Hienieralnaja prakuratura Ukrainy (HPU) identyfikavała aŭtamat, ź jakoha byli rasstralanyja 10 udzielnikaŭ Jeŭramajdanu.
Pra heta padčas pres-kanfierencyi paviedamiŭ namieśnik hienprakurora Alaksiej Bahaniec, paviedamlaje RBK-Ukraina.
HPU abvinavačvaje MUS u pieraškodzie rasśledavańniu masavych zabojstvaŭ na Majdanie.
«Nami identyfikavany minimum 1 aŭtamat, ź jakoha zabili 10 mitynhoŭcaŭ. Heta AKM. Nie chaču vas rasčaroŭvać, ale na dadzieny momant my nie znajšli dastatkova dokazaŭ taho, što 76 asobaŭ, a ź ich 46 na vulicy Instytuckaj, byli zabityja sa snajpierskich vintovak. Akramia słoŭ, rečyŭnych dokazaŭ, vynikaŭ sudova-miedycynskich ekśpiertyz my nie atrymali. Adzinaje, u čym my ŭpeŭnienyja, dyk u tym, što ludziej rasstrelvali z aŭtamataŭ Kałašnikava», — zajaviŭ Bahaniec.
Pa słovach namieśnika hienprakurora, mitynhoŭcy ruchalisia ŭvierch pa vuł. Instytuckaj z metaj padpalić barykadu, a nie z metaj naniasieńnia škody supracoŭnikam milicyi.
Taksama Hienieralnaja prakuratura Ukrainy vyjaviła 11 asob, jakija abvinavačvajucca ŭ vykradańni aktyvistaŭ Juryja Viarbickaha i Ihara Łucenki.
Pra heta ŭ chodzie bryfinhu zajaviŭ v.a. hienieralnaha prakurora Aleh Machnicki.
«Vyjaŭlena 11 asob, troje ź ich aryštavanyja, astatnim sud vybraŭ mieru strymańnia ŭ vyhladzie asabistaha abaviazacielstva. Heta ŭ asnoŭnym supracoŭniki milicyi i cituški», — zajaviŭ Machnicki.
Raniej v.a. ministra ŭnutranych spraŭ pa kantroli za MUS Arsien Avakaŭ zajaŭlaŭ, što vykanaŭcy vykradańnia aktyvistaŭ Ihara Łucenki i Juryja Viarbickaha (jakich vykrali z Alaksandraŭskaj balnicy ŭ Kijevie ranicaj 21 studzienia) zatrymanyja: «Hałoŭnym śledčym upraŭleńniem MUS siońnia praviedzieny zatrymańni niepasrednych vykanaŭcaŭ, u spravie ab vykradańni Ihara Łucenki i zabojstvie Juryja Viarbickaha».
«Hałoŭnyja vykanaŭcy zatrymanyja, klučavy čałaviek tut - raniej sudzimy, 76 hoda (naradžeńnia). Majstar sportu. Recydyvist, faktyčna. I rabiŭ heta, biezumoŭna, nie samastojna, a ŭ suviazi sa strukturami, źviazanymi z palityčnym kiraŭnictvam i pravaachoŭnym kiraŭnictvam krainy», — adznačyŭ Avakaŭ.
Nahadajem, kolkaść achviar supraćstajańnia ź siłavikami siarod mirnych pratestujučych u pieryjad Majdana składaje 106 čałaviek.
HPU abvinavačvaje MUS u pieraškodzie rasśledavańniu masavych zabojstvaŭ na Majdanie
V.a. hienieralnaha prakurora Aleh Machnicki zajaŭlaje, što słužbovyja asoby Ministerstva ŭnutranych spraŭ ažyćciaŭlajuć schavanaje supraćdziejańnie rasśledavańniu masavych zabojstvaŭ na Majdanie, jakija adbylisia ŭ lutym 2014 hoda.
«Na žal, istotna pahoršyłasia praca pa rasśledavańniu hetaj spravy… Jość dadzienyja, jakija dazvalajuć dapuścić nieaficyjnaje i schavanaje supraćdziejańnie rasśledavańniu, jakoje, mahčyma, ažyćciaŭlajecca słužbovymi asobami MUS. Niajakasna i niesvoječasova vykonvajucca zapyty śledstva HPU», — zajaviŭ Machnicki.
Jon adznačyŭ, što da hetaha času nie praviedzieny poŭny kompleks mierapryjemstvaŭ pa vyjaŭleńni kruha supracoŭnikaŭ śpiecpadraździaleńnia MUS «Bierkut», jakija mohuć być datyčnyja da zabojstvaŭ aktyvistaŭ na Majdanie ŭ Kijevie.
«Nie ŭstanoŭleny abstaviny vyvazu abo źniščeńnia ahniastrelnaj zbroi, jakija byli zamacavanyja za supracoŭnikami śpiecroty», — adznačyŭ Machnicki.
Raniej deputat Hienadź Maskal, jaki ŭznačalvaje časovuju śledčuju kamisiju Viarchoŭnaj Rady z nahody masavych zabojstvaŭ na Majdanie, zajaviŭ, što płan z užyvańniem snajpieraŭ dla zachopu ŭ lutym budynkaŭ, zaniatych «majdanaŭcami», raspracoŭvali ŭ antyterarystyčnys centry SBU pry papiaredniaj uładzie. Akramia taho, jon nazvaŭ imiony kiraŭnikoŭ snajpieraŭ, nakiravanych na Majdan.
Pa słovach Maskala, nivodzin ź siłavikoŭ nie havoryć praŭdu ab udziele rabotnikaŭ pravaachoŭnych orhanaŭ u padziejach na Majdanie: «Akramia načalnika miedycynskaj słužby MUS, chitravali ŭsio. Ale ŭsia hetaja chłuśnia, jana vylezie».
Jon skazaŭ, što ŭ jaho jość niekalki viersij hibieli milicyjantaŭ i majdanaŭcaŭ padčas supraćstajańniaŭ na Majdanie Niezaležnaści: «Heta mahli być štatnyja supracoŭniki apieratyŭnych słužbaŭ, apranutyja pad majdanaŭcaŭ, mahli być i niekatoryja majdanaŭcy, jakija nie ŭvachodzili ni ŭ adnu z arhanizacyj, jakija byli na Majdanie. Kali «alfaŭcy» kažuć, što nie bačyli ŭzbrojenych ludziej na Majdanie, jany padmanvajuć. Chto ž tady stralaŭ? Vychodzić, što abo stralali ich, i jany ich «nie bačyli», abo stralaŭ niechta inšy, i jany nie mahli ich nie bačyć, tamu što zadača snajpiera — znachodzić u natoŭpie ludziej sa zbrojaj, jakija ŭjaŭlajuć pahrozu».
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary