Пуціну далажылі пра аднаўленне кантролю над «сухапутным калідорам» у Крым
Кіраўнік прызначанай Расіяй акупацыйнай адміністрацыі Запарожскай вобласці Яўген Баліцкі падчас сустрэчы з прэзідэнтам Расіі Уладзімірам Пуціным заявіў, што расійскія войскі нібыта цалкам кантралююць так званы «сухапутны калідор» у Крым — трасу, якая злучае Растоў-на-Доне з анексаваным паўвостравам праз акупаваныя тэрыторыі Украіны, піша The Moscow Times.
Па словах Яўгена Баліцкага, эфектыўнасць украінскіх удараў беспілотнікамі па гэтым маршруце «істотна знізілася» дзякуючы ўзмацненню супрацьпаветранай абароны і прымяненню новых сродкаў абароны. Ён таксама адзначыў, што траса была ўзятая пад асаблівы кантроль па даручэнні Пуціна.
Гэтыя заявы выклікалі сумневы нават сярод некаторых расійскіх ваенных блогераў. У Z-канале «Два майора», напрыклад, іранічна прапанавалі Баліцкаму асабіста праехаць па ўсім маршруце на чале калоны бензавозаў, каб пацвердзіць бяспеку дарогі.
Украінскі бок раней паведамляў, што ў канцы мая — пачатку чэрвеня ўзяў гэты лагістычны маршрут пад агнявы кантроль з дапамогай ударных беспілотнікаў сярэдняй далёкасці. Паводле ўкраінскіх паведамленняў, удары наносіліся па грузавіках, складах, палівазапраўшчыках і іншых аб'ектах забеспячэння ўздоўж трасы.
У пачатку ліпеня сцвярджалася, што за першы тыдзень месяца былі атакаваныя каля 240 расійскіх грузавікоў, якія рухаліся па гэтым маршруце, у тым ліку палівазапраўшчыкі.
Цяпер чытаюць
Дэпутатка, якая рыхтуе прыгажунь для Лукашэнкі, выйшла замуж21
Каментары