Prezientacyja knihi «Zachodniebiełaruskaja Atłantyda» — 23 studzienia

Kniha «Zachodniebiełaruskaja Atłantyda» pryśviečana historyi Zachodniaj Biełarusi ŭ mižvajenny čas. Čytačy zmohuć paznajomicca jak z žyćciom zvyčajnych biełarusaŭ u 1921-1939 hady, tak i ź bijahrafijaj cikavych histaryčnych asob, źviazanych z našaj krainaj. Prezientacyja knihi adbudziecca ŭ piatnicu, 23 studzienia, u Minsku. 

Kniha «Zachodniebiełaruskaja Atłantyda» składajecca z artykułaŭ Ihara Mielnikava, historyka i daśledčyka žyćcia Zachodniaj Biełarusi «za polskim časam».

«Hetaje vydańnie – vynik majoj piacihadovaj pracy ŭ archivach roznych krain. Akramia hetaha, za hety čas ja abjeździŭ i ŭbačyŭ šmatlikija miaściny Biełarusi i paznajomiŭsia ź cikavymi śviedkami toj epochi, jakuju my zaraz nazyvajem «mižvajenny čas». U majoj pryvatnaj kalekcyi vialikaja kolkaść aŭtentyčnych zdymkaŭ, materyjałaŭ i dakumientaŭ 1920-1940 hadoŭ, častka ź jakich apublikavana ŭ «Zachodniebiełaruskaj Atłantydzie». Pryjšoŭ čas, kab sučasnyja biełarusy adkryli dla siabie histaryčnuju praŭdu pra padziei 1921-1939 hadoŭ u Zachodniaj Biełarusi», – adznačaje Ihar Mielnikaŭ.

Pavialičyć

U vydańni možna znajści analiz historyi zachodniebiełaruskich terytoryj u składzie Druhoj Rečy Paspalitaj. Asablivuju cikavaść vyklikajuć narysy, pryśviečanyja historyi kryminału ŭ Vilenskim, Navahrudskim i Paleskim vajavodstvach mižvajennaj Polščy. Taksama raspaviadajecca pra padziei vieraśnia 1939 hoda, udzieł biełarusaŭ u składzie polskaha vojska ŭ bajavych dziejańniach suprać viermachta i Čyrvonaj Armii ŭ samym pačatku Druhoj Suśvietnaj. Aŭtar analizuje historyju stalinskich represij suprać hramadzian Zachodniaj Biełarusi, a taksama sumna viadomy Biełaruski katynski śpis. 

Prezientacyja knihi kandydata histaryčnych navuk Ihara Mielnikava «Zachodniebiełaruskaja Atłantyda 1921-1941 hh.» adbudziecca 23 studzienia a 18.00 u siadzibie BNF na Čarnyšeŭskaha, 3. Na prezientacyi ŭsie achvotnyja zmohuć paznajomicca z aŭtaram, zadać jamu lubyja pytańni pa historyi Zachodniaj Biełarusi, ubačyć unikalnyja fatazdymki pa temie i nabyć knihu z aŭtarskim aŭtohrafam.

U vieraśni minułaha hoda Ihar Mielnikaŭ prezientavaŭ hledačam vystavu pad nazvaj «Zachodniebiełaruskaja Atłantyda» ŭ muziei ŭ Zasłaŭi. Ale cikavyja ekspanaty žyćcia biełarusaŭ «pry Polščy» šyrokamu kołu hledačoŭ pabačyć nie atrymałasia – vystavu zabaranili ideołahi Minabłvykankama. 

Pavialičyć

• 0
• 0
• 0
• 0
• 0
• 0
• 0
• 0