Новае даследаванне паказвае, як палітычныя навіны ўплываюць на працаздольнасць
Чытанне палітычных навін наўпрост уплывае на тое, як вы паводзіце сябе ў офісе і наколькі эфектыўна працуеце. Навукоўцы высветлілі, як нават кароткачасовыя ўсплёскі спажывання палітычнага кантэнту выклікаюць эмацыйную ланцуговую рэакцыю ў калектыве.
Даследаванне групы амерыканскіх навукоўцаў пад кіраўніцтвам Іана Х’юза (Ian M. Hughes) было апублікаванае ў часопісе Computers in Human Behavior.
На працягу дзевяці тыдняў падчас прэзідэнцкіх праймерыз 2024 года ў ЗША аўтары сачылі за паводзінамі 308 работнікаў. Удзельнікі штотыдзень адзначалі, як часта яны спажывалі негатыўную ці пазітыўную палітычную інфармацыю праз сацыяльныя сеткі, тэлебачанне, падкасты і газеты. Гэта дазволіла навукоўцам прасачыць, як кароткачасовыя адхіленні ад звычайнага ўзроўню чытання навін, кантэнту, не датычнага да працы, адбіваюцца на штодзённым эмацыйным стане і працоўных буднях.
Высветлілася, што тыдні, калі людзі спажывалі больш негатыўных палітычных навін, чым звычайна, прыводзілі да росту трывожнасці. У такія перыяды супрацоўнікі імкнуліся зберагчы свае эмацыйныя рэсурсы і істотна зніжалі ўключанасць у працу. Акрамя таго, трывожнасць прымушала людзей больш старанна фільтраваць сваю мову і сачыць за кожным словам, каб пазбегнуць патэнцыйных канфліктаў і дадатковага стрэсу.
У той жа час пазітыўны палітычны кантэнт дэманструе адваротны эфект: чытанне навін, якія нясуць станоўчыя эмоцыі, выклікае пачуццё надзеі.
Надзея становіцца псіхалагічным рэсурсам, які стымулюе людзей інвеставаць сваю энергію ў працу, падвышае ўключанасць і заахвочвае часцей дапамагаць сваім калегам з працоўнымі задачамі. Прычым эфект надзеі і пазітыўных навін аказаўся больш устойлівым і доўгатэрміновым, чым кароткачасовыя ўсплёскі трывогі ад негатыву.
Аўтары даследавання грунтаваліся на тэорыі захавання рэсурсаў і патлумачылі, што эмацыйны стрэс ад палітыкі за межамі працы не знікае, калі чалавек прыходзіць на працоўнае месца. Хоць спажыванне адмоўных і станоўчых навін у сярэднім не адрознівалася па аб’ёме і паступова зніжалася цягам перыяду даследавання, менавіта персанальныя тыднёвыя ўсплёскі негатыву найбольш вынішчаюць чалавечыя рэсурсы.
Навукоўцы падкрэсліваюць, што праца ва ўмовах палітычнай напружанасці вымагае ад супольнасцяў і працадаўцаў увагі да ментальнага здароўя, але без спроб кантраляваць ці забараняць тое, што чытаюць работнікі.
Каб нейтралізаваць уплыў негатыўных навін, эксперты раяць балансаваць спажыванне інфармацыі пазітыўным кантэнтам, дбаць пра паўнавартасны адпачынак і сон, а таксама шукаць апору і адчуванне кантролю ў валанцёрстве ці грамадскіх актыўнасцях.
«Наша Нiва» — бастыён беларушчыны
ПАДТРЫМАЦЬ
Каментары
— Гм… Да ведь других нет.
— Вот никаких и не читайте.