Цікава, што «ПрататыпГруп» належыць і дэтэктыўнае агенцтва «Астап і партнёры». Ім таксама кіруе Астаповіч. Дарэчы, на сайце кампаніі пазначана, што ён — віцэ-прэзідэнт Міжнароднай асацыяцыі дэтэктываў IAPD па Рэспубліцы Беларусь.
Спектр паслуг агенцтва разнастайны: ад інфармацыйнай бяспекі і аховы аб’ектаў да маркетынгу і кіравання актывамі. Асобна прапісана, чым кампанія дакладна не займаецца. Гэта праблемы кліента, звязаныя з палітыкай, устаноўка «жучкоў», узлом электронных прылад, сайтаў і сацсетак, умяшанне ў асабістае жыццё і гэтак далей.
«Так і жыву. Сам сябе баюся». Культавы мінскі сэк'юрыці пра сваю працу і жыццё
У інтэрнэце ўжо прадаюць учорашні аўтограф Сабаленкі
«За паўгадзіны — 350 аўтографаў». Як Арына Сабаленка адкрывала ў Мінску тэнісныя корты
Арына Сабаленка выйшла да мінчукоў у атачэнні васьмі ахоўнікаў ВІДЭА
Вось на якім самалёце Арына Сабаленка і Георгіяс Франгуліс прыляцелі ў Мінск
Арына Сабаленка з жаніхом і сабакам прыляцелі ў Мінск чартарным рэйсам. Іх сустрэлі народнымі танцамі і караваем
Каментары
Тым самым згубілі, што ягоная палова грунтуецца на вашым жа вялікім інтэрв’ю з "Іванычам" 2019 года.
І калі б захоўвалася традыцыя тэгаў па асобах, падбору рэкамендаваных артыкулаў, гэтага таксама б не адбылося.
Іранічна і сумна, як эканомія і падыход "хай так" замінае нават павазе да свайго ўласнага, раней зробленага.
Задумайцеся нарэшце, калі ласка.