Rychtujmasia da marazoŭ

Dzieviać sposabaŭ umacavańnia imunitetu.

Čamu adnych z nas chvaroby abychodziać bokam, a inšyja nie vyłaziać z prastudy j hrypu? Daktary śćviardžajuć: reč u kvołym imunitecie. Za hetym słovam staić šerah orhanaŭ dy kletak, takich, jak tymus, sielazionka, kaściavy mozh, limfatyčnyja vuzły dy proćma limfoidnych falikułaŭ. Apošnija raskidany pa ŭsim arhaniźmie j samaaddana achoŭvajuć nas ad bakteryj, virusaŭ, hryboŭ i navat puchlin. Pieratamleńnie, paleńnie, alkahol, sałodkaje, niastača snu j hipadynamija istotna źnižajuć imunitet. A ŭ peryjad pachaładańniaŭ, kali sonca ŭsio radziej zaziraje ŭ našy akiency, jon moža kančatkova zdacca. Nižej budzie vieścisia havorka pra toje, jak abaranić asłablenaha abaroncu.

1. Ahulnaŭmacavalnyja j vitaminizavanyja vanny

Na dno rondala pakładzicie: kvietki ramonku, halinki ablapichi (razam ź liściem), liście biarozy, travu chvašču palavoha, čystacieł, liście abo kareńnie łopuchu, travu drasionu ptušynaha. Kali pary inhredyjentaŭ nia znojdziecie — nia strašna. Ahulnaja masa suchoje sumiesi — 300—500 h.

Dla tych, chto maje leciščy, niaciažka budzie padrychtavać i taki vitaminizavany zbor: pa adnoj častcy liścia bruśnic dy maliny j pa try častki ablapichi dy parečki, pładoŭ dy liścia rabiny j šypšyny. Zalicie ŭsio vadoj, na marudnym ahni daviadzicie da kipieńnia, pracadzicie, advar dabaŭcie ŭ vannu z vadoj (temperatura da 35—37o S). Pa pryniaćci vanny kładziciesia spać.

2. Kantrastnyja vannački dla noh

Adčuŭšy pieršyja prymiety niedamahańnia, nalicie dva tazy z vadoj roznaje temperatury — davoli ciopłaj i chaładnavataj (nie chałodnaj!). Pa čarzie apuskajcie stupni spačatku ŭ ciopłuju (5 chv.), zatym — u chaładnavatuju (1 chv.). Paŭtarać 5—7 razoŭ. Pa skančańni pažadana vypić kubak haračaje harbaty j lehčy ŭ łožak.

Hetaja pracedura dobra treniruje sasudy noh i dapamahaje adužać infekcyju. Cudoŭna prydatnaja dla dziaciej.

3. Pryrodnyja leki

Nieabchodna zahadzia rychtavacca da epidemii j stymulavać imunitet u mižepidemičny peryjad. Siarod pryrodnych lekavych srodkaŭ vykarystoŭvajuć preparaty raślinnaha, žyviolnaha j mikrabijalahičnaha pachodžańnia.

Siarod preparataŭ raślinnaha pachodžańnia samyja dziejsnyja — nastojki žeńšeniu, echinacei, kitajskaha limońniku, eleŭterakoku, zamanichi, lakrycy, radyjoli ružovaj, aralii mańčžurskaj. Prymajucca pa adnoj kropli na hod žyćcia. Kurs — 2—3 tydni.

Aproč stymulacyi imunitetu, preparaty hetaje hrupy pavyšajuć arteryjalny cisk u hipatonikaŭ, palapšajuć apetyt dy patencyju ŭ mužčyn (nia bolej za dva tydni pryjomu!).

Preparaty nie pryznačajucca: ludziam z sutarhavymi prajavami, epileptykam, hipertonikam, pry nervovym uzbudžeńni.

Preparaty žyviolnaha pachodžańnia: «Chitazan», «Apilak» (pčalinaje małačko), «Pantakryn» (vyrablajecca z alenievych rahoŭ), «Karaleŭskaje žele». Vypuskajucca ŭ tabletkach, rektalnych śviečach, maziach. Vałodajuć mnostvam hajučych jakaściaŭ. Akramia stymulavańnia imunitetu, pryznačajuć pry rasstrojstvie charčavańnia, niastačy małaka ŭ kormiačych maci, pry depresijach, pa pieraniasieńni ciažkich zachvorvańniaŭ.

Darosłym pryznačajecca pa adnoj tabletcy (0,01 h) pad jazyk try razy na sutki ciaham 2—3-ch tydniaŭ. Preparaty hetaje hrupy vałodajuć i radyjaachoŭnym dziejańniem.

Preparaty mikrabijalahičnaha pachodžańnia: IRS-19, rybamunił, likapid. Rekamendujecca prymać dva razy na hod u mižepidemijalny peryjad. Jany nia majuć pabočnych efektaŭ i vielmi efektyŭnyja. Adzinaja chiba — košt. Prykładam, kurs likapidu dla darosłych (10 tabletak) budzie kaštavać pad sorak dalaraŭ.

Varta pamiatać, što pieraličanyja pryrodnyja srodki pry praciahłym užyvańni mohuć pryvieści da zaŭčasnaha pałavoha vyśpiavańnia ŭ dziaciej. Tamu abaviazkova prakansultujciesia z uračom adnosna dozaŭ i terminaŭ, užyvajcie preparaty nie čaściej jak dva razy na hod.

