U lepšym razie dazvalajecca «raknroł-kazačok», piša na svaim błohu Siarhiej Astraviec.
2 lutaha, Horadnia. Najechali pažarniki, milicejski «kazioł», pradstaŭničaja postać tavaryša ź idealahičnaj kantory źjaviłasia. A‑ia‑iaj! Kancert učynić chočuć niesankcy‑iana‑va‑ny, dy jašče pryśviečany henamu nacyjanalistu Kalinoŭskamu! Spynić! Zabaranić! Prydumać štości! Razahnać zboryšča!
Ale ž adkaznyja tavaryšy sami lubiać muzyku, nia tolki papsu, sami razumiejuć idyjatyzm ułasnaj roli. Tamu, mabyć, kozyr nia vykarystany: pra bombu z hadzińnikavym mechanizam nie abvieščana, evakuacyja nie adbyłasia, zabarona nie ažyćcioŭlena, muzyki zajhrali‑zaśpiavali. Zrešty, pasłancy sami ničoha nie vyrašajuć, jany rajacca doŭha j nudna pa telefonie ź niabačnymi lalkavodami.
Tak, a publika adčuvaje napaŭpadpolnaść kancertu, pahatoŭ anturaž spryjaje: ciomny padvorak z vysokimi starymi dachami, u kutu dźviery tudy, dzie jašče žyvy duch svabody. Raptam zapalvajecca pražektar, dzielačy padvorak kantrasna na čorny sektar i śvietły. Ź dźviarej čutny barabannyja huki, muzyka, śpieŭ…
A pa skryncy miłaja kamedyja pra moładź, jakaja žyvie kala Bierlinskaj ściany ŭ HDR i maryć pra kružełki Rolling Stones, jakija joj, akazvajecca, taksama byli niedastupnyja. Hałoŭny hieroj razvažaje: u ich, napeŭna, vialikaja arhanizacyja, jakaja cełymi dniami prasłuchoŭvaje novyja pieśni, kab nam zabaraniać… Tancy na školnaj viečaryncy pad zapisy T. Rex, prodaž z‑pad krysa zachodnich kružełak. Z padmanam: heta nia Rolling Stones, a tolki nalepka ichniaja.
Našaha hieroja razam ź siabram vyklikajuć da dyrektarki, u kabinecie tavaryš sa Štazi i dziajački z «Sajuzu niamieckaj moładzi»: vyśvietliłasia źnianacku, što chłopcy, parazity, «scali na antyfašyscki abarončy mur»!
Niezdarma, mabyć, našuju rodnuju siniavokuju respubliku zamiežnyja padarožniki paraŭnoŭvajuć z kolišniaj HDR. Isnuje padabienstva, šprechajem my pahatoŭ jak HSVH kolišniaja. I rok‑muzyka zastajecca pad padazreńniem pa‑raniejšamu, i ŭschodniaja miaža Eŭropy skančajecca tut mienavita, naš iržavy kalučy drot baronić «eŭraziju» ad tankavych armadaŭ Huderyjana. Prynamsi tak pa skryncy ŭvieś čas paŭtarajuć.
Rok zaŭždy padtrymvaje pačućcio pratestu, pačućcio svabody. U susiedniaj krainie pa skryncy ŭžo amal pryznačyli nastupnaha prezydenta. Teleelektaratu jon padabajecca vielmi, navat mnie ŭsio bolej‑i bolej. Čamu? Pryjemna, kali kiravać krainaj maje intelihientnaha vyhladu čałaviek, jakomu padabajecca Black Sabbath i sam O.Osborn. Ozi, kaniešnie, kamična vyhladaje ŭ svaim siamiejnym seryjale, zroblenym, zdajecca, BBC. Ale ŭ jaho takaja rola, a voś kali jon biare mikrafon, to zastajecca pa‑za krytykaj. Pryjemna, karaciej. Bo niekatorym, jak viadoma, daspadoby Siardziučka.
Ciapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club10
Kamientary