Нелегальныя мігранты спрабавалі трапіць у Літву з Беларусі праз вадасцёкавую трубу
Двое нелегальных мігрантаў спрабавалі трапіць з Беларусі ў Літву праз трубу пад водапрапускным збудаваннем. Аднак, убачыўшы ў канцы трубы трывалую металічную браму і пачуўшы набліжэнне памежнікаў, яны вярнуліся ў Беларусь, паведамляе Служба аховы дзяржаўнай мяжы Літвы.
20 кастрычніка ў першай палове дня супрацоўнікі Кабяльскай памежнай заставы Аранскага памежнага атрада заўважылі праз сістэму відэаназірання двух чалавек, якія набліжаліся з беларускага боку. У гэтым месцы ўсталяваная фізічная загарода для прадухілення нелегальнай міграцыі з Беларусі — ахоўная агароджа з рулонамі канцэрціны.
Меркаваныя парушальнікі падышлі да трубы, праз якую з Беларусі цячэ ручай. Трубу праклалі ў гэтым месцы, каб вада не размывала насып, на якім праходзіць патрульная дарожка памежнікаў і ўсталяваная фізічная загарода.
Труба на літоўскім баку пачынаецца прыкладна за метр ад тэрыторыі Беларусі і мае дыяметр каля 2,8 метра. На яе выхадзе ў Літву паставілі трывалую металічную браму з замком. Яна не дазваляе парушальнікам бесперашкодна выбрацца з трубы на літоўскую тэрыторыю.
Мігранты перайшлі ручай і залезлі ў трубу. Пры сабе яны мелі нажніцы для рэзання металу і, як мяркуецца, збіраліся перарэзаць імі браму. Памежнікі Кабяльскай заставы адразу перадалі інфармацыю пра заўважаных парушальнікаў найбліжэйшым патрульным экіпажам.
У трубе мужчыны прабылі крыху больш за хвіліну. Магчыма, убачыўшы трывалую браму, яны зразумелі, што не змогуць перарэзаць яе сваімі нажніцамі. Акрамя таго, мяркуецца, што яны пачулі набліжэнне пазадарожнікаў літоўскай памежнай службы.
Выбраўшыся з трубы, мужчыны пайшлі назад у Беларусь. Да таго часу на насып над трубой ужо прыбылі патрулі Кабяльскай і суседняй Друскеніцкай памежных застаў.
Памежнікі агледзелі вароты, а для праверкі навакольнай тэрыторыі паднялі службовы дрон. Іншых парушэнняў не выявілі.
Сёлета літоўскія памежнікі не дазволілі 1695 нелегальным мігрантам з Беларусі трапіць у краіну ў недазволеных месцах.
Латвія падоўжыла аперацыю па барацьбе з нелегальнай міграцыяй на мяжы з Беларуссю
Узброеныя людзі ў масках сілком гналі мігрантаў з Беларусі ў Латвію, перасеклі мяжу і скралі камеры
На мяжы быў паранены літоўскі памежнік, мігранты спрабавалі зацягнуць яго ў Беларусь
У Латвіі знайшлі першы ў краіне тунэль для нелегальных мігрантаў з Беларусі
Цяпер чытаюць
Раптоўна памяняўся кіраўнік Віцебскай вобласці. Прычынай назвалі хваробу 50‑гадовага Аляксандра Рагожніка2
Каментары