4. Dapamoha mindalinam

Pavialičyć imunnuju achovu padniabiennych mindalin — asabliva tym, chto časta chvareje na anhinu, — dapamohuć štodzionnyja ranišnija j viačernija pałaskańni horła słabym rastvoram marskoj soli (adna čajnaja łyžka na šklanku hatavanaj vady, achałodžanaj da pakajovaj temperatury).

5. Charčujmasia pravilna

Źviarnicie ŭvahu na svajo charčavańnie. Užyvajcie ŭ ježu bolej sadaviny j harodniny. Kiefir źmiaščaje bakteryi, što pavyšajuć miascovy imunitet ślizistaj abałonki straŭnika j kišečnika. Jak vyjavili daśledavańni ŭ kalifarnijskim Instytucie Devisa, pradukty, što vydzialajucca hetymi bakteryjami, stymulujuć vypracoŭku interferonu — białku, jaki biare ŭdzieł u źniščeńni virusaŭ. A ŭ jabłykach jość rečyvy, nieabchodnyja dla chutkaści j dakładnaści praciakańnia imunnych reakcyj, — vitaminy B i C, marhaniec i miedź, a taksama fitancydy — rečyvy, što vałodajuć procivirusnym dziejańniem. Što moža być praściej: šklanka kiefiru zranku j adzin jabłyk na dzień — voś doza prafilaktyčnaha «lakarstva».

6. Bieražysia pieraachaładžeńnia

Viadoma, što lahčej za ŭsio pieraachaładžajucca nohi. I ŭ tych, chto pierasoŭvajecca pieški, i ŭ tych, chto jeździć na aŭto (samaje chałodnaje miesca — pamiž prybornaj panellu i padłohaj). Adziavajcie dźvie pary ciopłych škarpetak. Chitrujcie — adziavajcie dźvie pary zvyčajnych i adnu zdymajcie na pracy. Pierad tym, jak nadziavać škarpetki, možna namazać piaty i ŭzvyšeńni pierad palcami stupniaŭ tonkim słojem finalhonu, jaki niekalki hadzin budzie hreć padešvy, zaścierahajučy nohi ad pieraachaładžeńnia.

7. Adekvatnaja fizyčnaja nahruzka

U vychadnyja nie siadzicie doma — jak maha bolej chadzicie pieššu. Našamu arhanizmu nieabchodnyja chacia b 1—1,5 hadziny aktyŭnych ruchaŭ 3—4 razy na tydzień. Praciahłaja nahruzka na vialikija hrupy myšcaŭ aktyvizuje aerobnyja pracesy ŭ arhaniźmie, plonam čaho jość umacavańnie imunitetu.

8. Uschodni sposab

Uschodniaja medycyna ličyć, što pryčyna zachvorvańniaŭ — u parušeńni narmalnaha abaračeńnia pavietrana-kryvianoj enerhii pa 12 unutranych orhanach (merydyjanach) u arhaniźmie čałavieka. Pry hetym punkty, dzie najčaściej zachrasaje płyń enerhii, źjaŭlajucca aktyŭnymi — «enerhietyčnymi» — kropkami ŭździejańnia. Kali ŭ našym arhaniźmie ŭźnikaje parušeńnie, u adpaviednych kropkach uździejańnia ŭźnikajuć patalahičnyja źmieny j zastoj, što patrabuje masažu hetych kropak da poŭnaha rassłableńnia. Vykonvać jaho treba try razy na dzień, robiačy pa dzieviać viarčalnych ruchaŭ pa hadzińnikavaj strełcy i stolki ž — suprać jaje, ź lohkim naciskańniem. Parnyja kropki varta masiravać dźviuma rukami adnačasova.

Kropki dla masažu:

— na łbie, u siaredzinie miažy rostu vałasoŭ;

— prosta pasiaredzinie pieranośsia;

— na ŭnutranych kancach brovaŭ;

— abapał kryłaŭ nosa;

— u jamcy za smočkapadobnym adrostkam skronievaj kości (namacvajecca zzadu i nižej ad močak vušej);

— u patyličnaj jamcy — prosta pasiaredzinie miažy rostu vałasoŭ;

— prosta nad aścistym adrostkam siomaha šyjnaha pazvanka (toj, jaki najbolej vystupaje);

— u jamcy pamiž klučycami.

9. Narodny metad

Nia treba hrebavać babulčynymi paradami. Lekavyja raśliny cudoŭna ŭmacoŭvajuć imunitet. Zhatujcie sabie tanizujučuju harbatu. Dla hetaha źmiašajcie paroŭnu płady šypšyny, kaliny, melisu j šałfej. Zalicie ŭsio kipniem i dajcie nastajacca ŭ termasie ciaham dźviuch hadzin. Zatym pracadzicie, dadajcie paru kroplaŭ ablapichavaha aleju j miod na smak. Picie dva razy na dzień. Najlepiej — zranku j pierad snom.

Kali vy čaściakom prastudžvajeciesia, praciahła chvarejecie bolej za čatyry razy na hod, pakutujecie na alerhii, chraničnyja zachvorvańni z častymi abvastreńniami, raim nieadkładna naviedać imunolaha j zrabić imunahramu ŭ lakarniach dy kansultacyjna-dyjahnastyčnych centrach Miensku ci bujnych haradoŭ pa miescy žycharstva. Tut vam padbiaruć nieabchodny imunamadulatar i patrebnuju dozu preparatu.

Niachaj chvaroba projdzie bokam. Nie chvarejcie!

• 0
• 0
• 0
• 0
• 0
• 0
• 0
• 0